¹ Buna ngita kulusiamisa, zimpangi, mu n'lemvo a Nzambi, mu yekola nitu zeno bonso n'kayilu wa moyo, wavelela, ye watodakana kua Nzambi, diodio dina dia lusakumunu lua biza. ² Ka luvukumukina nza yiyi ko, kansi luwutuluka mu nsobolo a mabanza meno, mpasi luazaya meyi mena ma mambote, mazolakana ye luzolo lua Nzambi kibeni. ³ Ye mvovele, mu kuma kia n'lemvo yavewa, bika ka muntu ko mu beno kakala nkutu ye ngindu za toma zangama mu yani kibeni zasuasuana ye zina zifuete kala. Kansi yindula mu mu nduenga bonso Nzambi kavanina kua muntu muntu mpila tezo kia minu. ⁴ Kadi, tuna ye ndambu zayingi mu nitu mosi, kansi ndambu zawonso kazina ye salu kimosi ko. ⁵ Mu mpila mosi, beto tuna bayingi, tuna nitu mosi mu Yesu-Klisto, ye tuna muntu muntu ndambu kua n'kayani. ⁶ Tuna ye n'kayilu mia mpila mu mpila landila n'lemvo wa tuvano. Vo muntu wuna ye n'kayilu, kasadilawo landila tezo kia minu kiani. ⁷ Vo muntu wuna ye n'kayilu wa n'sadi, kasala. Vo muntu wuna ya n'kayilu wa longa, kalonga. ⁸ Vo muntu wuna ye nkayilu wa siamisa, bika kasiamisa. Vo muntu wuna ye n'kayilu wa kaya, kavanga wo mu yenge. Vo muntu wuna ye n'kayilu wa yala, kavangawo mu wunkete . Vo muntu wuna ye n'kayilu wa n'lemvo, kavango wo mu kiese. ⁹ Bika zola kua kala kua kondua disu ku nsi a lukaya. Lubela bi, lukangamena mo mena mambote. ¹⁰ Mu matadidi zola kua kimpangi, lutoma zolana beni muntu ye n'kuayani. ¹¹ Mu matadidi ma n'sualu n'sualu, ka lukadi ye keti keti ko; mu matadidi Mpeve, lukala bakuikama, mu matadidi Mfumu, lun'sadila. ¹² Luyangalala mu vuvu kina yeno mu makun'tuala; luvibidila mu zintontolo; mu tatamana mu bisambu. ¹³ Bika nsatu za minkuikizi zakala zeno. Lukudika nsadulu zayingi mu toma kikanga zi nzenza. ¹⁴ Lusakumuna babo bakulu nuanisanga; lubasakumuna ye ka lubasingi ko. ¹⁵ Luyangalala ye bobo bena mu kiese. Ludila ye bobo beta dila. ¹⁶ Lukala ye ngindu zimosi ban'kaka ye ba n'kuayawu. Ka lukitumpidika ko mu ngindu zeno. Kansi lutambudila bobo bayoya. Ka lukadi bankua nuenga va meso ma beno kibeni ko. ¹⁷ Ka luvutula mbi kua bobo bakulu sadidi mbi ko. Luvanga mambote kua babo. ¹⁸ Vo dilendakana, mu ntangu zawonso, bika luakala mu luvuvamu ye babonso. ¹⁹ Ku vutula mbi mungeye kibeni ko, kansi bika mganzi za Nzambi za sala. Kadi diasonama: " Kua mono nsembolo" wuvovele Mfumu. ²⁰ Kansi vo mbeni aku fuidi nsatu, wun'vana kia ndia. Vo wuna ye nsatu a nua, wun'vana kia ndua. kadi vo wuta vanga wowo, yi makala ma tiya wuta kutakesa vana n'tu ani. ²¹ ku vuatua kua mambi ko, kansi nkutu nunga mambi mu mambote.