¹ Ndopea onkwon oninen ene ne nteang e Nzeam ti e Yezu Kristu, ndug eyayia mbag ewu e vear azinga ti vear amiwa, mpi ne dzin eshuu eyayiande mpi ne dzin ekub ende: ² long otuba o Nzeam. Tsug inaagn na ndong, eyii n'ondii o wuo to n'ondii opwo. Tomboka, ngnianga, pea ilag na malembe ne ntangu elong yie. ³ Djwi, ayayiawo na ntangu emuu eli vear wapafikug ngyug along a wuo, kansi ayapur wo djwi na wo wemie vear along vii akug na mpuy iwo wemie. Ayayugakawo ikuy n'atii awo. ⁴ Ayadzubakawo atii djwi wakwon ngyuk masonga, mpi ayangamakawo atii djwi na ngyug itsig. ⁵ Kansi yie, yia biu ne vii ankum. Tshung etura ne ntangu e mpay, kie otshia o wur elong otuba o Nzeam, kie wuo otshia eyopiwo. ⁶ Djwi na me, ntiyilama djwi na ngama etura mpe na ntshag alung ame. Ntangu eme e nkien etikug. ⁷ Milwa mbaagn iwuo, ntishira iveang ime; ntiwum lukwikilu. ⁸ Yum eshuu e lwo, ifutu ime i masonga wamingwuma, Nkum ali Zuzi e masonga, ayampeande eshuu ewo, epa ko ya me memie ve, kansi mpi ya vear ankum amileang eshuu ende enagn eyakeande. ⁹ Ekug oye eveang etay eme. ¹⁰ Djwi, Demasi amindur. Atikum na ngaagn e vii okiri one mpi amitsa Tesalonika. Kresensi amitsa Galatia, Tito mpi amitsa Dalmatia. ¹¹ Ko Luka ndemie wur eli nda me nendien. Vey Malako yag ya nde djwi ali mfunu entsign djwi n'otshia ome. ¹² Ntitum Tishiki n'Efeso. ¹³ Ntangu eyayiayie, omvari kazag e mpio eyisamisugna Troasi n'evuru e Karpusi. Vara mpi enkean ti mpuy itsamfugn wo na wo (parseme). ¹⁴ Alezandre, wur etsankwor nkugn, aminkie ipwo entsign. Nkum ayopeande ifutu ikug n'otshia onde. ¹⁵ Yie ko osug ya nde, djwi atsugikinde esiy biu n'along asu. ¹⁶ Mbala e nteang ntangu eyisamikime ne tuminar, kaku wur eyindani ve, wankum andur wo. Ipwo ikwon ngya ya wo. ¹⁷ Eli Nkum wur eyii mbeama na me mpi wur eyimpii biu, djwi along apwi n'odzum ome mpi empaagn enkum wayug. Mby s'avug me n'odzum o ntamu. ¹⁸ Nkum ayavugande n'etshia epwo enkum mpi ayamvuga nde djwi anshwer n'ekub ende e dzug. Nkembo eyi ya nde mvwe na mvwe. Amen. ¹⁹ Pea mbea ya Prisila, ya Akilasi, mbea ti n'evuru Onezifore. ²⁰ Erasite amisatsiga ne Kolinto, asamisugn Trofime na nkeang ne Mileti. ²¹ Kie biu oye nteang e nsungi e mpio. Ebulusi atotuma mbea, Pudensi, Linusi, Klodia ti atwung amuu ankum walopea mpi mbea. ²² Seanga Nkum ayii nda mpeve eyie! Ngrasia eyii ya yie!