¹ Dangu diga hosanga mandaga magi saga saga ma hadu ye ma wanzio,mbi ami lo ngina ye zola,ami ngiena nga ngoma yiba gubula pamba pamba. ² Ye mu dangu diga senda gabu di gubigula,gisina gi maswe gamu makima ma Nzambi,ye kega ndungi,dangu diga senda ata lugwigilu lukima de mugu gidula miselu,mbi lo ngiena ye zola,ami ngiena pamba. ³ Ye ata ami mi hana gubaga gwami mu mwila gidisa a mpomfi,ata ami mihana mwila wami mu guwosa,mbi ami lo ngiena ye lugwigilu,yikima yo lo yena mfunu. ⁴ Luzolu lwena guganda muzima,lolu luga zala ye mapimbu,luzolu lo lugu nunanga,luzolu lo lugu lugumisanga,lolu lo lugu lusanga mu lulendu, ⁵ Lo lugu salanga ata gima mu ginswegi,lolu lo lugu gambanga miluda mienzi beni,lolu lo lugwifanga kabu,lolu lo lugu nungilanga mudu mu mabi, ⁶ Lo lugu kalanga mu kiesi mu gugonda gagidi,ha lolu lugu kalanga mu kiesi mu gagidi; ⁷ Lolu lugu lolulanga yikima,lugu gwigilanga muikima,lugusanga muzima muikima,lolu luguganda muzima muikima. ⁸ Luzolu lo lugu fanga ata kiyo.Mapanzi magu bigulanga muma gasuga,mandanga magifa ye gifa mu maga suga,ndungi mu zigabila. ⁹ Mu mwila adu dwisi mapanzi ndambu,ye adu dugu bigulanga mapanzi kega ndambu. ¹⁰ Ha mu dangu di gesa mapanzi mo mena magidi,ayo iguka langa dundambu-dundambu migabila ¹¹ Mudangu diga kedi mwana galengi,ami ihosanga nga mwana galengi,inunganga nga mwana galengi,isalanga nga mwana mwana galengi,mu dangu di guma mbuda,ami di gadula mahanga makima me yisalanga ma ulengi. ¹² Mwanongu adu dugudalanga nga gidu gudalanga mu gipela,nga mu piba,ha adu mudu gadila mbunzu ye mbunzu;mwanongu ami ndambu,ha mugio ami mi gesiya nga gi gesiya ganini. ¹³ Dangu di gilesuga yima yikima ayi isadu yikadi:lugwigilu,gusa muzima,ye zola;ha gima gihida uneni gwena zola.