¹ Ami ngiena mugu nwibuga anedu,musamu u Nzambi wiga nulongidi,awo winu gayambidi,mu mbuga yi wowu anu dinu gagadjidi muzima. ² Ye mu mbuga yi wowu anu dinu biga,mbi anu munu gawugamini nga mu mpila yiga nulongididi,mbalu yega,anu nuga gwididi mu pamba. ³ Ami aga nulongididi tegu,nga mu mpila yaga yambidi ami kega,mbi Yisu aga fididi masumu medu,nga giyena mu masonama. ⁴ Yeyi maga zigamanini,ye yeyi diaga fudumugidi mu ufugu u sadu,nga giga sonamana. ⁵ Ye yeyi dia gedi gumoniga gwena Sefasi,gunima dia gedi gumoniga gwena kumi ye mbadi. ⁶ Gunima yeyi dia gedi gumoniga gwena hadu guhida kama zi danu mu mbalu yimosi,engi mu gadji diowu ena ye moni mwanenu,ye amosi kega mu gadji diowu aga fwa. ⁷ Gunima ,yeyi dia gedi gumoniga gwena Zagi,ye gwena Antumwa akima. ⁸ Gunima digu wagana ye owu akima,dia gedi gumoniga gesidi gu moniga gu ngiena mi kega,mu gitungugila; ⁹ Mu gio ami ngiena ntumwa unsuga mu gadji diowu akima,ami lo ngiena uwa gugugamu gulendji gama Ntumwa,mu mwila ami miga niogudidi mabundu ma Nzambi. ¹⁰ Gwena mu ngolu zi Nzambi ami ngiena ngi ngiena gi mwanonu,ye ngolu zienzi gu ngiena mi lo ziga kedi zi pamba;gudadi di manunga mo,mu mwila ami igasadidi gwingi sila guhida owu akima,lo gwena mbi ami gigidi,ha ngolu zi Nzambi azio zigakedi mu gadji diami. ¹¹ Mu gio gukadi mi,gukadi owu,gima gimfunu giena adu munu gulonga,ye mu giogo anu nuga gwigididi. ¹² Mu gio mbi magudulonga mbi Klistu maga fudumugidi,kiyo hadu amoshi mu gadji dienu afana vugisanga mbi lo gwena ye lufudumugu mu gadji dia afi. ¹³ Mbi lufudumugu lo lwena,Yisu kega nga lo aga fudumugidi. ¹⁴ Mbi Yisu lo agafudumugidi,mu gio malongi medu mena mapamba ye lugwigilu lwedu kega. ¹⁵ Yeyi wena ata gi dwena ambangi abi gu mesu ma Nzambi,mu mwila adu muduhanini gimbangi gibi gu mesu ma Nzambi mu mpila yeyi yaga fudumusidi Klistu.Mu gio yeyi lo aga yisadidi mbi afi agonzi gufudumuga. ¹⁶ Mu gio mbi afi lo afudumuga,Klistu kega lo aga fudumugidi. ¹⁷ Adi mbi Klistu lo aga fudumugidi,lugwigilu lwenu lo lwena mfunu,anu nwena kaka mu gadji ga masumu. ¹⁸ Ye mu gubiya go aho agafidi mu Klistu owu ega bidisamana. ¹⁹ Mbi gwena kaka mu luzingu lolo buna,mbu adu dugu nunganga mu Klistu,adu dwena sila hadu agu dila dila gu mesu ma hadu akima. ²⁰ Ha mu gigidi Yisu uga fudumuga gigeledi ye afi akima. ²¹ Mu gio,mu mwila lufwa lugesa mu mbuga yi mudu,gwena kega mu mbuga yi mudu lufudumugu lu gesidi gwena afi. ²² Ye nga mu mpila yi hadu akima mugufanga mu mbuga yi Adamu,mu mpila yoyo akima maga zinga mu mbuga yi Klistu, ²³ Ha mudu ye mudu ena ye mbuga yenzi:Klistu mu mbuga yi tegu,gunima akima o ena mu KListu mu kinzigididi yenzi. ²⁴ Gunima di gesa suga gifudji,dangu diaga gidjigisa gifumu gwena yo wena Nzambi ye Dada,gunima di guniada giyega gikima,gifumu gikima ye ngolu zikima. ²⁵ Mu gio yeyi ufana giyala de gogo gwagasa ambeni enzi akima gushi milu mienzi. ²⁶ Mbeni unsuga agakala ugu niata,gwena lufwa. ²⁷ Nzambi,mu gio ugasa yikima gushi milu mienzi.Ha mu dangu diga hosa Nzambi mbi yikima yi mwifidi,gugakala giogio,gadula ayo ugefididi yima yikima. ²⁸ Mu dangu diga mwifila yima yikima,mu gio Klistu yebeni ma gahosa gwena yo ugefididi yima yikima ,mu mpila mbi Nzambi akadi mu ikima ye gwena akima. ²⁹ Mbi gukadi mu mpila yega,yigi igenzi gusalamana gwena aho agasenzididi mbodjiga mu mwila afi?Mbi afi lo aga fudumuga si mu panzi imoshi,mu mwila yigi owu agusendanga mbodjiga mu mwila owu? ³⁰ Ye adu mu mwila