¹ Gakala muntu mosi mu mbanza Kayisali, nkumbu yani yikala Kornelio, ² Wukala muntu wunlongu, mosi yusambidingi Nzambi ye nzo yani yakulu. wugeningi buingi mbongu ku Bayuda ye wusambidingi Nzambi mu ndandidila. ³ Kumbela ntangu ye vua yi kilumbu, wumona mu kienzudila mu mbuenu yimosi mbasi Nzambi yisidi ku yani. mbasi wuntela:<< Kornelio!>> ⁴ Kornelio mbasi wuntela mbumbuluka mu mesu ye wonga wumbaka wuta:<< nki biomueni mpangi?>> mbasi wuta:<< tusambulu tuaku ye minkayilu miaku ku bamputu mi tombokedi bonsu nkayilu wungindamanu ku ntuala Nzambi. ⁵ Bungangi fila bantu mu mbanza ku Yope mu bokidisa muntu mosi babokilanga Simoni, babokilanga diaka Petelo. ⁶ Wuzinganga ye nketi nkanda mi mbisi wubokuluanga Simoni yu wuna nzo ku mbela mbu.>> ⁷ Muntangu mbasi gogesengi ka katuka, Kornelio wubokila minsadi miandi miodi ye kesa dimosi wusambidingi Nzambi gakati kibawu bakala musalu kiyani. ⁸ Kornelio wubatela makulu maluta ye wubafila ku Yope. ⁹ Landila lumbu kimbasi muntangu yi sambanu ngatu, bansu bubakala mu nzila ye ba finameningi ku mbanza, Petelo wumata ku nludi mu kusambila. ¹⁰ Nsatu yimbaka ye wuzola dia kani kima. kansi muntangu yibanlambidingi madia, wubua mu kiesi, ¹¹ Ye wumona zulu dizibukidi ye kalu dikulumukiningi, kima kimosi bonsu nkuala yineni yikulumuka ga ntotu, yisimbukidi mu nsongi zi ziya. ¹² Ku kati ga monika mbisi zakulu zi malu maya ye zi zanzalanga ye zinuni zi zulu. ¹³ Mbosi ndinga yimosi yintela:<< telama kuaku, Petelo, gonga ye dia!>> ¹⁴ Kansi Petelo wuta:<< nkatu, Mfumu kadi kani kidia kuamu ku bisumuka ye bimvindu.>> ¹⁵ Kansi mu nkumbu yizodi ndinga yiyisa ku yani diaka:<< bi Nzambi katudidi bivedila, kubokidi biawu bi sumuka ku.>> ¹⁶ Mana maluaka nkumbu tatu ye buna kalu di natuka ku zulu.>> ¹⁷ Muntangu yi Petelo kakala bufuana mu keti keti, mudiambu di mbangululu mbuenu yi kabaka, tala, bantu bafidusua ku Kornelio, kunima mbakulu nduengosu yi nzila nzo, bakuma kuntuala muelu. ¹⁸ Ye babokila mu ndinga yizanguka ye bayufula keti Simoni diaka wubokuluanga Petelo wukala gana. ¹⁹ Buna Petelo kuyinduedingi diaka mu mbuenu, Mpevi yintela:<< tala, bantu batatu bata kusosa. telama kuaku. ²⁰ Kulumuka ye wenda bawu. kukadi wonga ku mu kuenda ye bawu kadi munu yibafididi.>> ²¹ Petelo wukulumuka buna ye wuta ku bantu:<< ngina yu luta sosa, mu nki diambu luisidi? ²² Bavutula:<< Kornelio, muntu wu sungama ye wuvuminanga Nzambi, ye muyo nsi yakulu yi Bayuda batelanga kimbangi ki mboti wuluengoso ku mbasi Yinlongo mosi yi Nzambi mukukutuala ku nzo yani mpasi mu wa nsamu mosi ku ngeyi.>> ²³ Petelo buna wuba bombidila mu kota ye kala ye yani. nsiuka wulanda, wu telama ye wuyenda bawu. bankaka mu bawu bampangi ba Yope bayenda yani kumosi. Lumbu kilanda, baluaka ku Yope. Kornelio wubavingidingi ye wubokila ba bayani ye bakundi bani ba ntima. ²⁵ Muntangu Petelo kakota, Kornelio wuyenda kuntuala yani ye wubua mu malu mani mu kumvumina. ²⁶ Petelo wuntedimisa ye wuntela:<< telama kuaku, munu ngina diaka muntu.