¹ Yisu wavova kua ba longoki bani:" Si vakala ye mambu man'kaka malenda kutu sumunisa, kansi malema kua yoyo makuizila! ² Si diakala dia mbote mu yani katulua tadi mu n'singu ani tadi dia ndikina ye kun'tuba mu m'bu, vo wakele sielomona wu mosi mu baleke baba. ³ Lukikeba. Vo mpangi aku sumukini, wu m'vutukila ye vovilukidi, wu nlemvokela. ⁴ Vo volele masumu kua ngeye nkumbu nsambuadi mulumbu ye nkumbu nsambuadi vutukidi kua ngeye, ye vova:" Mvilukidi", fueti kunlemvokela!" ⁵ Minlongoki ba vova kua Yisu:" Wutukudikila minu." ⁶ Mfumu wavova:" Vo luna ye minu bonso nginga ya bowa (bitekuteku), si lua vova kua giaka kiki, vuzuka, ye wukikuna mu m'bu" ye siwalutumamena. ⁷ Kansi nani mu beno, wuna ye sadi kita gumba evo kita tuela bibulu, si an'tela, kiokio katukidi mu mavia, "Wiza n'sualu, ye vuanda ye dia?" ⁸ Ka bakun'tela n'kutuko vo, " Wunkubikila kima kia dia, kanga n'singa muluketo luaku ye kubikila mono, nateye kiokio yi manisa dia ye nua. Ye kunima, si wa dia ye nua?" ⁹ Katondanga sadi yani ko kadi wusalanga kiokio katumunu musala, kuzeye ko? ¹⁰ Yeno mpe mpilamosi, kiokio luasadidi mawonsono momo luavewolo, luvova:" Tuna sadi ya kondua mfunu. Yeto katua venge ko momo kaka tufueti vanga." ¹¹ Kiayiza vo, kinavo wayelenge ku Yelusalemi, wa sawuka va ndilu ya Samaliya ye Ngalili. ¹² Kina vo wakotelenge ku vata dimosi, kumi dia antu akala ye kimbevo kia wazi bayenda kuta ye yani. Atelama kuanda ¹³ ye yani ye ba bokela:" Yisu, Nlongi, wutu fuila nkenda!" ¹⁴ Kiokio ka kubamona, wakubatela:" Luenda kisongela kua ngudi zanganga." Ye, kina ayelenge, diayiza vo ba niaka. ¹⁵ Kiokio wu mosi mu yawu kamona vo yani nieke, vutukidi mu ntambi zani, wazitisa Nzambi mundinga ya zangama. ¹⁶ Wakiyina va malu ma Yisu, wa mvutudila matondo. Yani wakala musi Samaliya. ¹⁷ Ye wavutula, Yisu wavova:" Kumi kaba nieke ko? Bosi antu vua an'kaka kueyi bena? ¹⁸ Ka vena ban'kaka ko balenda kuiza vutuka mu vana Nzambi nzitusu, nzenza yiyi kaka?" ¹⁹ Bosi wun'telele:" Telema ye wenda; minu kiaku vuluzi." ²⁰ Yani wayuvulua yuvu kua bafalisi mu diambu dia nsungi ya ngizulu ya Kimfumu kia Nzambi, Yisu wuba vutudila ye wavova:" Kimfumu kia Nzambi ka kikuizilanga mu mpila ya tala ko. ²¹ Kadi vovolua diakako:" Lutala vava, evo tala kuna!" Kadi tala, Kimfumu kia Nzambi kina va kati kua beno." ²² Wavova kua nlongoki miani:" Lumbu yita kuiza yoyo si lua zola luamona lumbu kimosi mu lumbu yoyo ya Muana Muntu, kansi kaluna kum'mona ko. ²³ Idina si bakulutela: Lutala kuna! Lutala vava!" Kansi ka luendi kunzila ko, ka lulemoka kunima yawu ko, ²⁴ Kadi, bonso nsemo yi semanga kiokio yi vayikanga kundambu yan'kaka ya zulu ye kua n'kaka, yiwuna mpe si wakala Muana Muntu mu lumbu kina. ²⁵ Kansi diantete, kafueti mona mpasi zabidi ye sika tingunua mumbandu yiyi. ²⁶ Bonso mayiza mu mbandu a Nowa, yi wuna mpe si wakaladila mu lumbu kia Muana Muntu. ²⁷ Badidingi, ba nuiningi, ba sompelenge ye vana bana bawu ku longo, nate ye lumbu kiokio Nowa kakota mu masuwa ( ye zalu kiayiza ye kiakuba vonda ba wonsono.) ²⁸ Mpila mosi mpe mu momo mayiza mulumbu bia Loti, badidingi, ba nuiningi, basumbidingi, batekelenge, ba kuniningi ye batungidingi. ²⁹ Kansi mu lumbu kiokio Loti kavayika mu Sodomo, kua noka mvula ya tiya ye mbangazi yakuzulu ye bawonsono ba fua. ³⁰ Si diakala mpila mosi mu lumbu kiokio Muana Muntu sika songolua. ³¹ Mulumbu kina, ndondo wukala kuzula a nludi kakulumuka ko mpasi kavayikisa bima biani bia nzo. Ye ndondo sikakala mu minzanza kaba vutukadiakako. ³² Lubambuka moyo mu n'kento wa Loti. ³³ Ndondo wasosa mu vukisa luzingu luani wavidisa lo, kansi ndondo wu vidisa lo sikavuluza lo. ³⁴ Ngita kulutela, mu mpimpa yina, si vakala antu wole ku mfulu yimosi. Wumosi si ka bongua ye wan'kaka sidi. ³⁵ Sivakala akento a wole eta nika mukintuadi, wumosi sikabongua ye wan'kaka sika sisua. ³⁶ (Si vakala ana amayakala a wole ku via dimosi. wumosi sikabongua ye wan'kaka sisulu.) ³⁷ A n'guivudi:" Kueyi, Mfumu?" ye wuku atelele:" Vovo vena mafua, vana mpe sivakala vakutakana mbemba."