¹ Yen wansiku iyapeayie wo: ² Yug otishum mpfumi e yuda, ayakiende otshia mvwe isom. Kansi ne mvwe ishambia, ayapwende ko mpama, apayafuta ata vim ve. ³ Yug atishue ndemie, asipwende ndemie; yug ayinde na wear, asipwende ti wear nde. ⁴ Yug eli nkum ende wur eyopii wear enagn, mpi atiwur aman ampeam to aman ankear, wear ti aman ande asiyiawo ya nkum ende, mby nde, asipwende ndemie. ⁵ Yug mpfumi enagn atituba ndenden: "Ndaleang nkum eme, wear me ti aman ame, ntun na mpwe mpama." ⁶ Mby nkum ende asovara nde ne nteang e Nzeam, asotum nde mbeama na epfug to mbeama na oshung, mby nkum ende asoyara nde itii na vim e nsor mby mpfumi asatsuga ne otshia onde otshwag-otshwag. ⁷ yug wur atisar mon nde onkear djwi ayii mpfumi, mon onkear onagn apakeampwe ve, kamsi esikeampwe ampfumi amuu. ⁸ Yug nkum ende atiyen ndenden kaku diaka mfunu ende ve, mpi yug aling omvey kamsi wear nde, asisianga nde vear amuu woshum, yug amiyen atikie vim epileangn nde, asosar nde, kansi apayia n'ekub onsar nde ya angingien ve. ⁹ Yug aling n'ompea ya mon nde ompeam, asikiende, dji na mon onkear onagn, vii afwete wo nkie djwi na aman ankear. ¹⁰ Yug amivey onkear omuu, kaku vim esilima nde ve djwi na onkear onteang, ne vim ande a nda, ne ileam inde, ata ne nsiku i nshwe ne evuru ti onkear. ¹¹ Mby yug akakie vim asar ane ve, onkear onagn asikug nde mpwe, akwon mfuta ata vim emog, akwon mpea ata ekri. ¹² Wur esinang wur djwi wur enagn awe, asopeawo ndola e ewa. ¹³ Yug akotsug abaag ve ne mbug ende, mpi yug amilogo wur enagn ne mbwo inde, enagn ayokieme ondii eyakug nzuba wur enagn. ¹⁴ Kansi yug wur amikie na nkier vii apwo djwi na otwung onde, odjim na waagn djwi n'ondjag nde, ayolima yie ata ne kunda eme, djwi wodjag. ¹⁵ Wur esinang tea nde to mea nde asivey nde ndola e ewa. ¹⁶ Wur esikama wur, yug amosar to amosowum ne mbwo inde, asivey nde ndola e ewa. ¹⁷ Wur esishing tea nde to mea nde, asivey nde ndola e ewa. ¹⁸ Yug vear washia, mby emog aminang otwung onde itari to inkom, mpi akawa ve, kansi yug amitsa ndog ko ne ntir ende, ¹⁹ wur eyinang otwung onde enagn apavey ndola ve yug wur emuu enagn amiyima na mpeang ende alekien nelien. Vim emog esikiende, asofuta nde djwi atutshung otshia onde mpi asosarisa nde na mpura inde inagn tii ko esikeande wuo. ²⁰ Yug wur aminang mpfumi ende oshung, ompeam to onkear, mpi yug mpfumi amiwa ne ewuo ende, nkum ende asivey nde ndola. ²¹ Kansi yug amiyia n'evug eshuu emog to nshuu ipe, nkum ende apavey ndola ve; ogniang eli ekri ende. ²² Yug vear washia, mpi wamitsa gnege onkear eli na djim, yug onkear owo amiwur djwi watognug, yug amiwur wuo, vear anagn asifuta wo isuu ekri esitsug wum onkear onagn. Asifutawo ne nteang e vear abag vii. ²³ Kansi yug amiwur mon n'ekom, asapeayie ndola e luzingu na luzingu, ²⁴ dziy na dziy; ikaag n'ikaag; ewuo n'ewuo, ekuu n'ekuu; ²⁵ tshiya e ngibwo na tshiya e ngibwo, mpura na mpura, ilem n'ilem. ²⁶ Yug wur amibuye mpfumi ende dziy, ompeam to onkear, asosianga nde, apafiyia mpfumi ve djwi na dziy inde. ²⁷ Mby yug amikuga ikaag i mpfumi ende, ompeam to onkear, asosianga nde apafiyia mpfumi ve, djwi n'ikaag inde. ²⁸ Yug ngombe amitag wur na asig ande, ompeam to onkear, mpi yug amiwa, asidjag wo ngombe enagn na atari, wapala oky onde ve, mpi nkea ngombe apavey ndola ve. ²⁹ Kansi ngombe enagn ayiwo wafwete ondjag, mpi wamikaba nkum ende, yug akolir wuo ve, asibug wo ngombe enagn atari, yug adjag nde ompeam to onkear, nkum ende asivey nde ndola e ewa. ³⁰ Yug watsug isuu ya nkum ende, asifuta nde vim enkum esitubawo ya nde. ³¹ Yug ngombe amitag mon ompeam to mon onkear, asikiegnu nsiku ene; ³² kansi yug ngombe amitag mpfumi emog, ompeam to onkear, asipeawo ekri, kilo osar, ya nkum e mpfumi enagn, mpi asiug wo ngombe enagn atari awe. ³³ Yug wur atisatsug ibulu i vay epuu, to yug amitsum ibulu i vay mby akasadzub wog ve, mby ngombe to mpunda amilog neti, ³⁴ nkea ibulu i vay asifuta nde ekri ekug ya nkea gnam enagn, mby nde asavey gnam emiwa enagn. ³⁵ Yug ngombe e wur amidjag ngombe e wur emuu na asig, asisar wo ngombe e ngitien enagn mby asikiewo akab na ekri ewo, asikiewo mpi akab a ngombe e ngiwa. ³⁶ Kansi vear wajia wuwun ngombe enagn mpi, nkum ende akolir wuo ve, nkum nde enagn asifuta nde ngombe emuu, mby nde asavey ngombe e ngiwa.