¹ Kansi jia ngean: ne nshuu i nsuka, ntangu i mpay ayayiawo. ² Djwi vear ayalirakawo k'ikab iwo wemie, ayaleangakawo k'ekri, ayaleangakawo lokumu na lulendo, ayatweakawo vii a Nzeam, ³ ayakum wo itura biu ya atea ti amea awo, wapayakugaka nkana wuo imakiewo ve, wapayaleangaka ngyug vii a Nzeam ve. ⁴ Ayayiawo itura biu, ayakwon wo ngy, ayabeamakawo vear vii, ayayiawo vear a nkier, mbeni i vear a wuo. Ayasarakawo vii a vear, ayayiawo vear ineang mpi amiyuo na lulendo, vear aleang osiang o djuung iwo kansi apileang Nzeam ve. ⁵ Ayayenakawo kamsi vear asama kansi wali vear atun njia biu o bisamu. Naam ya vear anagn. ⁶ Ne kati ewo, eli n'amuu aleshwi ne mvuru mpi walekir ankear itura pupu amiyuo na masumu ti na mpuy i vim eshin n'eshin. ⁷ Ankear awo walezig ntangu enkum, kansi wapikug na njia masonga ve. ⁸ Oshin o Janesi ti Jambresi eyitsug wo esiy wa Moize, oshin omog mpi walong oyang anagn waletsug esign na masonga. Wali vear ali ontwong omibia mpi vear amifangawo ne vii alir lukwikilu. ⁹ Kansi wapafitsa nteang ve. Djwi ibuma iwo ayapwe wo ne viy a vear ankum, oshin oyiyen wo ifara ampeam ape anagn. ¹⁰ Kansi djwi na yie, alaniyie along ame wuo, alaniyie epier eme, vii alingikime nkie, lukwikilu eme, olwi o mpay ime, lutondo eyikime na wo, oshin ojikime nkwung, ¹¹ mbangika iyimpikiwo, mpay mpi vii ankum ayiyen me ne Antioshi, ne Ikoni ti ne Listra. Oshin o mpay nge ekayenme? Kansi Nkum amvuginde ne mpay inkum inagn. ¹² Djwi, vear ankum aling nzinga wuo na Yezu Kristu, ayapeawo mpay. ¹³ Kansi vear apwo, vear oyang, ayatsawo ko nteang n'ipwo iwo. Ayavidisakawo vear amuu mbug. Wo wemie ko ayajing wo mbug. ¹⁴ Kansi djwi na yie, satsuga ko ne vii ayizig yie mpi ayikwikili yie penza. Ojia ya nagn eyizig yie vii awo. ¹⁵ Yum k'olieng oyie, ojia masonama masantu. Onkean osantu onagn asikug wo n'ontsug yie okum na waagn na mvug ne lukwikilu ya Yezu Kristu. ¹⁶ Onkean o Nzeam onkum afugn wo na biu o Nzeam. Onkean owo oli mfunu djwi na ndong, djwi na mvara vear na ndjir, djwi na nkeara ne mbug, mpi djwi na mvara ne masonga. ¹⁷ Ene djwi wur e Nzeam ayii wur eli ngikug ne vii ankum, wur emiwong wo djwi n'otshia enkum e wuo.