¹ Vwi ti Haman s'atshiwo nda oliu owo etay e Ester, vwi onkear. ² Eshuu ozole ene, vwi akea ntuba nda Ester, ntangu egnua wo veana, ndenden : "Vim nge eling yie, Ester, vwi onkear ? Asopeame vim esiling yie. Ata emiyia ikab okiri ne ngnina, asivea yie." ³ Vwi onkear, Ester okeara ndenden: "Vwi, yug ntvea ngraia ne vy ayie, mpi yug vwi ayen eli wuo, ompi luzingu, enagn wog vim ewigna me ya yie, mpi vuga atwung ame, enagn wog vim eleang me! ⁴ Ogniang wamitesar, me ti atwung ame, djwi watedjag, watebag nking, siwe. Mpi yug atesar wo djwi sikum ko ampfumi ti vear otshia, asiyia me pwo, kansi mbeni apakug ve na nkeara ifutu ya vwi na vii apwo asitekie wo." ⁵ Vwi Zerses ayue Ester ndenden: "Wur ewo nagn, mpi ali nonkagn, wur eling n'onkiagni iwo inagn?" ⁶ Ester akeara ndenden: "Wur ewo, mbeni ewo eli Haman, wur epwo ene!" Haman ayug womo ne nteang e vwi ti vwi onkear. ⁷ Mby vwi, na nkier inde, ayima, akafila ve, atsa ne ngie eshung eli neti opeang. Haman asatsuga kog na nding ngrasia djwi na luzingu ende, ne nteang e Ester, vwi onkear, ogniang ayen nde ndenden, ne nginu i vwi, ewa ende etikug. ⁸ Ntangu emikea vwi yim ngie eshung, akea nshwe n'ondii olikiwo, ayen Haman, atitsa etay eli Ester emivur nde ne ntir, atuba ndenden: "Ene epa atitsa nkea nkie Ester, vwi onkear oshuru neti evuru eme?" Ko ntangu eyipwi otuba onagn n'odzum o vwi, vear s'ayiwo ndzub Haman eleam n'elung. ⁹ Mby Harbona, nkum emuu eyidjag okwongo, atuba ne nteang e vwi ndenden: "Yen, ene eli oshung omiwong Haman djwi na ndjag Mardoshe, nde wur eyitubi vii a wuo djwi na vwi, Haman atiyim oshung owo n'evuru ende, otey ewo eli metelo omab n'itean." Vwi atuba ndenden: "Wasaler Haman n'oshungonagn!" ¹⁰ Mby s'aler wo Haman n'oshung oyiwong nde na nder mardoshe. Mby nkier i vwi s'alem wo.