¹ Ko eshuu enagn, vwi Zerses, asapea Ester, vwi onkear, evuru eyi Haman, mbeni e waYuda; Mardoshe mpi apwe ne nteang e vwi, ogniang Ester okabinde oshin oli wo wape. ² Vwi alima epete ende eyikey nde mvey ya Haman, apea ya Mardoshe; Ester mpi nompign, atsug Mardoshe n'evuru eyike Haman. ³ Mby Ester akea ntuba ne nteang e vwi. Alog ne nkuu inde, aliye, awigna ya nde akwon nkie vii apwo ayileang nkie Haman, wur e Agag, djwi na waYuda. ⁴ Vwi ashima ikom i wolo ya Ester, s'akey nde ngyima, ne nteang e vwi. ⁵ Mby atuba ndenden: "Yug vwi ayen eli wuo, mpi yug me ntivea ngrasia ne nteang ende, vii awo elakug djwi vwi aki wog, mpi yug me ndi wuo ne vy ande, wafugn onkean omuu djwi na ndjag enkean eyifugn Haman nteang, mon e Hamedata, wur e Agag, enkean eyitum nde ne antn inkeankum okiri e vwi, djwi wadjag waYuda. ⁶ Djwi me, oshin onkagn esikug me ngyen vii apwo esilog ys vear ame, mpi oshin onkagn esikug me ngyen ewa atwung ame?" ⁷ Vwi Zerses atuba nda Ester ti ya Mardoshe, wur e Yuda ndenden: "Yen, mean ntipea Ester evuru eyi Haman, ndea ko watoler ne oshung djwi na oshin onadjag nde waYuda. ⁸ Fugnagni enkean djwi wakwon nkie waYuda ipwo, oshin osileang gnu, ne dzin i vwi, tsugagni tampo e vwi, ogniang onkean omifugn wo ne dzin i vwi mpi watsug tampo e vwi wapikug mfanga wog ve. ⁹ Wavie vear atsa mfugn enkean e vwi, ne ntangu enagn, ayiwo eshuu e omab n'isar e ngwon otatu eviewo ngwon e Sivan, s'afugnikiwo, oshin oyitubike Mardoshe ya waYuda, vear a Satrape, ankum a viya oluu, ankum a wantn nkama emog n'omab n'ishambia, yim India tii ko Etiopi, konso ntn na bisoni iwo, n'otuba otuba wo. ¹⁰ WAfugn onkean owo ne dzin i vwi Zerses, watsug tampo e vwi. Watum enkean ewo ya vear, wakwuna ne wampunda ti aman a mpunda. ¹¹ Ne enkean enagn, vwi apea nswa ya waYuda na nsanga djwi na mplege na luzingu ewo ne oluu o wiya na wiya, na mpiy, na ndjag, na ntum vear wadjag, na aman awo, na ankean awo ti ankear awo, vear ankeakum ali ne ntn enkeankum esivey eta djwi wotagagni na mbaagn, mpi vim awo oveyagni ivey-vey, ¹² vii anagn asikie gnu ko n'eshuu emog, ne wantn inkeankum i vwi Zerses, eshuu e djum n'isar e ngwon djum n'ipe, eviewo ngwon e Adar. ¹³ Ne enkean enagn, ayiwo na onkean omuu oyifugn wo nteang, enatanga wo ne ntn inkeankum, wakaba vear wuwun waYuda wakwung na ndwa eshuu enagn ti wambeni iwo isiya ntag wo. ¹⁴ Ko oshin oyitum vwi, vear ayivari enkean enagn wakwuna ne dzug i wampunda eveang-eveang, s'akien wo. Atangi wo onkean o nsiku enagn ti ne Suse, wiya oluu. ¹⁵ Mardoshe apwe nelien opeang o vwi, n'eleam ekub e vwi, e bule ti e siy, impu ekub e wolo eninen, ti kazag e kwi. Vear a wiya oluu e Suse watsug elie n'osiang. ¹⁶ Djwi na waYuda, ayiwo ko osiang ti lokumu. ¹⁷ Ne ntn enkeankum ti konso wiya, ondii onkeankum esikum onkean o nsiku emitum vwi, waYuda ayikiwo ko n'osiang, waleam, wala. Mby vear entsign ali etuba emuu wakum ko waYuda, ogniang womo e waYuda etakir wo.