¹ Mu gio nga gingiena mudu u bologu di Yisu,ami ngiena mugu nwambila mu gusenda gikesa mugu niada mu mpila yi pimbu mu ludumu lo lunu galenzi gamanini. ² Anu nuzingi ye gudi gulumuna,ye pwede,ye muzima udadi.Digiebenu yenu ye yenu mu luzolu. ³ Anu nusadi mu mpila mbi nu zingi mu umosi mu mbuga yi mpeve mu gimbayi gi pwede. ⁴ Gwena ye mwila umosi ye mpeve imosi,anu akima nga mu mpila yaga nulenzigidi mu ndaga imosi yaga nulenzigidi. ⁵ Ye gwena ye fumu umosi,ye lugwigilu lumosi,mbondjiga imosi, ⁶ Ye Nzambi umosi ye dada u mudu mukima.Yeyi awulu di mudu mukima,mu mbuga yedu akima ye mu ikima. ⁷ Gwena hosi mudu yo maga yambidi gabu diaga muwedi mu gidesu gi ngolu zi Yisu. ⁸ Nga giba guhosa isoni: "Mu dangu diaga ninini guwulu,yeyi diaga dwadidi hadu a bologu mu uhiga.Yeyi maga hanini magabu gwena hadu." ⁹ Yigi yena mbagudulu "yeyi maga gandugidi guwulu", mbilo yeyi kega maga gulu mugidi hasi? ¹⁰ Ayo uga gulu mugidi hasi ena mudu umosi yoyo uga gandugidi guwulu. Yeyi maga sadidi kega mu mwila guzesa yima ikima. ¹¹ Yisu maga gabidi magabu mu mpila yi:Antumwa,Ambigudi,Apanzi nsangu,Antwadisi ye Alongi. ¹² Yeyi aga sadidi gio mu mwila guzesa akwigisi mu gisalu gi gimvuga,mu mwila guhana ngolu mu mwila u Yisu. ¹³ Yeyi aba gusala gio ti gogo gudu gadula mu gukala mu gimvuga gimosi gi lugwigilu ye gwisiya mwana Nzambi.Yeyi aba gusala gio ti gogo gudu gaguma adu ambuda nga hoho aga dula mu gusa gidimbu gi Yisu gu mizima miowu. ¹⁴ Gwena giogio,mu mpila mbi adu dugonzi gukala nga ana dulengi.Gwena giogio mu mpila mbi adu dugonzi guniga gana mu gwenda gu mbilo hana.Gwena giogio mu mpila mbi adu dugonzi gwenda mu muhunga u malongi magifa ye gifa,mu hadu aneni aho ena ye ndungi zi mafulu ma upala. ¹⁵ Adu,dufana guhosanga gigidi mu luzolu ye gugulanga mu mampila makima gwena yo wena fumu,Klistu. ¹⁶ Klistu ena mugu gosa mila mikima mia kwigisi mu gimvuga.Yeyi uga gama mu gimvuga ayo mukima,mugugama,mu mpila mbi mwila ukima ugudi ye ukadi ngolu mu luzolu. ¹⁷ Mu gio,ami iba guhosa gi,ye gunu longa mu mwila Yisu:anu lo nufana gukala nga Amimpani aho agu hidanga mu mapanzi ma pamba pamba ma manunga mowu. ¹⁸ Owu ena ye manunga ma piba.Owu aguzonga gusenda mbandu yi luzingu yi Yisu mugu gonda gwisiya yigi iba guhida gwena owu mu mwila guganda gowu gu muzima. ¹⁹ Owu lo ena ata ye soni.Owu aga dihana mu gindumbu mu mahanga mabi,ma mpila ye mpila. ²⁰ Ha lo gwena gio,mbi anu munu gefidi munu guhosila Yisu. ²¹ Ami iba gufani gisa mbi maga nulongidi mu mwila yeyi,nga gagidi ga gena mu Yisu. ²² Anu nufana gugadula ayo yena mu mahanga menu magulu,mudu mugulu ayo ugu difudanga mu manunga ma upala; ²³ Mu mwila mugu kala mudu u hilama mana mu manunga magi mpeve. ²⁴ Vadenu mudu muhe muhe wena nga Nzambi,ayo uga dugidi mu masonga ye mu gimpeve mu gigidi. ²⁵ Mu gio kega,gadu genu mu mabi makima. "Hasangenu gagidi,hosi yo gwena pangi wenzi", mu mwila adu dwena yedu ye yedu. ²⁶ "Mbi anu nubwa mu kabu,gusala masumu lo." Guzola lo mbi dangu diziami anu mu kabu zio. ²⁷ Nuhanigu mbuga gwena diabulu. ²⁸ Ayo wembulanga mu dangu di agonzi gwimbula.Yeyi ufana mugusala.Yeyi ufana gusala mu mpila yi pimbu mu miogu mienzi,mu mpila mbi yeyi akadi ye mpila yigu gugabila mudu yo wena mfunu yi gima. ²⁹ Nugonzi gudusanga mapanzi mabi mu maganu menu.Mu gio,mapanzi mafana guduga mafana gukala mfunu mugu zesa yima yi funu,mugu sadisa aho agwifanga. ³⁰ Ye nugonzi guhedisa mpeve yi vedila yi Nzambi.Mu yenzi anu nugakedi ye gidimbu mu ufugu gugulu muga yenzi. ³¹ Anu nufana gugaduga mu muhanga mabi,lulendu,kabu,gunwana gana ye misingu,ye kega mapanzi makima ma misia. ³² Zingenu pimbu yenu ye yenu.Kalenu mizima duluu.Lolu lagana ngenu yenu ye yenu,nga gigadu lolu didi Nzambi mu mbuiga yi Yisu.