¹ Mu yo idadila mapanzi amo menu gasonigididi,inunga gwena pimbu mu mwila yala mu gugonda gugama mugosuna. ² Mbalu zingi mu mwila gugonda gubenda mapanzi mabi,mudu ye mudu ufana mugu kala ye mugosuna wenzi beni,ye kega osi muguosuna ufana mugu kala ye mulumi wenzi beni. ³ Konso yala ufana mugu sala mapanzi mapaimbu gwena mugasi wenzi mu luzolu lu mugasi wenzi,ye mugosuna ufana gusala gigeledi kega gwena yala ayo ifana. ⁴ Mugosuna lo ena ata ye giyega mu mwila wenzi beni,ha kaka yala ufana gukala ye giyega mu mwila u mugosuna;ye gigeledi kega gwena yala lo afana gukala ye giyega mu mwila wenzi beni,ha kaka mugosuna mudu ufana gukala ye giyega mu mwila u yala. ⁵ Mu gwenu lo afana guganda umosi mbuga,mbi anu mbadi lo nwefila ganini mu gadangu ndambu,mu mwila mugu dihana mu isambu;gunima anu mbadi nuginzi gila mu mbuga,mu mpila mbi sadana agonzi gunwingidila mu gunu bwisa. ⁶ Ami inwambila gio mu mwila gunu sebidisa,ha lo isa musigu. ⁷ Ami iga zodidi mbi amala akima akadi nga ami;ha mudu mukima wena ye gabu diga muwedi Nzambi,umosi ye umosi mu mpila yenzi. ⁸ Gwena o agonda gudwala ye o agafila alumi,ami ihosa gwena pimbu mugu kala nga ami. ⁹ Ha mbi lo ena ye kanzidi yi muzima,nufana mugu dwala;mu mwila gwena pimbu mugu dwala ke mugu lungula. ¹⁰ Gwena o aga dwala,ami inuwa mbuga,gusugu ami,ha Fumu,mbi mugosuna umosi lo ufana guiga bulagana ye mulumi wenzi. ¹¹ (Mbi yeyi ugabu lagana,yeyi akadi giogo gudwala lo mulumi mwega),mbi lo yeyi ufana gwifilagana ye mulumi wenzi mugu ginzigila mu wala,ye kega yala lo afana guniogula mugasi wenzi. ¹² Mu mapanzi mamosi lo gwena mbi Fumu,ha ami iba gunwambila:mbi gwena ye pangi uyala mugazi ga Yisu wena ye mugasi ugu gondanga gusambila,ye yala yo uzola gukala ye yeyi,yeyi lo afana gumu niogula ; ¹³ Ye mbi gwena ye mugosuna wena ye yala ugu gondanga gusambila,ye uzola guzinga,ye yeyi,lo afana mugu niogula mulumi wenzi. ¹⁴ Mu mwila yala yo ugu gondanga gusambila ena mu usantu u mugasi wenzi,ye mugosuna yo ugu gondanga gusambila,ena mu usantu u mulumi wenzi;mbalu ziega ana enu lo agakala gigeledi,mu gio mu dangu di owu ena asantu. ¹⁵ Mbi hadu agonda lukwigila agabulagana,owu aga bulagani;mugosuna mbi lo yala lo ena agu gosagana mu mbuga yo.Nzambi aga dulenzigidi mugu zinga mu pwede. ¹⁶ Mu gio ayi kiyo wisi,mugosuna,mbi muga gulusa mulumi wami?Mbi lo kiyo wisi ayi yala mbi muga gulusa mugosuna wami? ¹⁷ Pamba wega mbi hosi mudu asadi yo yiga muwedi Nzambi,nga giena gabu dio diaga senzidi gwena Nzambi.Gwena giogio ami iba guhana mbuga mu mabundu makima. ¹⁸ Mbi mudu aga yambidi ndaga yi Nzambi diaga kedi mu Yisu;yeyi akadi kaka mu Yisu;mudu mwega aga yambidi ndaga yi Nzambi diaga gonzi gukala mu Yisu,yeyi ufana gusala ngolu mu gwingila mu Yisu. ¹⁹ Mu gwingila,mbilo mugu kala hanzi gwena pamba,ha gima gihida mfunu gwena guzidjisa musigu mu Nzambi gwena mfunu. ²⁰ Hosi mudu akadi kaka mu mpila yoyo yaga kedi diaga yambidi ndaga yi Nzambi. ²¹ Ayi uga yambidi ndaga yi Nzambi nga