¹ Bukala kuna Ikone nde Paulu ye Balabasi bubakota kumosi muna nzo lusambulu yi ba yudayo ye bagoga muna mpila mosi nde bayudayo babengi ye bagrekia bakuila. ² Kansi bayudayo bakonda luzitu bakuamisa Mpefi yi ba mimpani ye ba bakumisa bonso mintantu ku bampangi bau. ³ Bakala kuna ntangu yinda, bagoga mu bulemfo biakulu kumosi ye lulendo lu Nzambi ye batela mambu ma nlemfo ani kimbangu. Baganga bo mu kugana luve nde bidimbu ye bimangu bisalama muna moko ma Paulu ye Balabasi. ⁴ Kansi nkangu wakulu muna mbansa u kabana : bankanka bakala ku ndambu yi bayudayo ye bankanka ku ndambu zintumua. ⁵ Bamimpani ye ba yudayo bavukana mu kugana lukuikulu ku Mfumu zau. Bakuamisa ye bazuba matadi ku Paulu ye Balabasi. ⁶ Bau babazayisa ye batinina muna mbansa zi Lycaoni, Lystre ye Delebe ye muna mbansa yi kinzungidila. ⁷ I kuna balongila nsangu zimboti. ⁸ Kuna Lystre, muntu mosi ukala ufonga kakala kikesa ko mu malu mani tuka mbutuk'ani kakidiatila ko. ⁹ Muntu yo ukesi wa Paulu. Ye Paulu bukatala meso muna yani ye umona nde muna yuna ukala ye lukuikulu mpasi nde kabeluka. ¹⁰ Buna untela mu ndinga ngolo : "Telema muna malu maku". Ye muntu u pamuka ye u diata. ¹¹ Makabu bubamona mambu maganga Paula, bazangula ndinga ye bagoga mu ndinga ki Laocieni : "Banzambi ba kulumukini ku beto mu kifuani ki bantu". ¹² Ba bokila Balabasi, "Zeus" ye Paulu, "Mercure", kadi yani insamuni unteti. ¹³ Nganga u Zeus u vuidi tempelo u kala gana muelo u mbansa u nanta zi ngombi yi bitemba muna mielo yani yi kibuka bazola ku gana kimenga. ¹⁴ Kansi zintumua Balabasi ye Paulu bawa mau, ba pasula mvuatu miau ye banuanina gana kati ku kibuka mu ku kaluka. ¹⁵ Ye ba goga : Bantu, mu diambu di nki lutagangila buna? Beto mpe tuna Bantu kumosi yi makani ma mosi bonso beno. Tu lu natini nsamu u mboti mu kati yi wau lufueti baluka ye yambula mambu makonda mfunu mpasi nde lutala ku Nzambi u moyo u ganga zulu ye ntoto, mbu ye biakulu bina muna. ¹⁶ Mu ntangu ziluta, u gana luve ku konso makanda ma diata muna nzila zau kibeni. ¹⁷ Kani nde ka yambulako mu ku ta kimbangi mu ma kenina, u ganga ma mboti, bu ka lugana mvula zi zulu ye nsungi zi lubutu, mu ku ludikila ye ku lu tebisa ntima mieno ye kiese. ¹⁸ Kani nde min' gogo, Paulu ye Balabasi ka ba ba yambula ko mu lembi ku ba kakidila mu ku bagana bimenga. ¹⁹ Bayudayo bankaka besi Antokia ye Ikonia bayenda ye banunga kibuka. bazuba matadi ku Paulu ye bankaka ku nima mbansa, ba yindula nde fuidi. ²⁰ Kansi mu ntangu, minlongoki mikala mu nzuingani, utelama ye u koka muna mbansa. Mu kilumbu kilanda, u yenda kuna Delebe kumosi yi Balabasi. ²¹ Kunima kulongila nsamu u mboti muna mbansa ye bu ba kutula ba mi nlongoki, ba vutuka ku Lyste, ku Ikonia ye Antokia. ²² Ka bayambula ko mu ku siamisa Mpefi yi ba minlonguki ye ku ba gana kikesa mu ku tatemina mu na kivuvu ye goga : "Muna nzila mpasi zingolo nde tufueti kotila muna kimfumu ki Nzambi". ²³ Bu batula bambuta muna kuka bi minkuikidi ye kunima kusambila ye kumina nsoki, ba bayekula ku Mfumu yu ba kuikila. ²⁴ Baluta buna Mpisidia ye ba kuma kuna Pamfilia. ²⁵ Basamuna mambu ma Nzambi ku Pelega bakulumuka ku Atali. ²⁶ Kuna, basabuka ku Antokia ye babaka nlemfo u Nzambi mukisalu kibamanisa. ²⁷ Bu bakuma kuna, Antokia, bakutakasa dibundu, babazayisa mambu ma bagangila Nzambi bonso bukazibula muelo u kiminu ku mimpani. ²⁸ Bakala kuna ntangu yi yingi ye minlonguki.