yigi duguwana gananga ye igonza mu dangu dikima? ³¹ Ufugu ukima ami munu gubiga mu lufwa,gwena gigidi anedu amala ye agosuna,mbi anu nwena muguhana kiesi gwena Yisu Klistu fumu wededu. ³² Mbi gugakedi mu luzolu lu gimidu sila ami iganwanini mu pamba ye ashidu gu Efezo,mbingu yegi iga ngisila mi?Mbi afi lo afududmuga,mu gio adu dudi ye dunwi,mu mwila gakela adu mudugafa. ³³ Anu lo nufana gulufuda,isalu yibi migu niadanga mukelu upimbu. ³⁴ Anu nuginzigidi mu mukelu wenu upimbu,nga gilombugila,ye nugonzi gusala masumu,mu mwila engi mu gadji dienu lo esi Nzambi,ami iba gwihosila mu soni zienu. ³⁵ Ha umoshi maga hosanga:kiyo afi agu fudumuganga ye mwila wigi owu agesa guginzigila. ³⁶ Mudu ugonda ndungi!Kima gio giuguna gifana gisenda luzingu mbi giogi gifa. ³⁷ Ye gio mbi ayi uguna,lo gwena mbi mundondu ugaduga,gwena galundumba gapamba,galundumba ga bule dangu dimosi,mbi lo nga mimbudu miega. ³⁸ Gunima Nzambi wuvadjisa mwila wega,nga mpila ya zodila,ye mimbudu mikima yeyi maga mivadjisa mila mio mifana. ³⁹ Hadu akima aamoni lo ena mpila imoshi,imoshi yena ye gifa gi hadu,amoshi ena mu gifa gi ndumba,amoshi mu gifa gia anzila,amoshi mu gifa gia ashi. ⁴⁰ Gwena kega ye mila mimosi mi wulu ye mimosi kega mi hashi,ha gobu di mwila u wulu wena gifa giega ye wuwu u hashi. ⁴¹ Umoshi ugugeganga nga dangu,mila miega migu gaganga nga ngonzi ye mimoshi migu geganganga mioda,hoshi moda wena ye kegidi yi wowu. ⁴² Gwena giogio nga lufudumugu lwafi.Mwila wo maga guna ye isalu yibi,lo uga duga ye isalu ibi. ⁴³ Waga ziga ye gusiala uga duga mu kiesi.Waga ziga mu umolo uga duga ye ngolu. ⁴⁴ Womu uga zigamana mwila u gimudu,uga duga mwila u gimpeve.Mbi gwena ye mwila ugi mudu gwena kega ye mwila ugimpeve. ⁴⁵ Mu mwila gio yoyo yiga sonamana:mudu utegu Adami,maga ginzigila mudu u gimoni.Adami unsuga ena mpeve uga hananga moni. ⁴⁶ Ha lo gwena mbi gimpeve gi gesa tegu,gwena gimudu gigesa tegu,gimpeve gi gesa gunima. ⁴⁷ Mudu utegu aga dugidi mu manu,aga musadidi ye manu,mudu umbadi Fumu aga dugidi gu wulu. ⁴⁸ Giena mudu u hashi,giena kega hadu a hashi,ye giena mudu u wulu,giga kala kega hadu a wulu. ⁴⁹ Ye mu mpila yimoshi sila adu duga senzidi gifa gi mudu yo uga dugidi mu manu,mudu gavada kega gifa gi mudu yo uga dugidi gu wulu ⁵⁰ Ayi yiba zola guhosa mi anedu amala ye agosuna,mbi gifudji giedu gimwanongu lo gifana gudala gifumu gi Nzambi,ye kega gwena o ena ye isalu yibi,lo kega aga dala aho agonda isalu yibi. ⁵¹ Dala ami iba gunwambila mapanzi maga swegamana:adu lo dugafa mbi adwa kima,ha adwa kima mudu gasobuga. ⁵² Mu dangu dimosi,nga mu gubwada gu disu,mu danga yi mvudi mvudi,mu gio hadu agafa maga hinduga ye mwila wo ugonda isalu yibi ye adu duga kala agusobuga. ⁵³ Guga lombugila mbi mu gio mwila wu isalu ibi uvadji mwila wu isalu yi pimbu,ye kega mwila wo ugafanga uvadji mwila wo ugu gondanga gufa. ⁵⁴ Mu dangu diga vada mwila wo wisalu ibi,mwila ugonda isalu ibi ye kega mwila wo ugufanga,uvada mwila ugu gondanga gufa,mu gio guga gugisamana ndaga yena mu isoni:lufwa lusenda ngolu mu gusebila. ⁵⁵ Lufwa ngolu ziayi ziyo?Lufelu gubinga giayi gwi? ⁵⁶ Ngolu zi lufwa,gwena masumu:ye ayo yiguhanga ngolu mu masumu gwena misigu. ⁵⁷ Ha Nzambi asenzi madodji,yeyi ugu duwanga gibingu mu mbuga yi Fumu wedu Yisu Klistu. ⁵⁸ Mu gio anedu amala ye agosuna aluzolu,nugandamani gigola sila.Salenu mu mpila yi pimbu mu gisalu gi Fumu,nwisiyengi mbi gisalu gienu lo giena gi pamba mu mbuga yi Fumu.