¹ Nemby ewo, ntangu emikra nkier i vwi Zerses, akea nkana vii amikie Vatshi ti onkean o nsiku emipur nd djwi na nde. ² Mby vear ayipike vwi vim a nda, watuba wuwun: "Wuo walingi vwi aman asig ankear, watojii ata ampeam ve, mpi ali wuo ne ilung iwo; ³ vwi atsug ankum, wapii otshia o nsa nding asig ankear, watoji ampeam ve,ali n'ilung o wuo, ne wantn inkeankum ti ne oluu o wiya e Suse, wayi gneme n'evuru ankear, Hege wur esiliraka ankear anagn, nde wur etigna ndiraka ankear n'evuru e vwi, ndug wur eyapeaka wo vim ekug djwi na ngyog vay; ⁴ mby, mon onkear eyaleang vwi, ndug enagn eyasavey ondii ne dzin i Vatshi." nginu inagn apiwo osiang ya vwi, mby s'akinde ko oshin onagn. ⁵ Ne wiya oluu e Suse, ayiwo na Yuda emog dzin inde Mardoshe, mon e Jair, mon e Shimei, mon e Kis, wur okuu e Benjamin, ⁶ ovariwo yim Yeruzalem, ayinde ne kati e vear ayitshung wo ti Yekonia, vwi e Yuda, vear ayitshung vwi Nabukodonozor e Babiloni. ⁷ Awunga Adasa, eviewo Ester n'evuru ende, mon e mpiy nde, akayia na tea ti mea ve. Osig onkear onagn ayinde entiengonkear, wuo n'elung. Ntangu eyiwi tea nde ti mea nde, Mardoshe s'ovey nde owunga kamsi mon nde. ⁸ Ntangu emipur wo onkean o nsiku e vwi, mpi ntangu emitsug wo asig ankear ankeankum ondii omog ne Suse, wiya oluu, Hege wur elir aman ankear anagn, avey wo ti Ester, s'atshinde n'evuru e vwi, Hege wur elir aman ankear anagn. ⁹ Osig one avea ngrasia ne nteang ende, opinde osiang n'etura ende, s'okagni nde ompea vim ande djwi na ngyog vay, mpi djwi na nda, opea mpi asig ankear amuu ishambia emison wo n'evuru e vwi, mby atsug wankeankum ne evuru elenga wuo, ondii olevur ankear awo. ¹⁰ Ester akakaba wur ve okuu onde eyim nde, ata oshin eyowur wo, ogniang mardoshe opum nde na nkab vii anagn. ¹¹ Mardoshe ayikinde konso eshuu ne nteang evuru eli aman ankear anagn na njia oshin nge eli Ester, ti vii nge elakiwo. ¹² Konso mon onkear aletshikinde ne nteang e vwi Zerses, ne mby e ngwon djum n'ipe, ne mby eyipwi onkean o nsiku e vwi djwi na ankear; ne ntangu enagn, ayogikiwo n'oshin owo. Ngwon isom iyikiwo, waledziy vir amira, mby ngwonisom imuu waledziy (aromates) ti ananagn a nsuu eledziyike ankear ankeankum. ¹³ Wog enagn, konso osig onkear aletshikinde etay eli vwi, mby yug atilim ne evuru ankear djwi na ntsa evuru e vwi, wwosiangi avey vim enkeankum esileang nde. ¹⁴ Osig asitsa nde epiyekwo, akey mpimpign enagn ne suka, aleg ne evuru ozole eli ankear neti, wur elir mpiog eli Shaashgazwur otshia e vwi, etsandir wamakangu i vwi. Kog apafikea etay eli vwi ve, ko yug vwi ativea mfunu ende, mby ovii nde ne dzin inde. ¹⁵ Opeane, ntangu efwete ntsa Ester etay e vwi etikum, nde mon e Abikail, mpiy e Mardoshe wur eyowungi kamsi mon nde, alingikinde ko asig amison Hege, wur otshia e vwi etsandir ankear anagn. Ester aviyikinde ngrasia ne nteang e vear ankeankum ayoyenike. ¹⁶ Wavara Ester etay eli vwi Zerses, n'evuru ende vwi, ne ngwon djum, eli mpi ngwon e Tebet, ne mvwe ishambia eli nde n'ekub ende. ¹⁷ Vwi aleang nde Ester oshin omog elenga ankear amuu ankeankum, mby s'aviy nde ngrasia ne nteang ende elenga asig ankear amuu anagn ankeankum. Ayab impu ekub e vwi ne dzug inde ote, s'akum nde wear e vwi n'ondii o Vatshi. ¹⁸ Vwi akie okina oninen, apea oliu ya ankum aline mby ende, ti ya vear ande otshia, djwi na Ester; eshuu ewo vear wayor, wakie otshia ve ne wantn inkeankum, na nkab inde, apea wavim eshin n'eshin ya vear. ¹⁹ Mbala ozole emikeawo ntsug asig ankear ondii omog, Mardoshe ayiwo atigneme ne nteang epfug e vwi. ²⁰ Ester akab ata oshin eyowur wo ve, ata otuba onde mpi ve, djwi Mardoshe opum nde na nkab, ayug ko vii atuba Mardoshe kamsi ko ntangu eyikinde ko n'evuru ewo. ²¹ Ko ne ntangu enagn, ntangu eli Mardoshe atigneme ne mbwung opeang o vwi, Bigtan ti Teresh, vear ape amidjag okwongo, atsankie etay e vwi, wapur ko nginu ipwo djwi na ntshung vwi Zerses. ²² Mardoshe ajia vii awo, mby akaba Ester, wear e vwi, nde mpi akeankaba vwi otuba o Mardoshe. ²³ Ntangu emilana wo vii awo, wayen eli djwi-djwi, s'aler wo vear ape anagn n'oshung, wadjag. vii anagn mpi afugn wo n'enkean e wavwi, ne nteang e vwi.