¹ Kunima mambu momo, Mfumu wasola diaka lusambuadia, ye wabatuma babole babole kun'tuala ani mu konso mbanza ye fulu kuna yani kibeni kazola kuenda. ² Wabatela: " Ngionzokolo yina ya nene, kansi yisadi yina yafioti. Lutoma sambila Mfumu a ngionzokolo, mpasi kafidisa diaka yisadi mu nzo ani. ³ Luenda! Tala yilufididi bonso bana ba mameme vakati kua madievua. ⁴ Ka lunati mbongo ko, ka nkutu ya nzietela ko, ka nsampatu ko, ye ka luvani mbote kua muntu mu nzila ko. ⁵ Mu nzo zan'kaka lukota, luvova ntete: " yenge, luvuvamu luakala mu nzo yoyo." ⁶ Vo muntu mosi waluvuvamu wuna muna, luvuvamu lueno siluasikila mu yania, kansi vo nkatu, silua vutuka luawu. ⁷ Lusikila mu nzo yoyo, ludia, lunua biobio aluvene, kadi kisadi fuene m'futu. Kaluendi nzo muna nzo ko. ⁸ Vo lukotele muna mbanza, vo alutambudi, ludia biobio luvanua. ⁹ ye luniakisa zimbevo zina muna, lubatela: " Kimfumu kia Nzambi kifuanane kua yeno" ¹⁰ Kansi mu konso mbanza lukota, ye vo kalutambulu ko, luenda muna zi bala bala zani, luvova: " ¹¹ tulukubudidi nkutu mfumfuta za mbanza eno zina ku nsi a tambi bieto. Kansi luzaya vo kimfumu kia mazulu kikumini lukufi ye beno. ¹² Yilutelele dio vo muna lumbu kia mfundusu, kakukala diaka ye luvibudulu mu Sodomo lutila mbanza yina ko. ¹³ kiadi kua ngeye Kolazini! Kiadi kua ngeye Betesayida! Vo mavanga ma lulendo mavangamene mu ngeye ma vangamena mu Tilo yevo mu Sidoni, nga bakiviludila n'tima tuka ntama mu teza kivuatisa nsaku ye kikusa n'toto a mpolo. ¹⁴ Kansi si diakala dia n'lemvo kua Tilo ye Sidoni mu lumbu kia mfundusu, kansi ka kua yeno ko. ¹⁵ Ngeye, Kapelenawumu, banzidi vo si wazamunua ku zulue? Nkatu, ngeye si yakulumunua ku nsi a bafua. ¹⁶ Nduna wuta kuluwa wuta kunguila mpe, ye nduna wulutinguni wuntinguni mpe; nduna wuntinguni tinguni mpe nduna wamfila" ¹⁷ Lusambuadia luawonso luayiza mu kiese, ye bavova: " Mfumu, kani ye mpeve zambi zi tutumamene mu nkumbu aku." ¹⁸ Yesu wabatela: " yamona nkadiampemba wasotoka va n'toto bonso nsemo. ¹⁹ Tala, yaluvene lendo kia diata zinioka ye zinkutu, ye va zulu a lendo kia bawonso kia n'tantu, ye kalekua kimosi kiambi kilenda kulu vanga mpasi ko. ²⁰ Kansi, ka luyangalala kaka mudiambu dia mpeve zilutumamene, kansi luyangalala kibebi kadi nkumbu zeno zisonamene kuna zulu. ²¹ Vana vawu, Yesu wayangalala beni mu Mpeve a N'longo ye wavova: " yikusanisini, e Tata, Mfumu ya zulu ya n'toto, kadi ngeye wasueka mambu mama kua ankua nduenga ye ngangu ye wasonga mo kua bobo bena ye nduenga za fioti bonso ana fiti. Ingeta, Tata, kadi diodio diakala dia zolakana va meso maku." ²² Mambu mawonso yavewa mo kua Se diamu, ye ka muntu mosi ko zeye muana yinani, vo