¹ Yesu wasempole mesu, womona mvuama zakala tula n'kayilu miawu muna panu. ² Wamona diaka fola dia mputu, watula sengo yole ya mbongo. ³ Ye wavova: " mu kieleka yilutelele, didi fola dia mputu di tudidi lutila bawonso bobo ban'kaka. ⁴ Bawonso babakidi muna n'luta miawu mu vana min'kayilu. kansi fola didi, tudidi kiawonso kiokio kikele yani mu zingila. ⁵ Kina vo ban'kaka bakala vovela nzo a Nzambi mpila ntoko ya toma tungilua mu matadi mambote ye min'kayilu, wavova: ⁶ " mu bima biobio luta mona, lumbu si yiza, kavena tadi vana ntandu a tadi ko dilembi kunkulua." ⁷ Ban'yuvula : " N'longi, nkiantangu mambu momo si maluake? " Ye nkia sinsu si yakala kina mambu momo si maluake?" ⁸ Yesu wavutula: " Lukikeba mpasi vo kalubue ko. Kadi abidi si beza mu nkumbu amu, ye vova: " yi mono ye ntangu yifinamene, ka lubalandi ko." ⁹ Vo luwilu beta vovela kuma kia zimvita ye ntelamonono, ka lukadi ye kinkenda ko, kadi mambu momo mafeti teka luaka, kansi ka yinsukilu ko." ¹⁰ Ikuma wabatela: " n'kangu wumosi si watelamena n'kangu wa n'kaka, ye nsi kua nsi ya n'kaka. ¹¹ Si muakala ndikuka ye n'to mu ngolo beni ye mu fulu biayingi, m'vengele ye vuku mpe. ¹² Kansi tekela mawonso momo, balutula moko, si balukuamisa, kuluyekola ka zinzo za tukutakanu, si balutuba mu boloko, si balunata va n'tuala a min'tinu ye va n'tuala a zimfumu za zunga mu diambu dia nkumbu amu. ¹³ Momo si maluvana mpusika mu ta kimbangi. ¹⁴ Idiawu, kalutudi dio mu n'tima mieno ko muteka yindula kukitanina. ¹⁵ Kadi siyaluvana m'vovo si mikala m'funu ye nduenga yoyo mbeni zeno kabalendi telamena yevo nuanisa ko. ¹⁶ Kansi si luayekolua kana nkutu kua mase ye ngudi zeno, kua mpangi zeno, kua mfinangani zeno ye si avondesa babidi mu yeno. ¹⁷ Si luamangua kua bawonso mu kuma kia nkumbu amu. ¹⁸ Kansi kavavila kana lusuki lua n'tu mieno ko. ¹⁹ Mu luvibidilu lueno si lua vukisa miela mieno. ²⁰ Kiokio si luamona Yelusalemi di zietelo kua makambi ma makesa, luzaya vo bua kuani kuna lukufi. ²¹ Yidina, bana si bakala kuna Yuda batina kuna miongo, bana bakala vana kati kati bavayika ye bika bana bakala muna mbela mbela a mbanza kabakoti ko. ²² Kadi si kiakala lumbu kia nganzi mudiambu dia ndungisilu ya mawonso ma sonekua. ²³ Kiadi kua akento si bakala ye lukawu ye bana si bayemekanga mu lumbu kina! Kadi si kiakala kia kiadi beni mu nsi ye kia ngazi kua n'kangu. ²⁴ Si babua bazengua mu mbele a luyalu, si banatua kimoyo bakangama vakati kia zinsi zawonsono ye Yelusalemi si dia diatua mu malu kua bapakanu nate ye ntangu ya bapakanu yilungana. ²⁵ Si muakala ye sinsu muna ntangu, muna ngonda ye muna ntetembua. Ye va n'toto, si vabua kingongo vakati kua min'kangu ka balenda bakusa ko ma bafeti vanga mu diambu dia ngola za mazu ma m'bu ye nkuka zani. ²⁶ Bantu si bafua mu wonga wamambu momo si meza va n'toto. Kadi tulendo tua mazulu situa moneka. ²⁷ Bosi si tuamona muana muntu si keza mu tuti mu lulendo mu n'kembo wa nene. ²⁸ Kiokio mambu momo mayantika luaka, luvumbuka ye luvumbula n'tu mieno, kadi luvuluzu lueno lufinamene." ²⁹ Yesu wabatela kingana : " lutala n'ti wa muniengie ye n'ti miawonso. ³⁰ Kiokio mitakula si luazaya mu tala, vo nsungi ya mbangala yifuene. ³¹ Mpila mosi, kiokio si lua mona mambu momo malueke, luzaya vo kitinu kia Nzambi kifinamene. ³² Mu kieleka yikulutele dio, mbandu yiyi kayi lendi luta ko vo mambu mama mawonso kama lueke ko. ³³ Zulu ye n'toto si biavioka, kansi m'vovo miamu ka milendi vioka ko. ³⁴ Lukikeba mu yeno kibeni, kidi n'tima mieno ka mifuluki kua mambu ma nsoni, kua kinduvu ye kua ngindu za luzingu ko, mpasi vo lumbu kina kakiluyizila kukinsusumukina ko, bonso n'tambu. ³⁵ Kadi si keza kua bawonso bazingilanga vava n'toto wawonso. ³⁶ Lukaya meso mu ntangu zawonso, lusambila mpasi luakala ye ngolo mu tina mambu momo mawonso meta kuiza, ye kala watelama va n'tuala a muana muntu." ³⁷ Mu diodio, mu lumbu biobio Yesu kakala longanga muna nzo a Nzambi, wakala kuenda leka kuna mongo babokelelanga Olive ³⁸ N'kangu wawonso wayizanga mu n'suka suka muna nzo a Nzambi mu kun'gua.