¹ Wana se tuavova ? Tuatatamana zingila mu masumu mpasi vo n'lemvo wawokela ? Ka buna kutu ko! beto tuafua mu ² masumu, weyi tufuete zingila diaka mu masumu e? ³ Kalu zeye ko vo babo babotukua mu Yesu Klisto, babotukua mpe mu lufua luani e? ⁴ Kadi tuazikua yani mu mbotokolo, yi mu lufua. Diadi diavangama, mpasi vo bonso Klisto, ka fulukila mu bafua mu n'kembo wa Se, beto mpe, tuadiatila mu luzingu lua mpa. ⁵ kadi vo tuabundakesua ye yani mu lufua luafuanana ye luani, si tuabundanesua mpe ye yani mu mfulukulu. ⁶ Tuzeye vo muntu eto wankulu wakomua yani, mpasi nitu a masumu yafuasua. Didi diavangama mpasi vo ka tukadi nanga mia masumu ko. ⁷ Ndo wafua wabikua walunungu va ntuala masumu. ⁸ Vo tuafua ye Yesu Kisto, tukuikidi vo se tuazinga mpe ye yani. ⁹ Yuzaye vo Klisto wafuluka mubafua ye kalendi fua diaka ko. Lufua kaluna diaka lendo mu yani ko. ¹⁰ Kadi wafua, ye yi mu diambu dia sumu kafuila nkumbu mosi mvimba mvimba; kansi wuna moyo ye yi mu kuma kia Nzambi kenena Moyo. ¹¹ Mpila mosi, lufuete kivana mpe bonso bafua mudiambu dia sumu, kansi bamoyo mu Nzambi mu nzila ya Klisto Yesu. ¹² Yi mu diodio, kuvani nzila kua sumu ka kala ye wisa mu nitu aku lenda fua ko nate mu tambudila nzinunu zani. ¹³ Kuyekola ndambu za nitu aku mu sumu ko bonso kima kia sadila mu kondua kua lunungu. Kansi lukivana beno kibeni kua Nzambi bonso bafua bena bamoyo wuwu. Ye yekola ndambu za nitu aku bonso sadilu bia lunungu kua Nzambi. ¹⁴ Kuvani luve kua sumu ka kuyala ko, kadi kuna kunsi a n'siku ko, kansi ku nsi a n'lemvo. ¹⁵ Nki wana? Tulenda kueto nata sumu kadi ka tuna diaka ku nsi a n'siku ko, kasi ku nsi a n'lemvue? Ve kikilu. ¹⁶ Ka luzeye ko vo nduna kua nani wuta kiyekola bonso sadi yi yani tumamena, yi kua yani fuete tumamena? Didi dina dia ludi, vo luakala sadi bia masumu ma natanga ku lufua, yevo sadi kia ntumameno yinatanga ku ndungunu. ¹⁷ Kansi n'kembo wuvewa kua Nzambi! Kadi luakele mu kiwayi kia masumu, kansi luatumamene muna ngudi a n'tima mu mbandu ya ndongolo ya luveno. ¹⁸ Luakutulu mu masumu ye luakitulu luavuwa kua lunungu. ¹⁹ Yita vova bonso bu vovelanga bantu mu diambu dia ngioyelo za n'suni eno. Yi mpila mosi bonso luayekola ndambu zanitu zeno bonso biavuwa kua nsumukinu ye kua mambi, mu luaka nata va nsumukinu, mudina wuwu luyekola ndambu zanitu zeno bonso bivuilu kua ndungunu ye kua mpedoso. ²⁰ Kadi, kiokio luakala vua kua masumu, luakala kimpuanza vantuala a lunungu. ²¹ Muna ntangu yina nkia m'butu luakala miawu? M'butu miomio luta buakisa wunu. Kadi nsuka ya biawonso biobio yi lufua. ²² Kansi wuwu, kina vo lua vuluzua mu masumu ye luavuwa kua Nzambi, mpedoso yi m'butu mieno. N'sendo yi luzingu lua m'vu ya m'vu muna Yesu Klisto, Mfumu eto. ²³ Kadi n'sendo a masumu yi lufua; kansi e n'kayi wa ngovo wa Nzambi, yi luzingu lua m'vu ya m'vu muna Yesu Klisto Mfumu eto.