¹ Mpangi zamu, kavakadi n'longi miabidi ko vakati kua beno. Tuzeye vo situafundusua lutila. ² Mudina, tusielomokanga yeto awonso mu mpila zabidi. Vo muntu kasielomokanga mu m'vovo miani ko, wuna muntu tomene kula, wafuana mu yalakana nitu ani ya m'vimba. ³ Kiokio tutulanga sengua muna nua wa zimpunda mpasi vo batuwila, tulenda mpe tuadisa nitu awu yam'vimba. ⁴ Lutala diaka mpe masuwa, kanelevo manene ye manatuanga kua mipepe miangolo, madiatusuanga kua fikima fia fioti bonso wuna nsatu ya nati. ⁵ Mpila mosi mpe ludimi luna ndambu ya fioti ya nitu, kansi wukisanisinanga mu mambu ma nene. Tala, tiya tua fioti tulenda yoka mfinda ya nene. ⁶ Ludimi mpe luna tiya, nza ya masumu, ya tulua vakati kua ndambu zeto za nitu. Lusumukisanga nitu ya wonso ye kuikanga luzingu lua wonso. Luna luawu kibeni luakuikua kua bilungi. ⁷ N'kuna miawonso mia bulu ya wonso ya m'finda, zi nuni, bulu yizanzalanga ye vangua ya wonso ya mu maza bia lemvolua ye bia lemvolua kua muntu. ⁸ Kansi kamuntu wumosi ko lenda lemvola ludimi. Dina diambu dia mbi diodio kadilendi yalua ko, luna luazala ye bilongo bivondanga. ⁹ Mu ludimi, tusanisinanga Mfumu Se dieto, ye muluawu tusingilanga bantu bavangua mu kifuani kia Nzambi. ¹⁰ Mu nua wowo wumosi mu vayikilanga lusakumunu ye nsingulu. Mpangi zamu, kadikadila wuna ko! ¹¹ Nga nto yimosi yivayikisanga mu nkumbu yimosi maza mambote ye mandudi e? ¹² Nti wa mungiengie, mpangi zamu, wulenda wuta bundu ya olive yevo n'ti wa vinia wulenda wuta bundu kia mingiengie? Maza ma mungua kamalendi vayikisa maza mambote ko. ¹³ Nani vakati kua yeno wuna nduenga ye ngangu e? Kasonga luzingu lua kimbangi kia mbote mu mavanga mani mu kukikulula kutukanga mu nduenga. ¹⁴ Kansi mu ntima mieno vo luna ye kimpala kia mbi ye makani mambi, kalukisanisina ko ye kaluvuni kua kieleka ko. ¹⁵ Nduenga yoyo kayitukidi ku zuluko, kansi yina ya va n'toto, ka ya kimpeve ko ye ya mpeve za mbi. ¹⁶ Kadi vana vena kimpala ye makani, vana mpe vena mpitakani ye mpila nsadulu za wonso zambi. ¹⁷ Kansi nduenga yakuzulu yina ntete ntete yavelela, ye bosi, yalembama, ya nguizani, yazala kua n'lemvo, kua mim'butu mia mbote, kondua kua mvambani ye vovanga ludi. ¹⁸ M'butu walunungu wukunuanga mu luvuvamu vakati kia bobo basosanga luvuvamu.