¹ Ha gugakedi ye mudu umosi mu gadji gi Afadisayi kumbu yenzi, Nikodemi, agakedi fumu wa Azwifi, ² Yeyi agesidi mu piba gwena Yisu, ye dia mwambila: labuni, adu dwisi mbi ayi wena mbuda wa minganga aduga gwena Nzambi; mu mwila lo gwena ye mudu ufana gusala imangu ayo yugisalanga yi, mbi Nzambi lo ena ye yeyi. ³ Yisu dia hosa:mu gigidi, mu gigidi ami iba gugwambila, mbi mudu lo avaluga mbalu hiye hiye, yeyi lo agadala gifumu gi Nzambi. ⁴ Nikodemi dia mwambila: kiyo mudu afana guvaluga mbalu yi mbadi, mu dangu diena mbuda? Yeyi afana gugidjiga mu tulu yi madji ye uvaluga mbalu yimbadi? ⁵ Yisu dia mu gidjigisila mbi:mu gigidi, mu gigidi, ami igu gwambila, mbi mudu lo abuduga mu mema ye mu muhunga, yeyi lo afana gwigila gu gifumu gi Nzambi. ⁶ Ayo ivaluga mu musuni yena musuni, ye ayo ivaluga mu muhunga yena muhunga. ⁷ Gwibugila lo mbi ami migo gwambididi: Gufana mbi ayi uvalugi mbalu yi mbadi. ⁸ Muhunga ugwendanga ochi go gu uzola, ye ayi mu gwifanga lubu; ha lo ugwisiya kwiyo uduga, ye kwiyo uba gwenda.Gwena mbandu yi mosi, gwena mudu yo uvaluga mu gimpeve. ⁹ Nikodemi dia mwambila: kiyo mambu mo mafana gusalamana? ¹⁰ Yisu dia mu gidjigisila mbi: ayi wena mbuda wu hadu andungi wu Isaledi, ye ayi lo wisi mapanzi ma! ¹¹ Mu gagidi, mu gagidi, ami igugwambila, adu dugu hosanga momo me dwisi, ye adu munu guda gimbangi mu mambu mo me dugadadidi; ye anu lo lugayambidi gimbangi giedu. ¹² Mbi anu lo nugwigila mu dangu di ganwambididi mapanzi ma manu, kiyo anu nuga gwigila mu dangu di ganwambila mapanzi ma wulu? ¹³ Lo gwena ye mudu ugenda gu wulu, mbi lo gwena ayo ugadugidi gu wulu, mwana u mudu yu wena gu wulu. ¹⁴ Ye nga giga zangudidi Mose nioga wu ibende mu demu di gonda gima, gufana giogo mbi mwana mudu maga zanguga gu wulu, ¹⁵ Mu mpila mbi hochi yo uga gwigila mwena yeyi, akadi ye moni u mvila ye mvula. ¹⁶ Mu mwila mbi Nzambi aga zodidi gwingi sila gifudji, dia gadumisidi mwana wenzi umosi, kaka mu mpila mbi hochi yo uga gwigila mwena yeyi, agodji gufwa,ha asedji moni u mvula ye mvula. ¹⁷ Nzambi mu mbuga yoyo, lo aga dumisidi mwana wedji mu gifudji mu mwila gwisa gusambisa gifudji, ha mu mwila mbi gifudji gi hulugi mwena yeyi. ¹⁸ Ayo uga gwigila mwena yeyi, lo aga samba; ha ayo uga gonda gugwigila, ena uwa gusa mbisamana tama, mu mwila yeyi lo aga gwigididi gwena mwana umochi u Nzambi. ¹⁹ Ye mifundu mio, miena mu mwila mwinda mu gesidi mu gifudji, hadu aga sebididi ye piba gu hida mwinda, mu mwila isalu yowu yi gakedi yibi. ²⁰ Mu mwila ayo uba gusala gubuya uga menga mwinda, ye owu lo agu pusananga gwena mwinda, mu mpila mbi isalu yowu ugadji guduga mu wangala; ²¹ Ha ayo uba gusala gigidi ena mu mwinda, mu mpila mbi isalu yenzi idugi mu wangala, mu mwila aga salamanini gwena Nzambi. ²² Gunima, Yisu ye alongogi enzi dia gedi gu gifudji Yudeya; ye ago magasadidi mafugu gakaga ye owu ,ye ma bodjiganga. ²³ Zwani kega ma bodjiganga gu Eno, heyi heyi ye Salimi, mu mwila ago gugakedi ye mema mengi; ye esanga gusenda mbodjiga gogo. ²⁴ Mu mwila aho Zwani agakedi tegu lo gumusa mu bologu. ²⁵ Mu gio gu sambu di alongogi a Zwani gugakedi ye miaga migola ye zwifi umosi uhosanga mapanzi ma gofuga. ²⁶ Owu dia gesidi gwena Zwani, ye dia mwambila: Labuni, mudu yo ukedi ye ayi aguna gu Yoludani, ye ayo uhanini yi gimbangi, dala yeyi kega munu gubodjiga, ye hadu akima ena mugwenda gwena yeyi. ²⁷ Zwani dia agidjigisila mbi: mudu afana guyamba kaka gima gio gia ga muwedi gu wulu. ²⁸ Anu beni nwena ambangi ami mu yo yiga hosidi mi: mbi ami lo giena Klistu, ha ma gatumi gomi gumesu medji. ²⁹ Ayo wena mweni mugasi,ena mulumi mugusuna yo;ha mbayi u mulumi, ayo udumbamana ho ye uba gumumena, agukala mu kiesi mu ndaga yi mulumi wenzi; ye kiesi gio, giena mu mwila mi kega, giena gi pimbu. ³⁰ Gufana gwena yeyi agudi ye ami idi gulumuni. ³¹ Mudu yo uduga gu wulu,ena awulu di mudu mukima, ayo wena mu manu ena kaga umanu, ye agu hosanga nga manu. Ayo iguduganga gu wulu yena awulu di ikima, ³² Yeyi maga hanini gimbangi mu yo ya gadadidi ye ya gefidi, ye lo gwena ye mudu ugefidi gimbangi gienzi. ³³ Ayo uga yambidi gimbangi gienzi maga gwigididi mbi Nzambi ena pimbu; ³⁴ Mu mwila ayo mudu yo uga dumini Nzambi agu hosanga mapanzi ma Nzambi, mu mwila Nzambi lo aga muwedi muhunga mu gidesu. ³⁵ Dada aguzolanga mwana ye maga muwedi yima yikima gu miogu mienzi. ³⁶ Ayo uyamba mwana ena ye moni u mvula ye mvula; ayo ugonda gu gwigila gwena mwana lo agadala luzingu lu mvula ye mvula, ha kabu zi Nzambi zigakala awulu mudu wenzi.