¹ Eshuu otatu, Ester alwer ileam inde i wear e vwi, atsa ne nteang evuru e vwi. vwi ayinde ngigneme ne nkway ende ekub, ne nteang e mbwung evuru. ² Vwi ntangu emiyen nde wear nde Ester atiyima ne ngnina opeang, avea ngrasia ne vy a vwi, mby ikom i wolo imikir vwi n'ewuo ende, ashima wog ya Ester. Ester avanga, s'akir nde nsor ikom inagn. ³ Vwi oyue ndenden: "Vwi onkear Ester, djwi nge eli yie na wo? Yug elomo ovey ata ikab okiri ne ngnina, asopea wo." ⁴ Ester okeara ndenden: "Yug vwi ayen wuo, lwo ene aye etay eli me, ti Haman, wye nda oliu emiwong me." ⁵ Vwi atuba nda vear ande otshia ndenden: "Tshwagagni ko opeane, lingagni Haman, oshin omileang Ester. Vwi s'atshindeti haman na nda liu emiwong Ester. ⁶ Mby ne ntangu egnua wo veana, vwi ayue Ester ndenen: "Tubaka vi nge eling yie? Asopea me vim eling yie. Oling nge? Ata omiling ikab i okiri ome ne ngnina, asivea yie." ⁷ Ester okeara ndenden: "Yen vim ewigna me mpi vim eleang me. ⁸ Yug me ntiyen ngrasia ne vya vwi, mpi yug vwi atileang na mpea me vim ewigna me ti vim eleang me, vwi aye nda Haman na nda oliu emiwong me djwi na wo, mby nampign ayapea me mvutu oshin omitum vwi." ⁹ Eshuu enagn, Haman apwinde n'osiang n'etura ende kaku mpila. Kansi ntangu elepwi nde, ne mbwung opeang, ayen Mardoshe, apileang ngima ve, apikr ata abong ne nteang ende ve, ayug nkier biu djwi na Mardoshe. ¹⁰ Akaplege ve, akien evuru ende. Mby atum vear na nding iwur inde ti wear nde Zeresh. ¹¹ Haman akaba vear anagn otsun onde elinde na wo, isuuaman ande ampeam, oshin onkeankum emikie vwi djwi ojir n'ekub eli nde neti enagn, ti oshin omikie nde djwi na ankum ti vear otshia e vwi watuka vean n'ekub ewo. ¹² Akea ntuba ndenden: "Ndiko memie, wur emivie Ester, wear e vwi na nda ti vwi, oliu emiwong nde nampign n'evuru ende. ¹³ Kansi inkeankum enagn, epinki vim emog ve, yug nda shunga ngyen ko Mardoshe, wur e Yuda enagn, agneme ne mbwung opeang o vwi." ¹⁴ Wear nde Zeresh ti iwur inde watuba wuwun: Ekug na ngwong oshung, otey ewo eyi metelo omab n'itean. Nampign ne suka, wigna ya vwi waler Mardoshe n'oshung onagn; mby kog asitsa yie n'osiang ntsa nda oliu onagn ti vwi." Nginu inagn ekeya etura e Haman, mby s'awong nde mpi oshung owo.