¹ Gunima di mafugu masadu, gugakedi ye kinzi gu Kana mu manu ma Ngadidi. Maya u Yisu magakedi ho, ² Ye Yisu maga muledjigadi kega mu kinzi yo ye alongogi enzi. ³ Magana di magonda, maya u Yisu dia mwambila: owu lo ena ye magana. ⁴ Yisu dia mugidjigisila mbi: mugusuna yu, yigi ayi ye ami? Dangu diami tegu lo guguga. ⁵ Maya wenzi dia mbila alongogi enzi mbi: nga lusadi yikima yo ya gu nwambila. ⁶ Gisi, gugakedi ho ye makalu masambanu ma mabungu, magakedi mu mwila a Zwifi buna, magakedi mu gidesu gi ma mizidi miadi mbi lo misadu. ⁷ Yisu dia ambila: zesenu mabungu ma ye mema. Ye owu dia gamazesidi mu mema de guganu. ⁸ Yeyi dia ambila mbi dayenu mema, ye dwalenu gwena mieni kinzi. Ye owu dia gadwadi. ⁹ Dangu di mega mieni kinzi, mema magumini magana, lo esiyanga gwiyo magadugidi, mu mwila hadu agambanga madia, owu agadeyidi mema, mesiyanga pimbu, ye dia galenzigidi mulumi beni, ¹⁰ Ye dia mwambila: hadu akima aguhana tegu magana mapimbu, gunima amo mabi magwisanga gunima di gulawuga; ayi uswegidi magana mapimbu de didi. ¹¹ Yigasalamanini giogo gu Ganana,mu manu ma Ngadidi, imangu itegu igasadidi Yisu. Yeyi agalesidi ngolu zienzi, ye alongogi enzi dia gagwigididi mwena yeyi. ¹² Gunima di mambu mo, yeyi dia gedi gu Kapedinawumu, ye madji, ye apangi zienzi amala ye alongogi enzi, ye owu agakedi go mafugu gandambu. ¹³ Kinzi yi pagi yi Azwifi yi gakedi heyi heyi,ye Yisu dia gedi gu Yelusalemi. ¹⁴ Yeyi dia gedi gubaga adegi a ngombi, amamema ye mayembi, ye hadu asengisanga pada munu gudega munzu i Nzambi. ¹⁵ Yeyi dia gahidigidi fimbu ye misinga, yeyi dia hangidi akima munzu yi Nzambi, ye mamema, ye angombi,yeyi dia vudugisa pada yowu, ye gubogula ma mesa mowu; ¹⁶ Ye yeyi dia gambididi hadu adeganga mayembi: gadugenu ha, lo nufana gugumisa nzu yi dada wami zandu. ¹⁷ Alongogi enzi dia ganungidi amo maga sonigidi:giesi gi nzu yayi gimbebisa mi. ¹⁸ Azwifi dia senda ndaga, ye dia hosa: imangu yigi ayi uzola gudulesa, mu mwila gusala makima magifa gi? ¹⁹ Yisu dia aginzigisila mbi: bubulenu nzu yi, ye gunima di mafugu masadu ami miya gwidunga. ²⁰ Azwifi dia hosa: gufana midjiga magumi mawana ye misambanu mu gudunga nzu yi, ye ayi, wi idungi mu mafugu masadu! ²¹ Ha yeyi ahosanga mu nzu yi mwila wenzi. ²² Mu giogo,mu dangu dia gafudumugidi mu lufwa, alongogi enzi dia gebugidi panzi yo, ye owu dia gagwigididi mu isoni ye mu ndaga yi gahosidi Yisu. ²³ Mu dangu di gakedi Yisu gu Yelusalemi,mu kinzi yi pagi, hadu engi maga gwigididi mu kumbu yenzi,dia gadadidi imangu ya salanga. ²⁴ Ha Yisu lo a efanga woma mu mwila ma esiyanga akima ye manunga mowu, ²⁵ Ye mu mwila yeyi lo agakedi ye pwisa yi gumu hanina gimbangi si gi mudu umosi; mu mwila yeyi magesiyiyi ayo yi gakedi mwena mudu.