¹ Kueyi kutukanga n'zonza ye mpaka vakati kueno e? Nga kayi mu nsatu zeno zinuanisanga nitu zeno ko e? ² Luzininanga ye kalutambulanga ko. Luvondanga ye luzininanga, kansi kalulendanga tambula ko. Lunuananga ye lufilananga mpaka. Kalutambulanga ko kadi kalulombanga ko. ³ Lulombanga ye kalutambulanga ko kadi lulombanga mu mpila yambi, mu lukanu lua yakutisa nsatu zeno. ⁴ Lubankua zumba! Kaluzeyeko vo kikundi ye nza kina kitantu ye Nzambi e? Wana nduna zolele kala n'kundi a nza kitukidi n'tantu a Nzambi. ⁵ Yevo lubenze vo masonokua mavovanga mu mpamba kiokio mavovanga: " Mpeve katula mu yeto yinakibeni kimpala e? " ⁶ Kansi Nzambi wuvananga n'lemvo wa m'funu kibeni, idina masonokua mavovele: " Nzambi wutelamenanga bobo bakikundidikanga, kansi wuvananga nlemvo kua bantu bakukikululanga." ⁷ Ikuma Lukikulula kua Nzambi, lutelamena nkadi a mpemba ye sika tina kuanda ye beno. ⁸ Lufinama kua Nzambi ye sikafina kua yeno. Luvelelesa moko meno, basumuki, ye lusukula n'tima mieno, ankua disu kunsi a lukaya. ⁹ Lukala mu kiadi, luyawula, ludila! Bika sevakueno kua kituka dilu ye kiese kieno kiakituka kiadi. ¹⁰ Lukikulula va n'tuala a Mfumu, ye sika luzangula. ¹¹ Luzimpangi, kaluvovana mambi yeno ye yeno ko. Nduna vovala mpangi ani mambi, yevo wutafundisa mpangi ani, vovele wambi kua n'siku, ye fundisi n'siku. Vo wutafundisa n'siku, kuna n'sadidi a n'siku ko, kansi n'kutu m'fundisi. ¹² Muntu wumosi kaka wuna m'vangi a n'siku ye m'fundisi. Yani mosi kaka wuna wafuana mu vuluza ye mu fuasa. Ngeye i nani, ngeye wufundisanga mpangi aku e? ¹³ Luwa, yeno luvovanga: " Wunu yevo mbazi situenda ku mbanza eyi, situakala kuna m'vu wumosi, situateka ye situabaka ndandu." ¹⁴ Nani zeye mana makuiza mbazi ye neyi siwakala luzingu lueno e? Kadi yeno luna bonso fimuisi wumonekanga mu fintangu ntangu ye wuvilanga ku nima. ¹⁵ Nga lufeti vova n'kutu: " Vo Mfumu zolele dio, situazinga ye situasala edi yevo edinanga. " ¹⁶ Kansi wuwu, lukukisananga mu salu yeno ya matingu. Konso kikundidika kua mpila yoyo kuna kuambi. ¹⁷ Ikuma, nduna zeye vanga mambote ye keta mo vangako nete sumu.