ka yi Se kaka ko; ye ka muntu mosi ko zeye Se yinanai, vo ka muana ko, ye kua konso muntu ndondo muana zazolele dio songa." ²³ Kiokio kabaluka kua kala min'longoki miani, wata mu kinsueki: " Mayangi kua bobo bamuene mama lutamona. ²⁴ Yilutelele dio vo m'bikudi miayingi ye min'tinu bazola mona mambu momo lutamona kansi ka ba mona mo ko, ye wa mambu momo luta wa kansi ka bawa mo ko." ²⁵ N'longi wumosi wa n'siku mia Bayuda watelama, ye wan'dia ngiuvu, wavova: " N'longi, nki ndenda vanga mpasi yatambula moyo wa m'vu ya m'vue?" ²⁶ Yesu wan'tela: " neyi dia sonama muna n'sikue? Nani lutanganga?" ²⁷ Kiokio kakala vutula wavova: " feti zola Mfumu Nzambi aku muna n'tima aku wawonso, muna muela aku, mu ngolo zaku zawonso ye ngindu zaku zawonso, ye wazola mpangi aku bonso geye kibeni. ²⁸ Yesu wan'tela: " Tomene vutula mvutu, vangila wuna ye si wazinga." ²⁹ Kansi, n'longi wazola kukifiongonesa wavova kua Yesu: " nani yi nfinangani amue?" ³⁰ Mu kum'vana mvutu, Yesu wavova: " muntu mosi wakala kulumukanga tuku Yelusalemi ye kuenda ku Yeliko. Wabua mu moko ma yimpumbulu, an'kuata bima biani biawonso, an'zuba nate lukufi ye kum'vonda. ³¹ Mu kinsunsumukina, Nganga Nzambi yi mosi wakulumukanga muna nzila yoyo, ye kiokio kammona waluta mbele mbela. ³² Mpila mosi, kiokio mpe n'levi kaluaka vafulu kina, wammona ye waluta mbela mbela. ³³ Kansi Musamalia mosi wakala mu nzietelo waluaka va mbela muntu yoyo. Kiokio kammona, wakala ye kiadi kiayingi. ³⁴ Wafinama va mbela ani ye wakanga bitenda mu mputa zani, watula mo mafuta ye vinu. Wan'tula muna mpunda ani, wanata nate muna nzo ya ndekela ye watoma kun'keba. ³⁵ Lumbu kialanda, wavayikisa denali zole, wavana zo kua mfumu a nzo ya ndeka, ya wavova: " toma kun'keba ye biawonso vayikisa nate lutila, se ya vutudila bio kiokio yivutuka. ³⁶ Nani mu yawu a tatu, ngeye benzi wuna mfinngani ya ndondo wazubua kua yimpumbulue? ³⁷ N'longi wavova: " ndondo wam'fuila kiadi." Yesu wan'tela: " wenda ye vangila mpila mosi." ³⁸ Wuwu, kinavo wakala mu nzietelo, wakota mu vata dimosi, ye n'kento mosi wakala ye nkumbu ya Malata wan'tambula mu nzo ani. ³⁹ Wakala ye mpangi ani ya n'kento wakala ye nkumbu ya Maliya, yani wavuanda vamalu ma Mfumu, ya wakala wa diambu diani. ⁴⁰ Kansi Malata wakala wabindama mu lamba madia mu vana. Wayiza kua Yesu ye wavova: " Mfumu kadita kuvanga kima ko vo mpangi ame wungiambudi mono mosi kaka mu kubika madie?" Wun'tela keza kunsadisa. ⁴¹ Kansi Mfumu wavutula ye wan'tela: " Malata, Malata, wuna n'tela n'tela mu diambu dia mambu mayingi. ⁴² Kansi diambu di mosi kaka dina dia m'funu. Maliya solele dio diluti wete, diodio kadilendi kun'katula ko.