¹ Paulu wu kuma diaka ku Delebe ye ku listila, ye gana ga kala longoki mosi nkumbu anu Timothe. Muana yakala wu besi yudda wu mukuikisi se diani gu kala muisi Ngeleka. ² Ba mpangi ba ba kala ku listila ye ku Ikone ba teledingi kimbangi ki mboti mu diambu yandi. ³ Paulo gu zoledingi mu ku nzieta ye yandi wu baka ye wu zengisa sutu mu diambu di ba yuda ba kala muna lambu wuna, kadi bankulu ba zaya nde se diani wu kala muisi Ngeleka. ⁴ Mu ntangu ba kesi lutanga mu zi mbanza, bakesi sisanga bi tumu mu mabundu mu ku sa nde ba tumama mu nzengolo zi bisono bi bantumua ye ba ngudi za bantu ba Yelusalemi. ⁵ Mabundu ma siamusua mu minu ye ma kudidingi mu ntalu kilumbu muna kilumbu. ⁶ Paulu ye bakundi bani basabuka mu lambu nsi Philipia ye wu Ngalatia, kandila bu ba kakumusua ku mpevi ya nlongo mu kolongila mambu ma Nzambi mu bizuinga bi Asia. ⁷ Mu ntangu ba kuma ga mpela Misia, ba meka mu kota ku Bitinia kansi mpevi yi Yesu yi ba kakidila. ⁸ Baluta ku Misia ye ba kulumuka ku Mbanza yi Toloa. ⁹ Paulo gu mona mona meso mu mpimpa: Muisi Makedonia gu telema gana, wu mbokila ye wu kedi ku zayisanga: " nza wisa ku Makedonia ye wu tu sadisa." ¹⁰ Mu ntangu Paulo ka mona mona meso, muna ntangu yina tu baka ngindu mu kuenda ku Makedonia, tu kuikila nde Nzambi wu tu bokela mu ku ba longila nsamu Nzambi. ¹¹ Mu katuku tuka Tola, tu sala mu nzila yi sungama na te ye ku Samotolake, ye kilumbu kilanda tu kuma ku Neapoli; ¹² mu tuka kuna, tu yenda ku Philipi yina Makedonia, yina mbanza lutidi nfunu, mu kati bi bitini ye yena nsi yi kala mu kinanga besi Loma ye tu sala muna mbanza yina kitesu ki ndambu bilumbu. ¹³ Mu kilimbu ki sabata tuyenda ku nzila kielo ku mbela nkoku wuna tu yindula nde kikala kifulu ki lusambulu, tu vuanda ye tu kedi zayisanga ku ba nketo bana bakala kutakana. ¹⁴ Nketo mosi nkumbu ani Lidia nteki miledi mi mpumbu mu mbanza yi Tiatila wu sambidingi Nzambi, wu kesi ku tu wanga. Mfumu wu zibula ntim'ani mu ku sa nde katoma visa mambu ma zayisingi Paulo. ¹⁵ Mu ntangu ka botama, ye nzo ani yakulu, wu tu lomba ye wu zayisa: " Go lu kuikidi nde ngiena wa kuikama mu mfumu, nza luisa mu nzo ami ye lu vonda." Ye u ba kuikidisa. ¹⁶ Bukula bonso tu kesi kuendanga gana kifulu ki lusambulu, muana ndumba gu mosi, wu kola ye mpeve yi mbikudulu wu yisa kutana ye beto. Wu natiningi ndandu yi nene ku mfumu zani mu ku mbikululu. ¹⁷ Nketo yoyo wu kesi landanga Paulo ye beto, gu kaya ye wu goga : " bantu bobo bena bisadi bi Nzambi a mpungu muna bifulu bi zangama. Beti ku lu zayisa nzila mpulusu." ¹⁸ Wu sala buna bilumbu bi mbidi. Kansi Paulo, wu toma dasuka, wu baluka ye wu zatisa ku mpeve: "Ngieti ku zayisa mu nkumbu a Yesu Klisto wu tuka mu yani." Ye wu tuka muna ntangu yina. ¹⁹ Mu ntangu zi mfumu zani ba mona kivuvu ki ndandu awu ki