muhiga,gudala bulu lo;ha mbi ayi ufana guguma mudu muneni,dihani. ²² Mu mwila muhiga yo uga lenzi manini gwena Fumu yeyi aga kedi mudu u Fumu;mpila yimosi,mudu muneni ayo uga lenziga manini gwena Fumu yeyi agakedi muhiga gwena Fumu. ²³ Anu nuga sumba manini mu talu ineni;anu lo nufana guguma ahiga a hadu. ²⁴ Hosi mudu,pangi uyala,kala giogio gu mesu ma Nzambi nga giuga kedi mu dangu diuga lenziga manini. ²⁵ Mu mwila agosuna o aga gonda gugosagana ye yala banda umwana,ami lo ngiena ye musigu u Fumu mu gwawa;ha ami miba gwa lasila,nga giaga yamba kenda zi Fumu mu gukala hadu aga gidi. ²⁶ Dala sila agio gilumbuga mu gukala pimbu,mu mwila dangu di diena di pasi di dula heyi heyi:gwena pimbu gwena yala mugu kala giogio. ²⁷ Ayi uga gosagana ye mugosuna umosi,ayi lo ufana guzola mbi nugabu lagani ye yeyi;ayi lo gugosa gana ye mugosuna,gugamba lo mugosuna. ²⁸ Mbi ayi uga dwala,ayi lo usala disumu;ha hadu o magakala ye idumba mu mwila miowu;ye ami iba guzola gunu gadula mu idumba yo ²⁹ Dalenu,ayo yi baguzola gunwambila,anedu dangu diena digi zini,giebugenu,aho ena ye agosuna mu manzu,akadi nga owu agonda agasi, ³⁰ Aho aba gudila nga owu aba gonda gudila,aho aba gusebila nga owu aba gonda gusebila,aba gusumba nga owu agonda gima, ³¹ Ye aho aga zola gifudji nga owu aga gonda gugizola,mu mwila gifanisu gi gifudji gi mugia guhida. ³² Mu gio ami iba guzola mbi anu nusadi mu gugonda maboguda.ayo uga gonda gudwala,yeyi ufana guboguda mu mapanzi ma mafumu,mu mpila mbi Fumu akadi mu kiesi; ³³ Ye ayo uga dwala ufana guboguda mu mapanzi ma gifudji,mu mwila gusebi disa mu gasi wenzi. ³⁴ Gwena kega ye gisoba gani mu mugosuna ayo uga dwala ye yoyo uga gonda gwisiya tegu amala mu luzingu lwenzi:ayo ugonda gudwala agu bogudaanda mu mapanzi ma Fumu,mu mwila yeyi mugu kala mu usantu mu mwila wenzi ye mu gimpeve;mugosuna yo uga dwala yeyi ufana gubo guda mu mapanzi ma gifudji,mu yeyi mugu sebidisa mulumi wenzi. ³⁵ Ami iba gunwambila gio mu mbingu yeyi beni,ha loinu sila muhedu,gwena mu mwila gunu lesa isalu ye mbuga yi pimbu,anu mugu gandamana ye Fumu Yisu mu gonda gudisa mu gisaga saga. ³⁶ Mbi gwena ye mudu wa gudala pamba mu mwila mwana wenzi mugosuna mugu hidjisa dangu mu dela di,yeyi udala mfunu yi gumu dwadisa,yeyi ufana gusala amo mazola yeyi mugu sala,yeyi lo asala disumu,ufana mugu mudwadisa. ³⁷ Ha ayo usenzila mwana mugosuna nunga,mu gugonda nunga diega ye gisalu mu luzolu lwenzi beni,ye usenda lukanumu muzima wenzi mu gugieba mwana wenzi mugosuna mugu gonda gwisiya amala,mudu ugifa gio asala pimbu. ³⁸ Mu gio,ayo udwadisa mwana wenzi mugosuna asala pimbu,ye ayo ugonda mugu mudwadisa asala sila pimbu. ³⁹ Mugosuna mbi ugandama dangu didadi,mudangu diena mbi mulumi wena ye moni;ha mbi mulumi wenzi ufa,yeyi ufana gwenda gudwala osi mulumi yo wazola yeyi,gima gimosi buna,gukadi mugi Nzambi. ⁴⁰ Yeyi ena pimbu sila,hosa mbi yeyi akadi gonzi giogio giena,mu gulanda nunga diami.Ye ami kega,izola mugu kala ye "mpeve yi Nzambi".