¹ Ami lo ngiena pwede?Ami lo ngiena ntumwa?Ami lo iga dadidi Yisu fumu wedu?Anu lo nwena ndumba zi gisalu giami mu gadji ga fumu? ² Mbi ami lo ngiena ntumwa mu mwila amosi,ha mu mwila nu ami ngiena.Mu mwila anu nwena gisalu gi Gintumwa giami mu mbuga yi Fumu. ³ Mambu mo mena gimbingu giami gwena o agu ndabilanga mi. ⁴ Adu lo dwena ye giyega gigudia ye gigunwa? ⁵ Adu lo dwena ye giyega gigu senda mugosuna mukwikisi,nga gigusalanga Antumwa aho amosi asala ,ye apangi amosi mu gadji ga Fumu,ye Sefasi? ⁶ Mbi lo gwena kaka Balabasi ye ami hadu afana gusala? ⁷ Na ugusalanga nga mbulu mbulu mu mbingu yenzi beni?Na uga guna mudondu u vinu ye yeyi lo adia ndumba zi vinu?Mbi lo uga gieba angombi ye yeyi lo anwa midigi miowu? ⁸ Ami mbi minwambila mapanzi ma mugu digulumusa mu gimudu?Lo gugukalanga gio ata mi misigu? ⁹ Mu mwila iga sonamana mu misigu mi Mose,"guganda mbuga lo ngombi yo uba gudima".Mu gagidi sila gwena mu mwila ngombi Nzambi aba gwifa kenda? ¹⁰ Yeyi lo aba guhosa muyo idu dadila du?Yoyi iga sonamana mu mwila adu,mu mpila mbi ayo uba gudima ufana gudima ye luzolu,ye ayo uba gudunga yeyi ufana gusala ye lugwigilu mugu gaba mimbudu. ¹¹ Mbi adu duguna ndumba zi gimpeve mu gadji diedu,gwena gubiya adu mugu lomba ndumba zi gisuni? ¹² Mbi amosi munu gusadila giyega giowu mu dwena du,adu lo dufana gusala gio gwena owu kega?Lo ata ufugu umosi lo adu dugasadi guboguda mu giyega giowu?Ha adu dugandanga muzima mu yima yikima mu mpila mbi adu dugonzi gukala gibaga mu musamu u Yisu Klistu. ¹³ Anu lo nwisi mbi aho aba gusadila gunzu yi Nzambi owu agu baganga lumpa gunzu yi Nzambi,ye aho aba agu salanga gu oteli owu agugabanga mbingu yo yiguduganga gu oteli? ¹⁴ Ata ye beni Nzambi uga hana mbuga,mu mpila mbi aho aba gumwanga musamu u Nzambi,owu agubaganga yoyo yiba guduga mu musamu u Nzambi. ¹⁵ Ha ami lo iga sadi guboguda ata mu giyega gimosi.Ye ami lo inu sonigila mbi mu mwila anu nupimi kiyega giami.Ami isebila ye lufwa lo mbi mudu umosi asigisi mi muyo itadila mi. ¹⁶ Mu mwila mbi ami ngiena mu gumwanga musamu u Nzambi,ami lo ngiena ata ye gibingu gimosi mugu disigisa,mu mwila ami migusalanga.Ye ami lo igusanga pamba mbi ami lo ilonga ndaga yi Nzambi! ¹⁷ Mu mwila mbi ami iba gusala mu luzolu lwami beni,ami ngiena ye lufudu.Ha mbi ami lo isala mu luzolu lwami beni,ami igakala kaka ye giyega ho,nga giga panamanina. ¹⁸ Lufudu lwami lwena yigi?Mu gio mbi ami ami ngiena mugu longa,ami igu longanga mu gugonda gadongu,ye lo nufana guboguda mu giyega giami mu gadji ga musamu u Nzambi ¹⁹ Mu mapanzi magifa gio ami ngiena pwede mu makima,ami iga guma gisadi gi mudu mukima,mu mpila yo ami ifana gubinga mu yikima. ²⁰ Mu mwila Azwifi ami igudi gumisanga nga Zwifi,mu mwila ami mbingi Azwifi akima.Mu hadu o ena mu gandji ga misigu,ami igu gumanga nga mudu wena mu gandji ga misigu(lo mbi ami ngiena ami beni mu gadji ga misigu),mu mpila mbi ami mbenzi hadu o ena mu gadji ga misigu. ²¹ Gwena hadu o agonda mu gadji ga misigu,ami igu gumanga nga owu(lo mbi mu mwila ami mi gonda mu gadji ga misigu mi Nzambi ami beni,ha gusi misigu mi Yisu Klistu),mu mpila yo ami ifana gubinga aho agugondanga guzidjisa misigu. ²² Mu mwila hadu o agonda ngolu,ami igudi gumisanga nga mudu ugonda ngolu mu mwila ami mugwa benda.Ami iga gumini mukima gwena hadu akima,mu mpila yo gio ami miga hulusidi hadu engi mu mampila makima. ²³ Ye ami migasadidi yikima mu mwila nsangu yi Nzambi yigonzi guniga gana.Mu gio ami ifana gusebila mu lusagumunu lo. ²⁴ Anu lo nwisi mbi mu gadji ga gudjina tina mudu mukima agusendanga tina,ha kaka mudu umosi ugu binganga?Sendenu tina mu mwila gusenda gibingu. ²⁵ Mu budi badi agu gambanga gusimbiga tegu gubula gwisemu.Owu agsemanga mu mwila mu gusenda gibingu nga mugu hida gowu,ha adu dugu sendanga tina mu mwila mbi adu dusendji gibingu gi luzingu lu gonda suga. ²⁶ Ami lo igu sendanga tina isenda senda,mu mwila ami mbingi. ²⁷ Ha ami igu hananga mwila wami ye ami igu gumisanga uhiga,ye ami igu dilesanga gwena agwedu mbi ami beni lo ngiena mu gibela.