¹ Nzeam atuba nda moize ndenden: "Vean etay e Yaweh, yie ti Aaron, Nadab ti Abiu, ti antsuru Israel oshambia, mby asibabagnu ko etey mpign. ² Moize asivanga nde ndemie mbeama na Yaweh; amuu agni wapavanga ve, mpi vear ankeankum wapavanga ve." ³ Moize atsa nkaba vear ankeankum vii amituba Yaweh ti wansiku inkum imipeande. Vear ankeankum wakeara n'otuba omog wuwun: "Asikiesu vii ankum amituba Yaweh." ⁴ Moize s'afugn nde vii ankeankum amituba Yaweh. Mby, abiy ne suka, atwung kunda emog ne ngie ombim, mby ayim atari djum n'ipe djwi na ekuu djum n'ipe e aman Israel. ⁵ Atum enkwo aman Israel na nkie empeab djwi na Yaweh, mpi wadjag wangombe djwi na makabu i nkeara nsag-na-vie. ⁶ Moize avey kati-kati aluung, atsug ne alongo anen-anen, mby apay kati-kati aluung amuu agni ne kunda. ⁷ Avey onkean alien, s'atangikinde ne nteang e vear ankeankum, watuba wuwun: "Asikiesu vii ankum amituba Yaweh, mpi asilemfuka su na wo." ⁸ Moize avey aluung anagn ajiem ne djuung i vear ankeankum, ndenden: "Yenagni, ene eli aluung alien amikie Yaweh nda gnu, ne oshin o vii ankum ayitubinde. ⁹ Moize avean nda Aaron, Nadab ti Abiu, ti antsuru a Israel oshambia. ¹⁰ Wayen Nzeam Israel. Ne ngie i nkuu inde, ayiwo na onkean omog eli kamsi tala-tala, kamsi olung wemie ekwon mbin. ¹¹ Akashima ewuo ende ve ne dzug i ote antsuru aman Israel. Wayen Nzeam, mpi wala, wagnua. ¹² Yaweh atuba nda Moize ndenden: "Vean nondo etay eli me ne dzug ombim, mpi satsuga kog, asopeame wamesa i itari, onkwon ti wansiku imifugn me djwi mokabagni wog. ¹³ Moize s'ayimi nde nda Yojue eyike wur ende otshia; mby Moize s'avean nde ne ombim e Nzeam. ¹⁴ Atuba nda antsuru ndenden: "Otekwungagni nendien tii ko esikeasu etay eli gnu. Yenagni Aaron ti Hur walasatsuga ti gnu. Yug eli na wur eli na djwi, asapea vii awo etay ewo. ¹⁵ Moize avean ne ombim, mby mafuba edzub ombim onagn. ¹⁶ Nkembo e Yaweh eyia ne ombim e Sinai, mpi mafuba edzub nshuu isom. Eshuu ishambia, Yaweh avie Moize ne ngnina e mafuba. ¹⁷ Nkembo e Yaweh ayiwo kamsi ekb e tshiya emog ne nsor ombim, ne viy aman Israel' ¹⁸ Moize s'ashwinde ne ngnina e mafuba enagn, avean ne dzug ombim. Moize asayia ne dzug ombim, akie nshuu onign, na mbiiy na otshuu.