¹ Mudina mvovele, Nzambi walozele n'kangu ani? Ka wuna ko. Kadi mono mpe yi muisi Iseli, mukanda dia Abalahami, mu vumu kia Benyamini. ² Nzambi ka lozele n'kangu ani wowo kazaya tuka ntama ko. Ka luzeye momo mavovanga masonukua mu n'samu wa Elia ko, weyi kafundila Iseli kua Nbambi? ³ "Mfumu, bavondele m'bikudi miaku ye tengula kinlongo kiaku. Mono kaka nsidi ye bazolele zenga luzingu luame." ⁴ " Kansi nkia mvutu tambula kua Nzambi? Yakivambudidi mafunda nsambuadi ma bantu balembolo fukamena Baali." ⁵ Mpila mosi, mu ntangu yayi, vena ye nsadidila mudiambu dia nsolelo a n'lemvo. ⁶ Kansi vo mu n'lemvo, wana ka mu mavanga diaka ko. Vo kawawu ko, Wana nkenda ka zikala diaka nkenda ko. ⁷ Nki wane? Iseli kasoselenge, kiokio kabakidi ko; kansi basolua batambudi kio, ye basala ba badusua. ⁸ Ikedika bonso dia diasonamena : " Nzambi wa bavana Mpeve ya lembi kula, mpasi meso ka mamoni ko, ye mpasi matu ka mawe ko nate nkutu mu lumbu kiaki. ⁹ Ye Davidi wavova:" bika meza mawu makala konde, n'tambu, tadi dia mbuila ye ma babangumukina bawu kibeni. ¹⁰ Bika meso mawu makituka tombe mpasi ka bamoni ko. Lulunda nima zawu zakomvama ntangu zawonso." ¹¹ Buna ya vova:" Basansale nate ye zola bue?" Ve, Kansi nkutu, mu mbuilu awu mpulusu yaluaka kua bapakanu mpasi mu kubavana keto. ¹² Kansitu, vo mbuilu awu yi kimvuama kia nza ye nzimbanu awu yi kimvuama kia bapakanu , weyi wusinga kala nene kuawue? ¹³ Wuwu ngita vova kua bapakanu. Mu ntangu awonso ngina ntumua ya bapakanu, ngina ntoko mu kisalua kiame. ¹⁴ Ngatu ndenda wuta keto dia mpangi za mono mosi. ¹⁵ Kadi vo ntiakulu awu yita nata ku nguizani yanza ya wonso, weyi dikadila mu ntambudulu awu, vo ka yi moyo mu bafua kue? ¹⁶ Vo biantete bina bia velela, wowo mpe wufuete kadila ntini za m'bumba. Vo muanzi wuveleleso, yi mpila wosi mpe ye ntayi. ¹⁷ Kansi vo ntayi za n'kaka zakala za toloka, ye ngeye, ntayi ya vinia dia nfinda, lamikinu vana fulu kiawu, ye tambula mpe kimvuama kitukidi muna muanzi a n'ti wa vinia. ¹⁸ Ku kitundidika ku nima ya ntayi ko. Kansi vo wuta kitundidika, zayanga vo ka ngeye ko simbidi muanzi, kansi muanzi wu kusimbidi. ¹⁹ Kansi se wavova:" ntayi zakatulu kidi yalamikua." ²⁰ Ludi yi mu diambu dia kondua kuawu kua vuvu bakatudilua, kansi ngeye, siama mu diambu dia vuvu kiaku. Ku kadi ye ngidu zanene mu nge mosi ko, kansi kala ye vumi. ²¹ Kadi vo Nzambi kavukisa ntayi za nkunzu ko, kalendi mpe kuvukisa ko. ²² Isavo tala mavanga ma mbote ye m'balu a Nzambi. Va ndambu, m'balu wa buila bayudayo bobo babua. Kansi ku ndambu ya n'kaka, wete wa Nzambi si wakuluakila, vo wuna muna wete wani. Nga vo nkatu, ngeye mpe si wakatulua. ²³ Ye mpe, vo ka batatamena muna kandua kuawu kua lukuikilu ko, si balamikua diaka. Kadi Nzambi wuna yewisa mu kubalamika diaka. ²⁴ Kadi vo wazengua mu n'ti wa olive ya mumfinda ye, ka yina wavangilua ko, walenda lamikua mu n'ti mosi wa mbote wa olive, wana we nkutu bayudayo bobo bena ntayi zantete bafuete lembua lamikinua diaka muna n'ti awu kibeni wa olive? ²⁵ Kadi kilendi sa zola ko mpangi zame lua lembi zaya mansueki mama, npasi ka lukadi ye nduenga mu mabanza meno ko. Mansueki momo masongele vo vena ye ndambu a m'badusu mu Iseli nate bapakanu bawonso bamana kota. ²⁶ Yi bobo Iseli diawonso se dia vuluzilua, bonso diasonamena: " ku sioni sikua tuka m'vuluzi, si kavuluza Yakobi mu fu kiani kia bembola mambu ma Nzambi. ²⁷ Ye didi si diakala nguizani ame ye bawu kiokio se yakatula masumu mawu." ²⁸ Ku ndambu ya ntete, landila mambu ma Nzambi, bena batantu mu kuma kieno; kansi ku ndambu ya n'kaka, landila nsololo ya Nzambi, bena bakiazolua mu kuma kia Mase mawu. ²⁹ Kadi n'kayilu ye mbokolo a Nzambi ka bisobanga ko. ³⁰ Kadi mu ntama luakala n'kolami kua Nzambi. Kansi wuwu, lutambudi n'lemvo mu diambu dia nkolamenu zeno. ³¹ Mpila mosi, Bayudayo bobo, wuwu bena ban'kolami. Mvutu zakala vo, mu n'lemvo wu lutambudi, bawu mpe batambudi n'lemvo. ³² Kadi Nzambi wakangidila bantu babo mu nkolameno, mpasi vana n'lemvo ani kua babo. ³³ Oh nkoboka ya kimvuama tuka kia nduenga nate kia nzayilu a Nzambi ! Vo mfundusu zani ka zitezakene nkutu ko ye nzila zani kazizayakani! ³⁴ Kadi nani wazaya mabanza ma Mfumu? Ye nani wakitukidi n'luengisi'anie? ³⁵ Yevo buna, nani wavana kala kima kua Nzambi kidi kam'vudilakio? Kadi bima biawonso bina biani, mu yani ye kua yani. ³⁶ Bika n'kembo wavewa kua yani mu m'vu ka m'vu. Amen!