¹ Mumpila yina, benu luna bankentu, lutumama ku bayakala babenu kibeni. luganga bu mpasi nde, kani go bantu bankua kabatumama ku mu ngogu, mu ndiatulu bankentu bawu, ngogu wu banunga; ² Kadi nga bamona ndiatulu benu yi kedika ye vumi. ³ Bika mana magangama ye konda ntoku zi nseki: nsuki zikangama, bilunga bi wola ata nledi mina mu nsadulu. ⁴ Bunkaka, bika mana magangama mukati ki ntima kimuntu, ye ntoku yizinga mu mpefi lemvuka ye bumpombu, mana mena ntalu kuntuala Nzambi. ⁵ Kadi bankentu banlongu bukikala ba kitudidingi ntoku mu mpila yina. bakala ye vumi mu Nzambi ye batumameningi bayakala babawu. ⁶ Muyuna mpila, sala wutumama ku Abalayami ye wumbokedingi Mfumu yani. luna bungangi bana bayani, go lugengi momuini mena mamboti, ye go kalubengi ma mpasi ku. ⁷ Mumpila yina, benu bayakala, lufeti zinga mu nkadilu yi zola ku bankentu benu, bonsu nlondu wubudikanga, nkentu. lufeti bagana luzitu bonsu mvingidi mi difua ga kimosi mu lukawu lu luzingu. luganga buna musande bisambu bibenu ka bikululu ku. ⁸ Mpasi, benukulu, lukala dibanza dimosi, lukala mimfue mikiadi, lukala ye zola ku kimpangi, lukaya mesu ye balemvuka. ⁹ Kaluvutudi mambi mu mambi ku ata malewu mu malewu. bunkaka, lutatimina mu sakumuna kadi mu buna lubokuedi, mpasi mu kingila difua di lusakumunu. ¹⁰ "Yunazoledi luzingu ye bilumbu bimboti feti yambula luvunu ye tina ngununu zakulu. ¹¹ Kagana momuini mena mambi nima ye ganga momuini mena ma mboti. kasosa ngemba ye kalandidila yuna. ¹² Mesu ma Mfumu mamonanga bankua lunungu ye makutu mayani mawanga ndombolu ziyani. kansi luse lu Mfumu kalutalanga buna ku baganga mambi." ¹³ Nani yuna si wuluganga mambi go si luzola momuini mena ma lunungu? ¹⁴ Kansi go luta mona mpasi mukuma ki lunungu, basakumuka luna. ka lubangi ku bana babanganga. ka luvinsuki ku. ¹⁵ Kansi lukadila Mfumu Yesu nlongu mu mintima mibenu. lukala bilumbu biakulu bakubama mu vutula ku konsu yuna si wuluyufula mudiambu dinki luna ye luzolu mu Nzambi? luganga mana mu nlemvu ye luzitu. ¹⁶ Lukala ye zola ku mboti musande bantu bana balewulanga kinlongu kibenu mu Klisto bakala nsoni mudiambu beta lugogila mu mandengu bonsu luna mvangi mi mambi. ¹⁷ Buna bumboti, go Nzambi zoledi buna, nde lumona mpasi mu ngangulu mamboti ka mu ngangulu mambi ku. ¹⁸ Yesu diaka wumona mpasi kumosi mudiambu di masumu. yani nkua lunungu wumona mpasi mudiambu tukonda lunungu mu kutunata ku Nzambi. wugonduka mu nsuni kansi wunatuka mu luzingu ku Mpefi. ¹⁹ Mu Mpefi, wuyenda ye longa ku mpefi zina bobuini mu boloku. ²⁰ Bakala minkolami mu ntangu luzindalulu lu Nzambi luvingidingi muntangu bilumbu bi Nowa, muntangu bilumbu bintungulu nzaza ye Nzambi wugulusa bankua yani kaka( miela nana) landila mu masa. ²¹ Yoyani yi kidimbu ki masa kilugululanga bungangi( kabua ku bonsu nsukululu mvindu nitu, kansi bonsu nganunu bunkabu mu muela wumboti ku Nzambi) mu mfulukulu Yesu Klisto. ²² Klisto wuna kulubakala lu Nzambi. wuyenda ku zulu, zimbasi, bimfumu ye tulendu bafeti kuntumamana.