>> ²⁷ Muntangu Petelo kamokeningi ye yani, wukota ye wumona bantu bambidi bakutakana. ²⁸ Wubatela:<< benu kibeni luzeyi nde dina dikakululua ku Nyuda mu nieka ye nzenza mosi ata dikumbumina kansi Nzambi wusongedi nde kubokidi muntu mosi nkutu wu sumuka ye mvindu. ²⁹ Mudina ngisidi kondua ku mpaka muntangu wumbokedi. munki diambu wumbokeledi?>> ³⁰ Kornelio wuvutula:<< geka lumbu biya mu yo ntangu, ntangu yi vua, yisambidingi mu nzo munu ye tala, muntu mosi wutelama wuvuata mvuatu milezima. ³¹ wuta:<< Kornelio lusambulu luaku luwisakeni ku Nzambi, ye Nzambi banzidi minkayilu miaku ku bamputu. ³² Fila kuaku ku Yope ye bokidisa muntu mosi mu nkumbu Simoni yu wubokidilanga diaka Petelo. wuzinganga mu nzo nkiti minkanda mimbidi wubokuluanga Simoni, kumbela mbu. ³³ { Muntangu yina kaka yifila ku ngeyi ye wugangidi bumboti mukuisa.bungangi nkutu tuna betukulu gantadisi ntuala Nzambi mu kuwa nua Nzambi kakulongesedi mu kututela.} ³⁴ Buna Petelo wuzibula nua ye wuta:<< mukedika, nzayididi nde Nzambi kaganganga disuasani ku gakati ki bantu. ³⁵ Kansi bika nza yakulu, yuna wukumbanganga ye wumvuminanga ye ganganga lusembo kayangalala mu yani. ³⁶ Luzeyi nsamu nde wufidisa ku nkangu Isayeli, mukuba samunina nsamu wumboti wungemba mu Yesu Klisito wuna Mfumu bakulu. ³⁷ Luzeyi benu mosi ma maluta mu Yuda diakulu, yantikila mu Ngadidi, ku nima mbotokolo yina Youni kalonga; ³⁸ Wombokolo yitadila Yesu muisi Nazaleti, bueyi Nzambi kankusa Mpevi Yinlongu ye lulendu. wuyedingi mu ngangulu mamboti ye mbukulu bakulu bawu bakala bakuamusua ku diabulu kadi Nzambi wukala yani. ³⁹ Tuna bambangi ba bima biakulu bio bikala mpi diaka munsi baYuda ka ku Yelusalemi ku yo Yesu yu bagonda mu nkomono gana nti. bawu bagondisa bu bankomisa ga kulunsi. ⁴⁰ Kansi Nzambi wu kumfulukisa mu kilumbu kintatu. Nzambi wusa nde Yesu ka monika. ⁴¹ Ka ku bantu bakulu ku, kansi ku betu Nzambi bakakisodila bonsu zinzambi. betu tudia ye tunua ye yani bu kamana fuluka mu bafua. ⁴² Yesu wutu tuma mu kulongila masonukua ma Nzambi ku bantu nde iyani Nzambi katula mfudisi yi bamoyu ye bafua. ⁴³ Imudiambu diyani mimbikudi miakulu migoga, bagoga nde konsu muntu wukuikilanga mu yani, masumu mayani sima lembukila mu lulendu lu nkumbu yiyani. ⁴⁴ Mu ntangu Petelo yikakala longanga, Mpevi yi Nlongu yi kulumuka ku bakulu bakala wanga malongi mayani. ⁴⁵ Minkuikisi miakulu mi Bayudayo miyisa ye Petelo mitoma kitukua mukumona nde Mpevi yi Nlongo yigana Nzambi yi dukuka mpi kubawu kabena ba Yudayo ku. ⁴⁶ Kadi bawu babawa beta goga mu zindinga zilembolu zayakana ye beta sika buneni bu Nzambi. buna Petelo wuyufula: ⁴⁷ tulendi kakidila bantu baba mu botukua mu masa, bawu bubatambuedi Mpevi yi Nlongo? ⁴⁸ Ye yani wutuma mu kuba botika mu nkumbu yi Yesu Klisito. buna bawu banlomba mu kala yawu ata bilumbu bikua.