¹ Mudu umosi mugadji dienu mbi yeyi wena ye gugonda gu ngifilagani ye mugwenu,mbi yeyi wa ngwambila hadu agonda gagidi,ye lo gwena hadu ana asantu? ² Anu lo nwisi mbi asantu aga sambisa gifudji?Ye mbi gwena mu mbuga yenu gifudji giga sambisana,anu nwena gisaga saga mu guhana ata gandambu ga mifundu? ³ Anu lo nwisi mbi adu muduga sambisa awanzio?Ye adu lo dugasambisa,mu mapanzi magola,mapanzi ma luzingu lu? ⁴ Mu dangu digonda ngifilagani mu mapanzi ma mazingu lu,gwena ye hadu o dibundu lo difana gwa yindula ata mugima gimosi mbi owu maga senda mu mwila gusambisa! ⁵ Ami iba guhosa mu mwila soni zienu.Mu gio lo gwena ye mudu mu gadji dienu wena ye ndungi ayo ufana gwambila anowu panzi. ⁶ Ha mudu umosi ugu nwaninanga mudu mwega,ye mu mbuga yi gugonda zola! ⁷ Gwena giogio sila gagidi,gubiya gwena gunwena nu,mbi mu gukala ye lumengu yenu yenu.Mu mwila yigi nugu gondanga gunioguga mu mapanzi magonda mfunu?Mu mwila yigi anu nugu gondaga guduga mu mapanzi mo? ⁸ Ha gwena anu nugusala mapanzi magonda maga gidi ye mugu didusa,ye gwena apangi enu beni anu nugusalanga gio! ⁹ Anu lo nwisi mbi hadu agonda gagidi lo agadala gifumu gi Nzambi?Anu nugonzi gufuduga:gukadi hadu abi,gukadi hadu a yidegi,gukadi hadu agindumbu,gukadi hadu agonda ngolu,gukadi hadu o ena ye gimbangi gibi, ¹⁰ Gukadi embu,gukadi hadu o agulu langa,gukadi hadu o agulawu ganga magana,gukadi hadu o agu dugananga,gukadi hadu o agusalanga agwenu gubiya,lo agadala gifumu gi Nzambi. ¹¹ Ye gwena giogo gi nugakedi nu,amosi mu gadji dienu.Ha anu munu gakedi agofuga ,ha nuga kedi awa gisagu muga,ha nuga kedi awa gugodulusa mu kumbu yi fumu Yisu Klistu,ye mu mbuga ye mpeve yi Nzambi wedu. ¹² Yikima yiga pana manina,ha yikima lo yena mfunu;yikima yiga pana manani,ha ami lo ifana gudiega mugu sadila osi gima gio. ¹³ Madia mena mu mwila vumu,ye vumu mu mwila madia;ye Nzambi maga ziya umosi ye umosi.Ha mwila lo wena mu mwila mapanzi ma zilu.Wena mu mwila fumu,ye Fumu mu mwila wowu. ¹⁴ Ye Nzambi,ayo aga zangu lusidi Fumu mu lufwa,yeyi kega maga duzangulusa du mu ngolu zienzi. ¹⁵ Anu lo nwisi mbi mwila mienu miena izini yi Yisu Klistu?Ami ifana gusenda gizini gi mwila u Klistu,mu mwila gugumisa mwila ugindumbu? ¹⁶ Lo ifana gusala mana!Anu lo nwisi mbi mudu yo uba guganda mana ye ndumbu ena mwila umosi ye yeyi?Mu mwila,yoyi yiga hosamana,hadu mbadi aga guma mwila umosi. ¹⁷ Ha ayo uga gandamana ye Fumu ena ye yeyi mpeve yi mosi. ¹⁸ Anu nuzini mapanzi mazilu.Masumu mamosi magu salanga hadu,masumu mo mena hanzi yi mwila;ha ayo uba gudi hana mu gusala mapanzi ma zilu,yeyi aba gusala ye mwila wenzi beni. ¹⁹ Anu lo nwisi mbi mwila wenu wena nzu yi mpeve ya longo wena mu gadji dienu,awo unu gayambidi gwena Nzambi,ye kega wowu lo wena mbi wenu beni? ²⁰ Mu mwila anu nuga sumbama nini mu talu yingi.Gumisanu Nzambi mu mila mienu ye mu mpeve yenu,ayo yena mwena Nzambi.