¹ Mu mwila gio,ami Polu,gwena mudu u bologu u Yisu Klistu mu anu adu agonda a Zwifi. ² Ami inunga mbi anu munu gayambidi giyega mu ngolu zi Nzambi ziaga pedi mu mwila nu. ³ Ami iba gusoniga gagidi ga gapedi Nzambi.Amo mena gagidi ga gazwama,gilesuga mbi ami iba gunuso nigila mu muganda wo umosi. ⁴ Mu dangu dinu gadanga,anu nufana gwisiya manuga mami muyo idadila gagidi ga gaswama mu mwila Yisu Klistu. ⁵ Mu ibuga imosi,gagidi go lo ga gakedi ga gubangula gwena ana hadu.Ha mu dangu di,gogu mu gakedi ga gubangula mu mpeve gwena Antumwa ye gwena Ambigudi aho ena ye giyega. ⁶ Gagidi go gagaswama gena hadu o agonda a Zwifi ena lo ena ana aguvala ye ena hadu alugalu mu muwundu mowu mu mila.Owu lo ena mu gadji ga ga malaka ma Yisu Klistu mu buga yi ndaga yi Nzambi. ⁷ Mu mwila ami iga guma musadi wu ndaga yi Nzambi mu gabu ngolu zi Nzambi ziga pana manini mu mbuga yi ngolu zigu nigisanga. ⁸ Nzambi maga pedi gabu dio,ata giogio gi ngiena mwana galengi sila mu gadji ga o agasa mu lugalu mu Nzambi.Gabu dio diena mbi ami ifana gudendula gwena o agonda a Zwifi ndaga yi umvama uneni yi Yisu Klistu. ⁹ Ami ifana gugegisa gifudji gimundu mu yo yena magani ma ginswegi gi Nzambi.Ayo yena magani magakedi mu ginswegi gwena ambuda edu aga hida mu Nzambi,ayo ugasadidi yima yikima. ¹⁰ Ayo igakedi giogio,mu mwila mbi dangu di,mu gadji ga nzu yi Nzambi,adwadisi ye afumu mu ihani yi mawulu agesa mu mwila gwisiya mapanzi mengi mu gifudji ma ndungi zi Nzambi. ¹¹ Momu maga dula nga giena magani ma Nzambi,yeyi maga magu gisidi mu mbuga yi mwana wenzi Klistu Yisu fumu wedu. ¹² Mu mwila mu mbuga yi Klistu adu dwena ye ngolu ye mbuga ye zola mu mbuga yi lugwigilu diedu mu gadji dienzi. ¹³ Mu mpila yo ayi gukala lo mudu uhela mu mbuga yi minianga miami mu mwila nu.Mapanzi ma mena migembu mienu. ¹⁴ Mu mwila gio,ami ifugamana mu mabongu mami gumesu ma dawa, ¹⁵ Gwena yo wena mbi iganda yikima guwulu ye mu manu yena te makumbu. ¹⁶ Ami iba gusambila mbi yoyi idu hanama nini,mu mbuga yi gimvama yi migembu mienzi,dukadi ye ngolu,mu ngolu mu mbuga yi mpeve yenzi yena mu gadji dienu. ¹⁷ Ami iba gulomba Yisu Klistu azingi mu mizima wenu mu lugwigilu.Ami iba gulomba mbi anu nusi migasi ye nukadi mu gadji ga luzolu lwenzi. ¹⁸ Anu nufana gukala mu gadji ga zola dienzi,mu mwila mbi anu nwisiyi,mu mbuga yi mosi ye akwigisi akima,udjini wena yigi,udadi wena yigi,udadi wena yigi ye udjinga wena yigi mu luzolu lu Yisu Klistu. ¹⁹ Ami iba gulomba mbi anu nwisiyi uneni ye luzolu lu Yisu,alo luhida gwisiya gana gukima.Anu nufana gusala gio,mu mwila anu nuzadi ye mapanzi ma Nzambi. ²⁰ Adi,gwena yo wena gikesa gi gusala yima yikima,yineni awulu di yo yidu bagulomba ye yoyo yidu bagununga,mu mbuga zi ngolu zienzi azio ziba gusala mu gadji diedu. ²¹ Mwena yeyi gukadi madodji mu gadji ga nzu yi Nzambi ye mu gadji ga Yisu Klistu,mu ibuga yikima yi hadu banda mwanonu ti gogo.Ameni.