¹ Ana ami,iba gunu sonigila mapanzi ma mu mwila anu nugonzi gusalanga masumu.Ha mbi mudu usala masumu,adu dwena ye mudu umoshi ayo uga mwanzila Nzambi mu mudu yo.Mudu beni,kumbu yenzi Yisu Klistu;yeyi ena mudu mu pimbu gumesu ma Nzambi. ² Gwena yeyi yo uga fidi mu mwila gugadula masumu medu.Lo gwena mbi mu mwila masumu medu buna ,ha mu mwila masumu ma mudu mukima. ³ Mbi adu mudu gulandanga misigu mi Nzambi,gugu lesuganga mbi adu dumwisi. ⁴ Mudu yo ugu hosanga mbi:ami ngisi Nzambi, ha yeyi lo agu landanga misigu mi Nzambi, yeyi ena mudu wupala. Mapanzi ma gagidi lo mena gu muzima mwenzi. ⁵ Ha mudu yo ugu landanga malongi ma Nzambi, muzima mwenzi uga zala sila mu luzolu alo lugu duzolanga Nzambi.Mapanzi mo magu dulesanga mbi adu dwena mu gimvuga ye Nzambi mena mama: ⁶ Mudu yo ugu hosanga mbi yeyi agu kalanga mu gimvuga ye Nzambi,yeyi ufana guzinga mpila yimoshi yi zinganga Yisu Klistu. ⁷ Apangi ami egu guzolanga,musigu wu wiba gunuwa nu, wowu lo wena umpa, ha wowu wena musigu wu tama awo wunu gasenzidi banda banda luyanzigu de mwanongudi. Musigu wo wugulu wena malongi mo menu gefidi. ⁸ Ha musingu wu wiba gunu sonigila mwanongu wena nga musigu wumpa,mu mwila luzingu lu Klistu ye luzingu lwenu lwena mugu lesa mbi musigu wu wena ugagidi. Pamba lo, mu mwila piba yibanzidi muguwa, mwani uga gidi ubanzidi guduga. ⁹ Mudu yo ugu hosanga mbi ami igu zinganga mu mwani, ha yeyi gisalu gienzi gumenga pangi wenzi,yeyi ena kaka mu piba. ¹⁰ Mudu yo ugu zolanga pangi wenzi, yeyi agu zinga gu mwani; yeyi kega lo afana gubwisa mugwenu mu masumu. ¹¹ Ha mudu yo uga menga pangi wenzi, yeyi ena kaka mu piba. Yeyi agu hidanga mu piba, yeyi lo gwisiyanga mbi aba gwenda kwiyo,mu mwila piba yiga ziya mesu menzi. ¹² Ana ami, ami giena mu gunu sonigila mapanzi ma,mu mwila Nzambi uga nulolula mu kumbu yi Yisu klistu. Adada, ami ngiena mugu nusonigila mapanzi ma mu mwila anu nwisiyi mudu yo agaduga banda luyanzigu de mwanongu di. ¹³ Ana amala, ami ngiena mugu nusonigila,mu mwila anu nubadisi mudu mubi,anu nubinga. ¹⁴ Ana, ami ngiena mugu nusonigila,mu mwila anu nwisiyi mbi mudu yo ugu zinganga banda luyanzigu de mwanongudi.Ana amala, ami iba gunu sonigila, mu mwila anu nukadi ngolu; mapanzi ma Nzambi magu kalanga mu muzima wenu,anu kega nuga bedisa mudu mubi. ¹⁵ Anu nugonzi gulula luzingu lu gifudji gi ye yima yena mu gifudji gio.Mbigwena ye mudu uguzolanga luzingu lu gidfudji gi,yeyi lo agu zolanga Nzambi Dada. ¹⁶ Mu mwila yima yikima ayi yena mu gifudji gi:nima yo yi mwila wedu ye nesu medu muma gudalanga pwisa yi yoyi ye yima yidu gusilanga lulendu mu mwila yoyi ,yima yi yikima lo yigu gaduganga gwena Nzambi Dawa,ha yoyi yiga gadugidi haha hashi. ¹⁷ Gifudji ye yima yikima yena mugadji,ayo yigu zolanga hadu,yoyi migawa,ha mudu yo ugu salanga mapanzi mo magu zolanga Nzambi,yeyi magu zinganga mvula ye mvula. ¹⁸ Ana ami,ama mena mafugu mansuga!Mu mpila yinu gefidi mbi mbeni wu Klistu ufana gwisa,mu dangui di ambeni engi a Klistu,maga monigidi kega.Mu gio anu nufana gwisiya mafugu mansuga ma dudidi heyi heyi. ¹⁹ Hadu beni lo aga kedi sila hadu edu,diodio diaga gadugidi mu gibudi giedu.Mbi owu akadi hadu edu,owu agenzi gusala yadu.Mu dangu di,adu dudala pimbu mbi,ata mudu umoshi lo mu gadji diowu ugakedi mudu wedu. ²⁰ Ha,anu Yisu uga nuwa mpeve yi vedila.Anu akima nwisi mapanzi maga gidi. ²¹ Ami giena mugu nusonigila,lo mbi mu mwila anu lo nwisi mapanzi maga gidi,ha mu mwila anu nuyisi,mu mwila anu nwisi kega mbi ata panzi imoshi lo yupala yigu gaduganga mu mapanzi maga gidi. ²² Na wena mudu wu upala?Mudu yo ugu hosanga mbi Yisu ena Klistu(gisongidila gi Mesiya),lo,mudu ugifa gio ena mupala.Mudu yo ugudunanga Nzambi Dawa ye mwana wenzi,mudu yoyo wena mbeni ya Yisu Klistu. ²³ Mudu yo ugudunanga mwana,yeyi magu dunanga kega Dawa ²⁴ Mapanzi mo menu gefidi banda luyanzigu,anu nufana guyigama mu mizima mienu.Mbi anu minu guyigamanga mu mizima mienu mapanzi mo menu gefidi banda luyanzigu de mwanongu di,anu kega munu gakala dangu dikima mu gimvuga gi mwana ye Dawa. ²⁵ Mu gio lusilu lo lu Klistu lwaga dusididi ye beni,lwena lulu:Moni wu mvula ye mvula. ²⁶ Ami iba gunu sonigila mu mwila hadu o agu gambanga mpila yi gudufuda. ²⁷ Ha anu,muhunga wu vedila awo wunu gasenzidi mu mbuga yi Klistu,yeyi magu kalanga mu mizima mienu.Mu gio,anu lo nwena ye mfunu yi mudu mwega mugu nulonga,pamba lo,muhunga wenzi mugu nulonganga mapanzi makima.Mapanzi mo mena maga gidi,lo mena ma upala.Mu gio,anu nufana guzinga mu gimvuga ye Klistu mu mpila yigu nulonga muhunga. ²⁸ Mu dangu di,ana ami,anu nufana mu gukala ye yeyi mu gimvuga gimoshi;mu mpila yo adu mudu gazinga mu gikesa mu dangu dia gesa,anu lo nugadala soni gu mesu menzi. ²⁹ Anu nwisi mbi Klistu ena mudu mu pimbu gu mesu ma Nzambi.Mu gio,anu nufana gwisiya mbi mudu yo ugu salanga mapanzi magifa gio,maga zodidi Nzambi,yeyi ena mwana Nzambi.