¹ Mu yo idadila gungula yima mu mbingu ya asantu,salenu kega nga giga nulesidi gu dibundu di Galatiya: ² Mbi umoshi ye umoshi mu gadji dienu mu lumingu,ashi mu lugalu ayo yafana,mu wingi u gisalu gienzi gu nzwenzi,mu mpila mbi nugonzi gumena gudula gwami mu gugongula magabu. ³ Mu dangu di gakala gunwena nu,migadumisa miganda gwena yo una gapanini mbi yeyi adwadi magabu menu gu Yelusalemi. ⁴ Mbi mu gugakala telu mbi ami ngwenzi kega ye yeyi,mudu gasala mubembo ye yeyi. ⁵ Ami igesa gunwena nu,gunima di guvugisa Masedwani,mu mwila ami iga hida mu mbuga yoyo. ⁶ Gwena telu mbi ami pidjisi mafugu gunwena nu,mbi lo kega ami pidjisi gisiwu gimuwundu gu nwena nu.Mu gio anu nufana gusadisa mu gulanda mubembo wami ago gwifana gwenda. ⁷ Ami lo izola mbi mu mbalu yi ami inudadi buna mu gihida,ha inunga ,u gukala yanu mwa mafugu,mbi fumu Yisu uzola. ⁸ Dangu di ami igakala gu Efezo de mu Patekote, ⁹ Mu mwila mbelu yena sila wasi ami mugu sala gigola,ye ambeni ena engi. ¹⁰ Mbi Timote udula,anu nufana gumugieba mu mpila mbi yeyi agonzi gukala mu woma mu gadji dienu,mu mwila yeyi agusalanga yikima nga ami mu gisalu gi Fumu Yisu. ¹¹ Lo gwena ye mudu ufana guniogula.Musadisenu mu gulanda mubembu wenzi mu ngemba mu guginziga gwenzi gungiena mi,mu mwila ami ngiena mugu mumena ye apangi amoshi. ¹² Mu yo idadila pangi Apolosu,ami mimu wedi gikesa mu gwisa gunwena nu kega ye apangi ega,ha lo gwena sila luzolu lwenzi mu gusala mu dangu di:yeyi magesa mu dangu diaga zwa mpila. ¹³ Salenu mesu magwanzuluga,gandamanenu mu lugwigilu,kalenu gikesa,hana ganangenu manunga. ¹⁴ Mu yikima yinu gasalanga,salangenu ye luzolu. ¹⁵ Sendenu kega musigu wu anedu amala ye agosuna,anu nwisi mbi ganda di Sitefana diena lundumba lutegu lu Akayi ye diodi diga dihana mu gisalu gi asantu. ¹⁶ Anu nufana gulemvugila hadu a mutindu wo,ye gwena o agusalanga ye gunioguga ye owu. ¹⁷ Ami ngiena mu kiesi mu gudala Sitefanasi,Foditina yr Akayikusi,owu maga lombidi ndolula mu mwila gugonda gowu, ¹⁸ Mu mwila owu magengisidi ngemba mu muzima wami ye wenu,anu nufana gwisiya gusebila ye hadu a gifa gini. ¹⁹ Mabundu ma Aziya manu dumisa mbodji. Akila ye Pidisiliya ye mabundu mo magu vugananga mu nzu yowu,adumisa mbodji zingi sila mu kumbu yi Fumu Yisu. ²⁰ Apangi amala ye agosuna akima anu dumisa mbodji.Hana ganangenu mbodji zi asantu yenu ye yenu. ²¹ Ami Polu aba gunuwa mbodji gu miogu miami beni. ²² Mbi mudu lo agu zolanga Fumu Yisu Klistu,ala gilami gubiya,Malanata. ²³ Wega mbi ngolu zi Fumu Yisu Klistu zikadi yanu! ²⁴ Luzolu lwami lwena yanu akima mu gadji nga Fumu Yisu Klistu.