¹ Bika konso muela watumamena mfumu za zangama, kadi ka kuna kimfumu ki lembi tuka kua Nzambu ko. Ye biobio bina biatulua kua Nzambi. ² Ikuma, ndondo telamena kimfumu kiokio yani tinguni lutumu lua Nzambi; ye bobo batingunanga kio si batambula mfundusu a Nzambi mu bawu kibeni. ³ Kadi Mfumu ka zimonukunuanga wonga mu mavanga mambote ko, kansi mu mavanga mambi. Zolele walembi mona wonga wa Mfumu? Vanga mambote ye si wasanusunua mu diodio. ⁴ Kadi wuna n'sadi a Nzambi mu wete waku. Kansi vo venge mbi, kala mu wonga; kadi ka mpamba ko benena ye lendo kia tumba. Kadi yi sadi kia Nzambi, m'vutudi a mbi mu nganzi zani salanga mambi. ⁵ Yi mu kuma kiokio lufuete tumama, ka mudiambu dia wonga wa tumbu kaka ko, kansi mudiambu dia kansansa. ⁶ Yi mukuma kiokio lufutilanga mpaku. Kadi bamfumu bena sadi bia Nzambi, balandilanga mambu momo ntangu zawonso. ⁷ Luvana kua konso muntu kina kim'fuene: mpaku kua nduna fuene mpaku, vaku kua ndondo vaku, vumi kua ndondo vumi ki fuene. Luzitu kua ndondo fuene nzitusu. ⁸ Ka lukadi ye mfuka kua muntu ko, vo ka yoyo ya zolana beno ye beno ko. kadi nduna zolanga n'kuayani, nduna lungisi n'siku. ⁹ Kadi:" kute zumba ko, kuvondi ko, kuyiyi ko, kuzinina moyo ko", ye vo vena mpe ye n'siku wan'kaka, wukufikilu bonso ebu:" zola mfinanagani aku bonso ngeye kibeni." ¹⁰ Zola ka kuluekanga mfinangani ani ko. Isavo, zola yi ndugusunu a n'siku. ¹¹ Mudiambu didi, luzeye kala ntangu, vo ntangu yifuene kua beno mu sikama ku tulu. kadi wuwu mpulusu eto yifinamene beni lutila mu ntangu tuakuila kuna ntonono. ¹² Fuku dikumini kua nda ye lumbu kina lukufi. Tu Tukatula mavanga ma tombe ye tuvuata bianduaniana bia kia. ¹³ Tudiata bufuene, bonso mu muini, kamu min'kembo mia kimpubulu vo mia nkolua za malavu ko. Ye ka tudiati mu kadilu kia kinsuza vo mu nzinunu za kondua songa; ye ka mukitantu vo maketo ko. ¹⁴ Kansi luvuata Mfumu yesu ye kaluvani fulu kua n'suni, mu nzinunu zani ko.