¹ Otshuu onagn, vwi apikug mvur lwong ve, mby atum wojie enkean emifugn wo djwi na wavwi. Watanga wog ne nteang e vwi, ² mby wayen vii ayitubi Mardoshe djwi na Bigtan ti Teresh, vear ape akie mbeama na vwi, emidjag okwongo, wog vear alingike na ndjag vwi Zerses. ³ Vwi atuba ndenden: "Mby vim eo nge emivea Mardoshe djwi na vii ayitubinde ene?" Vear akie ti vwi wakeara wuwun: "kaku ata vim emog emivea nde ve." ⁴ Mby vwi ayue ndenden: "Nagn eli neti opeang?" Kog ayiwo Haman atiyia ne nteang opeang o vwi, djwi na nding ya vwi waler Mardoshe n'oshung emiwong nde. ⁵ Vear otshia e vwi wokaba wuwun: "Eli ko haman wur eli n'opeang" Mby vwi ayue ndenden: "Nge efwete wo nkie djwi na wur eling wo mpea lokumu?" Haman atuba ndemie n'etura ndenden: "Nagn emuu eling mfipea lokumu eso, yug epa me ve?" ⁷ Mby Haman akeara mvutu ya vwi ndenden: "Djwi na wur eli vwi aling n'ompea lokumu, ⁸ ekug n'ompea nde eleam etsa nzub vwi ne djuung, avean ne mpunda e vwtsa mvean vwi, ti impu ekub e vwi, ⁹ wapi eleam ti mpunda ya nkum emog eli ne mby e vwi, mby wakey ndwer wur eli vwi alopea lokumu, mby aki ekien ne dzug i mpunda ne wiya oluu, vear waletsug elie nteang ende wuwun: 'Ene oshin otsawo nkie ya wur eli vwi alopea lokumu!" ¹⁰ Vwi atuba nda Haman ndenden: "Kagn mvey eleam ti mpunda, ko oshin omituba yie, kie wog djwi na Mardoshe, wur e Yuda ene, emigneme ne mbwung opeang e vwi, oyakwon nkie ata vim emog ve ne vii ankeankum amituba yie ene." ¹¹ Haman mpi avey eleam ti mpunda, alwer Mardoshe, akien ne dzug i mpunda ne wiya oluu enkeankum, mpi aletsug elie nteang ende: "Ene eli oshin otsa o nkie ya wur eli vwi alopea lokumu!" ¹² Mardoshe akea ntshim tii ne mbwung opeang o vwi, haman mpi akea ntsa opeang onde, na ngy, ote ngidzub. ¹³ Haman akea ntsa nkaba wear nde Zeresh ti iwur inde vii ankeankum amileg. Mby antiegn ande ti wear nde Zeresh watuba wuwun: "Yug eli ko Mardoshe, wur e Yuda, otibana ndog ne nteang ende, enagn kaku vim emog esifikie yie ve djwi na nde; asilogaka yie ko ne nteang ende." ¹⁴ Ko ntangu etuba wo w nde, vear a vwi emidjag okwongo mpi, wavey Haman djwi na ntsa nda oliu emiwong Ester.