¹ Ne ngwon djum n'ipe, eviewo ngwon e Adar, ne eshuu e djum n'isar e ngwon ewo, eshuu enakiewo vii ayitubi enkean eyi nteang eyitum vwi, eyitsug wambeni i waYuda etura wuwun asagneg wo, vii atshim, waYuda wakea gneg wambeni iwo. ² WaYuda watsug akina ne viya iwo, ne ntn inkeankum i vwi Zerses, djwi na ndjag vear aling ewa ewo; mpi kaku wur eyikug na nkie vim ve, djwi vear ankeankum akum wo ngyug womo ewo. ³ Mby ankum ankeankum a wantn, waSatrape, ankum a mbumater akie etay e vwi, washwe vii awo etay e waYuda, djwi Mardoshe akum nde ampea wo womo. ⁴ Ogniang Madoshe ayinde n'ekub entsign n'evuru e vwi, lokumu ende epagn tii ne wantn inkeankum, djwi aleginde nkum ko biu. ⁵ WaYuda adjag wo wambeni iwo n'empien e vur epe, wadjag, s'afangi wo; vear ayiyenikiwo vear apwo, akikiwo oshin oleang wo. ⁶ Ne wiya oluu e Suse, waYuda adjag wo mpi wafanga vear nkama itean, ⁷ wadjag mpi Parshandata, Dalfon, Aspata, ⁸ Porata, Adalia, Aridata, ⁹ Parmashta, Arizai, Aridai ti Vajezata, ¹⁰ wankea djum, aman a Haman, eyi mon e Hamedata, mbeni e waYuda. Kansi wakafipiy vim awo ve. ¹¹ Eshuu enagn, isuu i vear ayidjag wo ne wiya oluu e Suse, ekum tii ya vwi. ¹² Mby vwi atuba nda Ester, vwi onkear ndenden: "Ne oluu o wiya e Suse nendien, waYuda watidjag vear nkama itean mpi watafanga, ti aman a Haman djum; mby ne wantn imuu i vwi watikie esing? Nge emuu efiling yie? Asivea yie. Nge emuu eleang yie? asopea me." ¹³ Ester okeara ndenden: "Yug vwi ayen eli wuo, api nswa ya waYuda ili ne Suse nendien na nkea nkie oshin onagn nampign vii ali n'onkean o nsikue lwo ene, waler aman a Haman ankea djum n'oshung, ¹⁴ Vwi mpi apea nswa na nkie oshin onagn. Watanga onkea o nsiku ewo ne Suse. S'aler wo aman a Haman djum n'oshung. ¹⁵ Eshuu e djum n'inign, e ngwon e Adar, waYuda ili ne Suse wakea ntsug akina, wakea ndjag vear nkama isar ne Suse. Kansi wakavey vim awo ve. ¹⁶ wayuda imuu iyi ne wantn i vwi, watsug akina djwi na mvuga luzingu ewo, ayor wo ko ntangu eyidjag wo wambeni iwo; adjag wo vear awug nkama oshambia n'itean; enagn vear apwo djwi na wo. Kansi wakapiy vim awo ve. ¹⁷ Vii ane alog wo eshuu e djum n'isar e ngwon e Adar. WaYuda s'ayor wo ne eshuu e djum n'inign, s'akum wo eshuu eyileam wo vim wala, wayia n'osiang. ¹⁸ Vear ayi ne Suse, ntangu emitsug wo akina awo, ne nshuu djum n'isar ti djum n'inign, s'ayor wo eshuu e djum n'itean,s'akum wo eshuu eyiki wo ileam mpi wala n'osiang. ¹⁹ Wog enagn, waYuda ili ne viya, itsampier ne viya oluu ikwon epeang e mbriki, yug watikum ne eshuu e djum n'inign e ngwon e Adar emikum eshuu e oliu ti osiang, eli waletumi vear eky etay n'etay. ²⁰ Mardoshe afugn nde vii ane, mby s'atum nde enkean ewo ya waYuda iyi ne wantn inkeankum i vwi Zerses, ali etey ti ali pipi. ²¹ Akabi nde vear ande na nkie okina konso mvwe, eshuu e djum n'ingn ti djum n'itean, e ngwon e Adar, ²² eyi kamsi eshuu eyiyor wo, eyilim wo ne mbwo i wambeni iwo, ngwon eyisongi ngy ewo esakum osiang, shuu ewo e mpay ekum eshuu okina, mpi nshuu ipe ine esakum nshuu ikiewo aleam ti oliu, nshuu itum wo eky e gnam wog na wog, mpi epeawo vim ya vear ali na mpay. ²³ WaYuda wakana na nkie vii ayibani wo nteang, mpi vii ayifugn Mardoshe n'onkean. ²⁴ Ogniang Haman, mon e Hamedata, wur e Agag, mbeni e waYuda inkeankum, avey nde nginu i ndjag waYuda, apur nde nsiku na ndjag wo mpi washir; ²⁵ kansi ntangu emipwe Ester ne nteang e vwi, vwi s'atum nde wafugn enkean, vii apwo anagn esalog n'ote e Haman nginu ipwo iyivey nde djwi na ndjag wayuda, mby s'oler wo nde ti aman ande n'oshung. ²⁶ Wog enagn eyisawovie nshuu inagn Purim, ne dzin i zeke eyibug wo djwi na njia eshuu nge eyalog vii awo. Oshin oyifugn wo vii awo n'onkean, ne vii ayiyen wo, ti vii ayilog ya wo, ²⁷ waYuda s'akaniwo djwi na wo, djwi na aman awo ti vear ankeankum ayapier ti wo ondii omog, wapikug mfilima ve, okina ne nshuu ipe inagn, konso mvwe, oshin omituba wo, yug ntangu ewo etikug. ²⁸ Nshuu inagn ayakanaka wo mpi ayakiaka wo okina, ne konso opeang, ne ntn inkeankum, mpi ne konso wiya, ayakiaka wo mvwe na mvwe; mpi nshuu i purim inagn ipaya wa ve ne kati e waYuda, ata aman awo wapayajing ve vii amileg enagn. ²⁹ Vwi onkear, ester, mon e Abikail, ti yuda eviewo Mardoshe, wakea mfugn mbala ozole, onkean omuu djwi na vii afwete wo nkie ne nshuu i Purim. ³⁰ Watum enkean ewo ya waYuda inkeankum, ne wantn nkama emog n'omab n'ishambia e vwi Zerses. Neti watifugn vii a ngemba ti a masonga, ³¹ ko djwi na nkaba wo vii a nshuu ipe i Purim enagn yug ntangu ewo etikug, oshin oyitsug Yuda Mardoshe ti vwi onkear Ester djwi na wo, mpi ti aman awo ayasawo wur mby, djwi na okio eyikiwo, ti elie eyitsug wo etay e Yaweh. ³² Wog enagn, djwi na vii ayitubi Ester, wamisavey kamsi nsiku djwi na nshuu i Purim, mpi wamifugn wog n'onkean.