katukidi, ba kanga Paulo ye Sila ye baba tula wana kifulu ki zandu ga tuala zi ba mfumu. ²⁰ Mu ntangu ba ba songa ku bazuzi ba zayisa: " Bo bantu bena ba yudayo ye ba ta tula mvualangani mu mbanza beto. ²¹ Ba ta longila mambu mana kamena mu nsiku ko ku beto tu tambula ye tu sadila bonso besi Loma." ²² Ndonga yi tedimina Paulo ye Sila, ba zuzi ba pasula mvuatu miau ye tuma ba ba zuba mu minti. ²³ Kunima bu ba ba zuba, mu nzuba yi mbidi, ba ba tuba mu nzo nkodi. Ye ba sikdisa ku kengi a nzo nkodi ka toma ku ba lunda mboti mboti. ²⁴ Mu ntangu ka ba lutumunu lolo, nkengi a nzo nkodi wu ba tuba muna kati ki ndunda nzo nkodi ye wu ba kanga kisu mu malu mau. ²⁵ Mu kitesu ki fuku di ntangu Paulo ye Sila ba sambidingi ye ba yimbidingi nzitusu kua Nzambi, ye ba nkodi ba nkaka ba ba widingi. ²⁶ Mu mbala mosi, ndikununu yi ngolo yi ntoto yi yisa, mpila mosi tufulu tua nzo nkodi tua nikuka, mumbala mosi, bielo biakulu bizibuka ye bisu bi nkodi mosi mosi bi zibuka. ²⁷ Nkengi a nkodi wu vumbuka mu tolu ye wu mona bielo ki nzo a nkodi bi zibuka, wu baka sabola ye wu zola ku ki gonda, mu diambu gu yindula nde ba nkodi bakulu ba tininingi. ²⁸ Kansi Paulo wu kaya mu ndinga ngolo mu zayisa : " Ku kisadi ma mbi ko, kadi bantu bakulu tuena kueto gogo." ²⁹ Kengi nkodi wu lumba muinda, wu kota mu zuilu ye ku titila ku bu nkuta, wu ki tuba ga ntuala malu ma Paulo ye Sila. ³⁰ Wu ba tukisa kuna ye wu zayisa: " mfumu nki i lendi sala mu ku sa nde yi vulusua." ³¹ Ba vutula : " kuikila mu Mfumu Yesu ye si wu vulusua ngeyi ye nzo aku." ³² Ba samuna ngogo mfumu ye ku bakulu ba kala muna nzo'ani. ³³ Buna nkengi a nkodi wu ba baka mu ntangu yina yi mpimpa, wu sukula mputa zau ye wu botama muna ntangu yina, yandi ye nzo'ani. ³⁴ Wu nata Paulo ye Sila kuna nzo ani ye wu ba gana madia. Wu yangalala ngolu ki ntuadi ye nzo ani yakulu, mu diambu bakulu ba kuikila mu Nzambi. ³⁵ Mu ntangu kuma bu ku kia, miyandi ba tuma ba zayisa ku makesa: "Yambula bantu bobo benda." ³⁶ Nkengi a nkodi wu nata nsamu wowo ku Paulo, wu zayisa: " Miyandi ba ntumini mu kulu zayisa nde yi lu yambula luenda; bungangi, lutuka ye luenda mu yenge." ³⁷ Kansi Paulo wu ba zayisa: " Ba tu zuba ga meso ma bantu bakulu, beto besi Loma, ka beto ka tusadi mbi mosi ko. Ba tu tuba mu nzo nkosi ye bungangi betti ku tu tula ku nganda mu kinsueki? Nkatu! Ka yi buna ko! besa ba ba mosi mu kutu yambula." ³⁸ Makesa ba vutula ma ngogo momo ku ba miyandi bu ba bakama bunkuta mu ntangu ba wa nde Paulo ye Sila ba kala besi Loma. ³⁹ Miyandi ba yisa ku ba dodokila ye mu ntangu ba ba tukisa mu nzo nkodi, ba lomba ku Paulo ye Sila ba katuka mu mbanza. ⁴⁰ Paulo ye Sila ba tuka mu nzo nkodi ye ba yenda ku nzo Lidia. Mu ntangu Paulo ye Sila ba mona ba mpangi, ba ba nsiamisa ye kunima mana, ba katuka mu na mbanza.