¹ Ami izola mbi anu nwisiyi,anedu amala ye agosuna,mbi adada edu agakedi agakedi gusi maduda ye owu akima aga hidjidi mu nzadi muneni. ² Owu akima maga sedjidi mbodjiga gwena Mose mu maduda ye mu nzadi muneni, ³ Ye owu akima maga didi madia mamosi magi mpeve. ⁴ Ye owu maga nwidi kega goba di gimpeve.Mu gio owu maga nwidi goba di gimpeve mani dimosi dialadanga,ye mani dio digakedi Yisu Klistu. ⁵ Ha Nzambi lo aga kedi mu kiesi gwena hadu engi mu gadji diowu,ye mamvumbi mowu maga kedi mu gisaga saga mu demu digonda gima. ⁶ Mu dangu di mapanzi mo majima manu sadisi mu gusenda nga mbandu mu mwila adu,mu mpila mbi adu dugonzi manunga mabi nga magakedi gwena owu. ⁷ Anu nugonzi gukala anganga nga giena amosi mu gadji dienu.Nga giga sonamana ,"adu agu bwanga asi mu mwila mu gudia ye gunwa,ye agu zangulu ganga mu mwila mu gugina ye manunga magi ndumbu." ⁸ Adu munu gusala gindumbu,nga gigu salanga hadu akima,ye mafunda magumi madi ye masadu maga fidi mu mwila panzi yi gifa gio. ⁹ Adu dugonzi gusa Klistu mu mbangudulu igifa gio,nga giga sadidi hadu engi aga fidi mu nioga. ¹⁰ Kega dugondenu gukala ye maboguda nga gigu salanga hadu engi ena mu gadji diowu,ye owu maga fidi gwena wanzio ulufwa. ¹¹ Mapanzi mo muma gadudidi mu mwila mugu dusadisa du nga mbangudulu,ye owu maga saga manini mu isoni mu mwila mugu dulonga mu mbuga yi mudu yo ugesa gu nsuga di dangu. ¹² Mu gio ayo uba gununga mbi yeyi ena mudu mupimbu agiebugi mu gugonda gubwisamana. ¹³ Gimegamana gumosi gugonzi gunududila mu gumudu gienu,ha Nzambi ena luzolu,yeyi lo aga nwega mbi anu numegamani mu guhida ngolu zienu,ha mu mbuga ye gumega mana,mbuga iga kala wasi,mu mpila mbi anu nukadi ye gikesa gigu ganda muzima. ¹⁴ Mu dangu di apangi ami aluzolu,anu nukadi gudadi ye idegi. ¹⁵ Ami iba gunwambila nga hadu ena ye manunga,mu gio anu nufana gugwigila ama meba gunwambila. ¹⁶ Goba di lusagu munu adi didu bagusa gumuna lo diena digu gaba mu magila ma Yisu?Lumpa di duba gugaba lo diena digu gaba mu mwila u Yisu Klistu? ¹⁷ Mu mwila gwena kaka ye lumpa lumosi,adu dwena hadu engi,dwena mwila umosi,ye adu duba gudunga lumpa lumosi mugi mvuga. ¹⁸ Dalenu hadu a Isaledi:lo gwena mbi hadu o agadidi madia mo maga hanini gu otele? ¹⁹ Ami yigi izola guhosa?Gidegi gimosi giena pamba?Gihida pimbu madia mo mahana mu idegi mena pamba? ²⁰ Ha ami ihosa,ayo iba guhana apaganu,owu agu hananga gwena afagulu,ye lo mbi gwena Nzambi.Ami lo iga zola mbi anu nuvuga gani ye afamigulu! ²¹ Anu lo nufana gunwa mu goba di fumu ye mu goba di adiabulu.Anu lo nufana gusadila a mesa ma fumu ye momo madiabulu. ²² Mbi lo adu duzola gusoda uhala u Nzambi?Adu dwena ngolu zingi mu mbuga yo? ²³ "Yikima aga hanamana,"ha yikima lo yena mfunu."Yikima iga hanamana,"ha lo gwena mbi yoyo iga sadisa moni wedu. ²⁴ Lo gwena ye mudu ufana gugamba mbingu yenzi beni.Ha konso mudu agambi mbingu yi mugwenu. ²⁵ Anu nufana gudia gonu ikima yo yaba gudega gu zandu,nugonzi gula. ²⁶ Mu mwila gifudji gi giena gi Nzambi,ye ikima yo yena mu gifudji yena yi Nzambi. ²⁷ Mbi mupaganu unulenziga mu gwenda gudia,ye anu nugumbula,dienu yikima yo yanuwa mu gugonda gula ata guvu. ²⁸ Ha mbi mudu unwambila,"madia ma mahana manini mu idegi,"gumadia lo mu mwila mudu yo unwibuga,ye mu mwila manunga mani beni. ²⁹ Ami lo ihosa mbi mu manunga mayi beni,ha mu manunga ma mudu mwega?Mu mwila manunga mami lo maga sambisa mu manunga mudu mwega? ³⁰ Mbi ami imadia mu isambu mu mwila yigi,ami ifana gukala mu lufudusu mu yo yi hana gwena Nzambi. ³¹ Mu gio,nudi mbi lo nunwi,si nusala,salenu mu mwila lugumu lu Nzambi. ³² Nugonzi gulemigisa Azwifi mbi lo Agelegi mbi lo Dibundu di Nzambi, ³³ Gigeledi nga gigu meganga mugu sadisa akima mu ikima,mu gugonda gugamba mbingu giami, ³⁴ Ha gibingu gi mudu mukima mu mpila mbi mudu mukima ahulugi.