¹ Kalenu ilanzi yami giledi nga ngi ngiena mi mbandu yi Yisu Klistu. ² Dangu di ami ngiena mugu nuwa mbodji mu mpila yinu ngindulami mu yima yi kima,ye mu mwila gugieba gwenu gu misigu mu gugila nga giganu longidi. ³ Ami izola mbi anu nwisiyi mu dangud di,mbi Klistu ena longi u mudu mukima,ye yala ena longi u mugosuna,ye Nzambi ena longi u Klistu. ⁴ Yala mukima uba gusambila mbilo uba gubigula,mbi mudwi wenzi wena ye pu mbi lo gidambula yeyi ena mugu mvenza longi wenzi. ⁵ Ha mugosuna mukima ayo uba gusambila mbi lo uba gubigula lo gusa gidambula gumudwi yeyi ena mugu mvenza longi wenzi.Gwena kega gigeledi mbi yeyi ugaya dubu dwenzi. ⁶ Mu mwila mbi mugosuna lo asa gidambula gu mudwi wenzi,yeyi ufana guvuga dubu dwenzi.Mbi gwena gubiya mugosuna mugu vuga dubu dwenzi,yeyi ufana guvada gidambula. ⁷ Mu mwila yala lo afana guvada gidambula,mu mwila yeyi ena gidimbu ye lugumu lu Nzambi.Ha mugosuna ena lugumu lu yala. ⁸ Mu mwila gwisigu mbi yala uga dugidi mwena mugosuna,ha mugosuna uga dugidi mwena yala. ⁹ Lo mbi yala uga sala manini mwena mugosuna,ha mugosuna mwena yala. ¹⁰ Mu mwila gio mugosuna ufana gukala ye giyega gigusa gidambula gumudwi wenzi,mu mwila awanzio. ¹¹ Mu gio,mu mwila Fumu,mugosuna lo ena ye gimpwanza mwena yala,lo kega mbi yala ufana gukala ye gimpwanza mwena mugosuna. ¹² Nga giesa mugosuna mwena yala,giogo yala wena kega mwena mugosuna.Ye yima yikima yesa mwena Nzambi. ¹³ Anu nudisambisi anu beni:gwena pimbu mbi mugosuna asambidi Nzambi gugonda gidambula gumudwi? ¹⁴ Mu mwila gifudji gio beni lo gigu longanga mbi yala ena ye dubu dwingi gu mudwi,gwena soni mu mwila yi, ¹⁵ Ha mbi mugosuna ena ye dubu dwingi,giena kiesi mu mwila yeyi?Mu mwila dubu dwenzi du dadi dwena nga gidambula. ¹⁶ Ha mbi mudu uzola gudendula mu panzi yo,adu lo dwena ye gima gigusala,ata mabundu ma Nzambi. ¹⁷ Mu malongi mo,ami lo inu budila miogu,mu mwila mbi,mu dangu dinu gesa anu kima lo gwena mbi mu mwila mapimbu,ha mu mwila mabi. ¹⁸ Mu mwila degu,ami igefidi mbi mu dangu dini baguvugana gu nzu i Nzambi,gwena ye kabasana mu gadji dienu,ye ami beni ngiena mu gugwigila. ¹⁹ Ye gwena ye ngifilagani yi pimbu mu gadji dienu,ye kega aho aba gudala akadi ye gwisiyagana mu gadji dienu. ²⁰ Mu dangu dinu baguvugana,lo gwena ye madia ma Nzambi menu bagudia. ²¹ Mbi nwena mugudia,hosi mudu adi madia menzi,gumesu ma hadu amosi mugudia madia menzi.Umosi ena nzala,mwega ena kwiti. ²² Anu lo nwena nena ye manzu mu mwila mugudia ye gunwa?Nuba gumvenza nzu yi Nzambi ye gumvenza hadu o agonda gima?Yigi ifana gunwambila?Ami ifana gunubudiala miogu,ami lo ifana gunu gumisa mu mwila mapanzi magifa gio. ²³ Mu mwila ami miga yambidi gwena Fumu Yisu matabishi muyo yiga nulongidi;gwena Fumu Yisu mu piba kaka yoyo yaga mudegidi,yeyi diaga senzidi mapa. ²⁴ Ye gu nima digu ginzigisa madodji,yeyi dia magela,ye dia hosa:awu wena mwila wami awo ugabogugidi mu mwila nu;anu nugasala gusala kaka giogi mu mwila gununga mi. ²⁵ Gnima dimadia,yeyi diaga senzidi goba,ye dia hosa:goba di diena ngifilagani yimpa mu magila mami;anu nuga salanga gusala kaka giogi dangu dikima dinuba gunwa. ²⁶ Gwena mu dangu dikima dinuba gudia madia ma ye dinuba gunwa goba di,anu nuba gwibuga lufwa ya fumu Yisu de gogo gwa gesa guginzidiga. ²⁷ Mu gio mudu yo ugadia lumpa lu mbilo uganwa goba di fumu Yisu ye mabi,yeyi beni uga gumbula guyaga ida gumesu ma mwila ye magila ma fumu Yisu. ²⁸ Hoshi mudu adi godulusi ye beni,tegu mugudia ye mugunwa goba dini, ²⁹ Mu mwila mudu yo uba gudia ye uba gunwa mu gugonda gudigo dulusa mwila u fumu Yisu,yeyi aba gudia ye gunwa lufundusu lwenzi beni. ³⁰ Mu mwila giogo,mu gadji dienu gwena ye igada yingi ye makashi mengi,ye kega hadu engi agafa. ³¹ Mbi edu dudifundusa adu beni,adu lo aga dufundusa. ³² Ha mbi edu madu fundusa,adu duga kala ye ndumbu digola gwena fumu Yisu,mu mpila mbi agonzi gudu gongila nkanu yi lufwa ye gifudji. ³³ Mu gio,anedu,mu dangu dinu bagu gungamana mu mwila gudia,wifilaganenu yenu ye yenu. Mbi mudu ena nzala,yeyi adi gunzu yenzi,mu ³⁴ mpila anu nugonzi gugu ngamana mu gubenda mifundu mu gadji dienu.Mapanzi mamosi ami ya gwisa guma hidiga gogo mu dangu di dula.