¹ Bunani, bokina nde Klisto wumona mpasi mu nsuni, luvuata binuanunu bumosi; kadi konsu yuna mueni mpasi mu nsu manisi buna ye masumu. ² Mukuma kiokiyani, muntu mpila yoyini keta zinga diaka mu binzodila bi bantu ku, kansi mu luzolu lu Nzambi ku masidi mu luzingu luyani. ³ Kadi ntangu yifuana yilutidi mu ganga luzolu lu bapakanu: mbuenu, lakukila moyu, nduinu zinkolu, mpambusu, bifu bimbi ye maganga makonda nsumu ye biteki. ⁴ Bamonanga buna kinzenza nde benu ka lutakananga ye bawu ku mu maganga mabawu ku ye gombisa, buna bagoganga mambi mu benu. ⁵ Si bavutudila bawu kuyuna wuna wukubama mu fundisa bamoyu ye befua. ⁶ Mukuma kiokini nsamu wumboti diaka wulungulu ku mvumbi, mpasi nde bakala bafundusu mu nsuni bonsu bantu, beta zinga bonsu Nzambi mu Mpefi. ⁷ Nsuka makulu yitafinama. bunani, lukala banlongu mu Mpefi, ye binzodila mu mabanza mabenu mukuma ki bisambu. ⁸ Ga zulu di makulu, lukala benu ye bankaka mu zola kulutidi, kadi zola kufikanga mafunda ye mafunda ma masumu. ⁹ Lukala nzodi banzenza benu ye bankaka konda kuvunguta. ¹⁰ Bonsu konsu yuna mu benu wutambula lukawu, lusadila luawu mu sadila benu ye bankaka. lugangila buawu bonsu nkebi mi mboti mi kimvuama ki minkayilu mi mpila mu mpila mi ngofu ku Nzambi. ¹¹ Go muntu gogedi, kani bukala nde ta sambila bisambu bi Nzambi; go muntu ta sadisa, kagangila buawu ye ngolu zoziyzni Nzambi kantuikidi. luganga mambu momuini musande mu mpila zakulu, Nzambi kamonisa nkembu ku Yesu klisto. ku Yesu kuna nkembu ye lulendu mu mvu ye mvu. Ameni. ¹² minzodi, kalumoni kinzenza ku nsinsani tiya yilueki, bonsu kuani diambu nkutu kadikifu ku dilukumini. ¹³ Kabuaku, kabufueni kani finduelu tesu ki mampasi ma Klisto luta siaminina, luyangalala, musande luyangalala diaka ye lukala kiesi mu ntangu nkembu yani si wumonika. ¹⁴ Go balulewedi ;u kikuma ki nkumbu Yesu, lusakumukini, mu diambu Mpefi nkembo ye Mpefi Nzambi yina ga benu. ¹⁵ Kansi nkantu ku benu ka mona mpasi bonso mvondi bantu, muifi, ngangi mambi, ovonkua kinsuekila. ¹⁶ Kansi, go muntu ta mona mpasi bonso muklistu, kakadidi bwani nsoni ku; kabuaku kakembila Nzambi ye nkumbu yoyani. ¹⁷ kadi yoyini ntangu mfundusu ku yantikila mu nzo Nzambi. Ye go yantikidi ku betu, mki si kikala kikunku ki bobani balumamanga ku ku nsamu wu mboti? ¹⁸ Ye go "nkualunungu vulusu ye mpasi, nki si kakuma wumbi ye nsumuki?" ¹⁹ Mu diambu dio diani, bika bobani bata mona mpasi bonso luzolu lu Nzambi,bagana miela miawani ku mvangi wu nlemvu, mu ngangulu yakulu yi ma mboti