¹ Ne mby e vii ane, vwi Zerses atsug Haman n'ekub, mon e Hamedata, wur e Agag; apea ekubelenga vear ankeankum ayike mbeama na nde. ² Vear otshia ankeankum a vwi, atsankwung ne mbwung opeang o vwi, akrikiwo obong ne buu ne nteang e Haman, enagn oshin eyitubi vwi nda wo.Kansi Mardoshe akaleangaka nkr abong ne nteang ende ve. ³ Mby vear otshia e vwiayikwungike ne mbwung opeang, wayue Mardoche wuwun: "Djwi na nge epilemfuki yie n'otuba o vwi?" ⁴ Oyuikiwo vii anagn konso eshuu, kansi nde, akaleangaka ngyug ve, s'akabiwo Haman, atolir yug Mardoshe asikiende ko ote biu; ogniang akabinde ndenden ali wur e Yuda. ⁵ Haman mpi ayen Mardoshe apikr abong ne nteang ende ve, s'ayug nde nkier. ⁶ Anadjag nde Mardoshe ndemie, djwi okabiwo wuwun ali wur e Yuda, mby s'ayen nde wuo adjag vear ankeankum, atwung a Mardoshe, waYuda, ilepier ne okiri o Zerses. ⁷ Ne ngwon enteang, eviewo Nisan, ne mvwe djum nipe eli Zerses n'ekub, Haman abug zeke, djwi na njia, ne konso ngwon, tii ko ne ngwon djum n'ipe eviewo Adar, eshuu n'eshuu nge eyakie nde vii amikana nde. ⁸ Mby Haman s'atubinde nda vwi Zerses ndenden: "Ne wantn i okiri osu ene, eli na otuba o vear amog wamipagn etay n'etay. Eli na vear awo, nsiku iwo ipa ili oshin omog ve ti nsiku i vear ankeankum, mpi wapileang ndemfuka na nsiku i vwi ve. Vwi apikug ngyia na mfunu e vear anagn wayi ne luzingu ve. ⁹ Yug vwi ayen eli wuo, wapur onkean omog djwi na ndjag wo; mby me, asiyer me etiempar, odzur o kilo awug djum eyim ya vear otshia e mbumater, eshwi n'iteang i vwi." ¹⁰ Vwi alima epete ende n'ewuo, alwer Haman, mon e Hamedata, wur e Agag, mbeni e waYuda. ¹¹ Mby vwi atuba nda Haman ndenden: "Watopea ekri, ti vear anagn; kie ko oshin oleang yie." ¹² Wavie vear afugn enkean evwi, eshuu e djum n'isar e ngwon enteang, wafugn vii ankeankum ayitubi Haman, ya ankum ali ti vwi, ya ankum ali ne ntn inkeankum, ya ankum a otuba n'otuba, vear na vear oshin ofugn wo. Afugn wo ne dzin i vwi Zerses, watsug tampo e vwi. ¹³ Watum enkean enkeankum ne wantn ili n'okiri o vwi, djwi wadjag waYuda inkeankum, ilieng ti intsuru, aman a nse ti amea awo, wawe ko eshuu emog, eshuu e djum n'sar e ngwon e Adar, mby vim awo, vear wasagnuna, wavey ivey-vey. ¹⁴ Enkean ewo ayiwo wafwete ntanga wog ne nteang e vear ankeankum ne wantn inagn, mpi elomo vear wakwon njing eshuu ewo. ¹⁵ Enkean ewo mpi ekien eveang-eveang, oshin oyitubi vwi. Watanga wog mpi ne vy a vear ankeankum, ne oluu o wiya e Suse. Kansi ntangu eli vwi ti Haman wagnua veana, vear a oluu o wiya e Suse nendien itura itikum ko ne dzug.