¹ Mu mwila gio,gwega mapanzi ma ndaga yiYisu Klistu,gupusana mu yo yena gagidi,mbi lo dusilu lula gibaga awulu gibaga giluyanzigu mu gwega isalu yi gudwalanga mu Lufwa, ² Mu lugwigilu gwena Nzambi,mu gulanda gusina mu mpila yigu bodamana,yigu biega,yi lufudumugu diafwa,ye mu lufundusu lugonda nsuga. ³ Gwena giogio,gidu gasalanga,mbi Nzambi uzola ⁴ Mu mwila gwena pashi mbi aho agakedi mu mwani,aho aga megidi makabu wa gifumu giwulu,aho agakedi ye gabuu mu mbuga yi muhunga wu vedila, ⁵ Aho agamengidi ndaga yi pimbu yi Nzambi ye ngolu zi miziga migesa. ⁶ Ye aho aga bwidi,akadi kega awa guzangu luga ye mu gwenda mu gwalumuna muzima,mu mwila owu mu gusilulula mwana Nzambi awulu nkulusi ye mugu mudega mu mapanzi masoni. ⁷ Mu dangu dizala manu ye mvula ineni ayo inonganga dangu dikima mu momu,ye mowu mavala midondu mi mfunu gwena hadu aga migunini,yeyi agukalanga mu gadji ga lusagumunu lu Nzambi; ⁸ Ha mbi mowu uvala ngangu ye mudondu wu magasa mangangu,wowu ufana gwisiya gana ye mugu kala mu ihongu,ye nsuga yi wowu guga lombuga mu guwusa gu twiya. ⁹ Adu duba guhosa gio gwena yo gonzi,pangi wu muzima,uba gudwifa,mu yo inudadila anu,mapanzi mapimbu ye mamfunu ma lugulusu. ¹⁰ Mu mwila Nzambi lo ena gadongu,mu mwila mugu bila gisalu gienu ye luzolu alo lunu galesidi mu kumbu yenzi,lunu sadi sanga ye lunu gusadisanga isalu gwena asantu. ¹¹ Adu dununga umoshi ye umoshi mu gadji dienu ufana gulesa gikesa mu mwila gugieba de gusuga minu mi migola. ¹² Mu mpila mbi anu lo nufana giega,ye anu nufana gulanda aho agu,mu lugwigilu ye mugu gandamana,mugu yamba mapanzi maga ganisa Nzambi. ¹³ Mu dangu,Nzambi diaga lesidi magani menzi gwena Abalayama,mu gugonda gudia ndefu,yihida gugola sila yeyi,yeyi magadidi ndefu mu kumbu yenzi beni, ¹⁴ Ye dia hosa:Mu gagidi ami migo sagumuna ye miga zesa giganda giayi. ¹⁵ Ye gwena giogio Abalayami,aga ganzidi muzima,mugu yamba mapanzi makima maga mugani sidi Nzambi. ¹⁶ Mu gio hadu agudia ndefu mu kumbu yi mudu yo wahida mu gimbuda,gulapa ndayi gwena gudia ndefu mu gusugisa idimba yikima. ¹⁷ Mu mwila gio,Nzambi aga zodidi gulesa ye gagidi gakima gwena ana agagidi ama gani ma Nzambi luzolu lu gimbingu gienzi,lugesidi mu gudia ndefu, ¹⁸ Mu mpila mbi,mu mbuga yi yima yadi yi luzolu,muyo yena pashi mbi Nzambi adifudji,adu mudu dadidi mudu uhida ngolu,adu,guga kedi gihani giedu gidufana gidjinina,mu guganda mana ye minu miedu mu mpila yaga dwambididi banda tama. ¹⁹ Minu mio,adu dumi kwenzi nga dwima du moni,duga gidi ye dugola;yoyi igwingilanga de gumasina. ²⁰ Gihani gikima gigengididi Yisu mu mwila wedu nga mudu yo ugubulanga mbuga,yeyi amoniganga mbuda wa nganga Nzambi wu dangu dikima,nga gigakedi luve lu Melishisedeki.