¹ Yie mon me, yia biu na ngrasia eli ya Yezu Kristu. ² Vii ayiyug yie ya me ne nteang e wantiegn entsign, kab wog ya vear a wuo asikug ndong mpi vear amuu. ³ Yen mpay mbug emog ya me kamsi iyer nkuu iwuo i Yezu Kristu. ⁴ Kaku iyer-nkuu emog ve eli, yug aling mpea kiese ya nkum eyovey n'otshia, asikug nsasianga otshia onde iyer-nkuu djwi na nsakie etshia ende emuu. ⁵ Ata vear atsankim aveang, kaku esipeawo ifutu ve yug akavey iveang ve oshin ekug ne nsiku iveang inagn. ⁶ Ekug wuo wur eleyen mpay na mfuy ivur ayi wur enteang endima vim amimen. ⁷ Ling njia djwi iling me ntuba, djwi Nkum asopeande waagn onjia vii ankum. ⁸ Kana Yezu Kristu eyipwi n'okuo o Davidi, eyifutumuki n'ewa, oshin oyolongagnime, ⁹ wur eleyen me mpay djwi na nde mpi djwi na nde s'elime ngitshung kamsi wur ipwo emidjag wur. Kansi otuba o Nzeam watotshung ve. ¹⁰ Wog enagn, mpay inkum ileyen me djwi na vear amison Nzeam, djwi wo mpi wavii evug eli ya Yezu Kristu na nkembo e mvwe na mvwe. ¹¹ Otuba one oli vi-a-vii: "Yug simiwa ti nde, asizingasu mpi ti nde. ¹² Yug simitsug inaagn, su mpi asiyalasu ti nde. Yug simotun, nde mpi ayatetun nde. ¹³ Yug su atsasu mfanga lukwikilu, nde apitsu nsongo otuba onde ve, djwi apikug nkeantun nde ndemie ve." ¹⁴ Kanaka vii ane mpi tubaka ne nteang e Nzeam waseangi ashia djwi na vii alir wangogo. Djwi ashia anagn aletum vear ayug ku n'ewa. ¹⁵ Kie biu na mpwe ne nteang e Nzeam kamsi wur emiyen mpay entsing, kamsi wur otshia epikug ngyug nsogn ve, kamsi wur elong otuba o masonga o Nzeam na waagn. ¹⁶ Luraka itubatuba i mpama mpama mpi i wa empaagn djwi vear alekii ngwign walelegi ko nshwe n'ipwo. ¹⁷ Otuba owo ayakeawo nda djuung iwo kamsi mpur emitsug imfuya. Himene nda Filetusi wali ne kati e vear anagn. ¹⁸ Wali vear amipea masonga okwongo. Walekab wuwun lufutumuku e vear emisalama ntama. Waletshimi lukwikilu e vear amuu. ¹⁹ Kansi itsin evuru ibiu iyitsug Nzeam imisatsiga. Itsin iwo ili otuba one: "Nkum ajia vear ande" mpi "Wur enkum edzima dzin i Nkum asiangi na nkie vii apwo." ²⁰ N'evuru eninen, epitsungya ko n'alongo a wolo ti ampalata ve. Aliwo n'alongo amuu ayikiwo n'eshung ti imuu iykiwo na buu. Mpugu to along amuu ili imbalu kansi imuu ili itsawo nsadila ntshuu inkum mpama mpama. ²¹ Yug wur atiwum djuung inde wuo, atishwiy ndemie mbiin inde, asikum nde ilongo i mbalu, imitshima wo santu. Watison wog mpi etikum mfunu djwi na Nkum ende, mpi watoyirika djwi n'otshia onkum owuo. ²² Lur wampuy olieng mpi ling masonga, lukwikilu, lutondo ti ngemba ya vear ankum atsanding Nzeam n'etura e wuo. ²³ Kansi tun vii a isiy i mpama ipea mfunu. Ofwete njia yiyen isiy iwo atsawongwur k'ashia. ²⁴ Wur otshia e Nzeam apikug nshia ve. Kansi afwete ngya wur eleang vear ankum, wur ekug ndong mpi wur ejia nkwung. ²⁵ Afwete nkeara na malembe wambeni inde ne mbug e wuo. Mbala emuu Nzeam ayapeande ndolula ya wambeni inagn djwi wajii masonga. ²⁶ Mby ntangu eyakea waagn ewo, ayalim wo n'ilung eyapigi satana eyatshung djwi wakike luzolo ende.