¹ Mpangi zamu, kalusimbi minu mu Mfumu eto Yesu Klisto, Mfumu ya N'kembo, mu nsadulu ya n'talu a zidi kia bantu ban'kaka ko. ² Lubanzil'eti vo muntu kotele muna lukutakanu lueno vuete mpeto za wolu ye yim'vuatu mia ntoko kibeni ye bosi vo mputu yimosi mpe kotele vuete m'vuatu mia mvindu. ³ Vo tadidi muntu watoma vuata ye vovele: " Vo diyangidikidi vuanda kuaku vava vana fulu kiambote ", kansi vovele kua mputu: " Ngeye, kala watelama vana" , yevo: " Vuanda va malu mamu." ⁴ Nga kuta fundisa mu nge kibeni ko e? Nga kalukumini m'fundisi mia ngindu zambi ko e? ⁵ Luwa, mpangi zamu za n'zolua, nga Nzambi kasala mputu za nza mpasi bakala zi mvuama mu minu ye tambula kimfumu kiokio kasila kua bobo baku n'zolanga ko e? ⁶ Kansi luavuezele mputu! Nga ka mvuama zozoko zikulu vanganga mpasi? Nga ka bawuko bobo bakulunatanga ku mbazi a n'kanu e ? ⁷ Nga kaba finganga nkumbu ya mbote yoyo yiluvuidi ko e ? ⁸ Kansi n'kutu, vowuta lungisa n'siku wakitinu landila masonukua: " Siwazola mfinangani aku bonso ngeye kibeni", ngeye vangidi diambote. ⁹ Kansi vo wuna ye n'tala a zidi yaban'kaka, wutavola sumu, ye zayakene vo wuna mu n'kanu mu n'siku bonso m'bebesi. ¹⁰ Kadi konso nduna zitisanga n'siku wawonso, wana nkutu vo sumuni mu mpila mosi, yani kumini mu n'kanu muna n'siku wawonso! ¹¹ Kadi ndu wavova: " Kulendi ta zumba ko ". Wavova mpe diaka " Kulendi vondi ko. " Vo kuatele zumba ko kansi vondele, ngeye kumini n'diati a n'siku. ¹² Ikuma luvova ye luvanga bonso bana sibafundusua mu nzila ya n'siku wakimpuanza. ¹³ Kadi mfundusu yikuizanga kondua kua n'lemvo kua bobo balembua songanga n'lemvo. Nlemvo wundunganga mu mfundusu. ¹⁴ Mpangi zamu, nkia wete wuna vo muntu tele vo wuna ye minu kansi kondolo mavanga e? Minu kiokio kakilendi kum'vuluza ko, nga kilenda e? ¹⁵ Vo mpangi ya yakala yevo ya n'kento katomene vuata ko ye kondolo madia ma lumbu kiokio. ¹⁶ Banzila vo mosi mu beno wun'telele: " Wenda mu yenge, kala ku nsi a muini ye yukuta. " Kansi kalum'vene bima bina kavuidi mfunu mu nitu ko, nkia m'funu wa diodio e? ¹⁷ Yimpila mosi ye minu, vo kakina ye mavanga ko, kina kiafua. ¹⁸ Kansi n'kutu wumosi diaka sika ta: " Ngeye wuna ye minu ye mono ngina ye mavanga. " Wunsonga minu kia kondua mavanga ye siyasonga minu kiamu mu mavanga mamu. ¹⁹ Ngeye kuikilanga vo vena ye Nzambi yi mosi, ngeye vanganga diambote. Kansi kana madiabulu nkutu makuikilanga ye mazakamanga. ²⁰ Zengi zolele zaya, vo minu kiakondua mavanga kakina m'funu ko e? ²¹ Abalahami Se dieto diantete, nga kakumusua walunungu kua mavanga kiokio kayekola muana ani Isaki va ziku ko e? ²² Muene vo minu kiakala diata ye mavanga makiawu, ye mu mavanga, minu kiani kiakula kiawonso. ²³ Yiwowo walunganena mavovele masonukua: " Abalahami wakuikila mu Nzambi ye diodio dian'tangulua dia lunungu. " Yiwowo Abalahami kabokololua n'kundi a Nzambi. ²⁴ Muene vo yi mu mavanga muntu kakumusunuanga walunungu, ye ka mu minu kaka ko. ²⁵ Yi mpila yoyo mpe kaka Lahabi, n'kento wa zumba, keti ka nungusua mudiambu dia mavanga kiokio katambula zintumua ye kabatinisina mu n'zila ya n'kaka ko e? ²⁶ Kadi, bonso nitu yakondua muela yina ya fua, minu mpe kiakondua mavanga kina kiafua.