¹ Soniga gwena wanzio wu dibundu di Efezo: « Dala gi hosa yo usenda mioda sambwadi mu gogu dienzi digi dada. Yeyi ugwendanga agadji ga yidji ya silanga minda. ² " Ngisi kisalu gio giu ga sadidi, gigola ye luguigilu diayi ye gu gonda mudjima. Ngisi mbi ayi mugu lolula awo agusalanga gu biya . Ngisi mbi ayi mugu lesa awo agu yasa mbi ena a longi agigidi lo wowu ena, ena apala. ³ Ngisi mbi ayi wu vibidila ngolu udala pasi zingi mu mwila kumbu yami lo uga hedidi. Dala mi lo giena kiesi gu wena yi ayi wu gadula luzolu wayi lu tegu. ⁴ Yindula tegu ayigi luzolu lwayi lu ga bwa. zaba manunga mayi nga ma gagedi mategu. ⁵ Mbi lo uzola, migesa gu gadula gima giayi awo wo gusanga minda. ⁶ Mu giogio ngisi mahanga mayi: Ayi lo wugu zola gi gusala a Nikolayiti ami gega lo igu zola. Asi yo yena ye madwi efi gi wosa muhunga wu santu mu mabundu. ⁷ Asi yo wu gabinga, yigamu wa nswa mugu dia mu ndondu mu woni wena mu paladisi du Nzambi".» ⁸ Soniga gwena wanzio wu dibundu di simirme: «Dala asi yo wena wutegu aguikala wu nzuga, ayo wu gofa aga kala ye moni. Ngisi pasi Ziayi yi, ye wu mbwa wayi (haa wena mvuama); ⁹ ngisi gia gu sawula gwena awo agu wosanga mbi yena Ayuda ( Lo gega ena wo, ye ena mu gimvuga mu nzu yi sadani). ¹⁰ lo gudjina pasi ziba gudu mena. Dala, Sadani ena heyi heyi mugu gamba hadu ega mu bologu anu maga lufuda luga dala pasi ma fugu gumi. Kalenu lemvu ti nsuga lu fwa miga nuwa gifumu gi moni. ¹¹ Osi mudu yo wena ye madwi efi agio gihosa muhunga wu santu gu mabundu. Osi yo ulanda lo aga kala ye pasi zi lu fwa si mbalu ziadi.» ¹² Soniga gu wanzio wu dibundu di Pergami: « Dala iwosa ayo wena ye pogu zi kabu ziadi:" ¹³ Ngisi ago gugu kala ayi, gogo gwena gi fumu gi Sadani, Ayi wugu geba pimbu pimbu kumbu yami, ngisi mbi ayi lo gu zaba luguigilu lwayi gwena ami si matangu diaga zidi mbangi wami Antiposi agadji gwena gogo gugu zinga Sadani. ¹⁴ Ngiena, ye pandji yi gulesa gwena yeyi: Ayi wena agadji ga hadu agu gwila ngolu malongi ma Balami, wu gu longa ma Balaki mu gomba mani gu muzagisa gwena ana a Saledi, mu mwila adi madia malamba ye akida mu mwila mu gumbila mani di guzagisa gwena ana Esaledi, mu mwila nga adi madia ma makida magu hananga wungungu. ¹⁵ Mpila imosi, gwena ye hadu magadji dienu aga luhana ngolu mu mugelu wa Nikolayidi. ¹⁶ Soba manunga mbilo miya gusa gumilu ye mi gunuanisa ti pogu yigu duga mu ganu diami. ¹⁷ Osi mudu yo wena ye madwi efi gio gu hasa muhunga usantu gu mabundu. Osi yo wununga, yiga muwa gidjini gi madia maginsuegi ye mani mapembi dia ga sonoga zina di mpa diga gonda gwidji yagana diodio diaga soniga zina di mpa digesiyagagana gwena mudu yo ugusenda."» ¹⁸ Soniga gwena wanzio wu Hyatiri:« Dala ndaga yi muna Nzambi wena mesu nga twiya ye milu nga mani dipembi: ¹⁹ Ngisi mahanga mayi ye luzolu lwayi ye mudjima wayi ye isalu yayi ye gu gonda mudjima. Ngisi mbi isalu yayi impa yi hida isalu yayi itegu. ²⁰ Mu mwila gio, ingana gigi: Wegila mugonusa Yezabel wuba gu hosa mbi hena mbigudi mu malongi mendi, ena mugu fuda alongogi ami mugu sala wungungu ye mu gudia madia masala ye akida. ²¹ Yi muwedi dangu mu mwila alumuni manunga agio yeyi lo aba gulesa luzolu lugwalumuna manunga ma wungungu wendji. ²² Dala, ya gumumbila gu lagu di makashi ye yi hadu wo gusala wungungu ye yeyi, ya gumu wa pasi zingi mbi alumuna manunga ma pandji mugu sala. ²³ Ya guziya ana hendi wowu akima ye ma nzu ma Nzambi mendi magesiya mbi ngiena yoyo wu guisiya manunga ye mi djima. Yiga gindigisa gwena osi mudu lufudu lu isalu yendi. ²⁴ Mu mwila hadu ega ena gu Thyatiri, awo agu gonda gulanda mu malongi, mo ye lo esi gwena awo agu lendjiganga hima yi ngolu yi Sadani, gwena nu ihosa: « lo ya gunuwa dumbu diega;» ²⁵ Mu mapadji mega, anu gandenu mudjima ti gogu gu guyigesa ²⁶ Gwena yo wu ganunga yoyo wu gusala ayo yiga sala ti gu nsuka, yiga muwa gifumu gi gifudji gi kima. ²⁷ Maga yala ye muhangu wugi fumu wu gibende; aga ziya mutini tini nga bungu di manu. ²⁸ Giogio yiga senda gwena da wami, yiga muwa gigeledi mioda wu kela. ²⁹ Osi wena ye madwi yefi gio gi hosa mu mudimu wu santu gu mabundu.»