¹ Wuwu nsuka ya momo tukele vava yi edi: tuna ye Ngudi a Nganga wavuende kuna lubakala lua kunda kia kitinu muna mazulu. ² Wuna sadi muna fulu bia n'longo, yi nkati kua suku dia n'longo (tabernacle) diodio Mfumu, kansi ka muntu ko, ka sadisi. ³ Kadi konso nganga Nzambi wabiekua mpasi mu vana n'kayilu ye n'kayilu wa yokua. Ikuma dina dia m'funu mu kala ye kima kia vana n'kayilu. ⁴ Wuwu, vo Klisto kakala va n'toto, nga kalendi kala ngioki a n'kayilu miawonso ko, kadi vena yebana bavananga min'kayilu landila n'siku. ⁵ Basadilanga fuanifuani ye kini kia bima bia mazulu. Yi bonso Mose kaluengeselua kua Nzambi kiokio kakala wakubama mu vanga suku dia n'longo (Tabernacle): " Tala" wavova Nzambi: " Bika wasala mawonso momo landila mbandu wasongua vana zulu dia mongo." ⁶ Kadi wuwu, Klisto watambudi kimfumu kilutidi kadi, wuna kimpovela kia luwawanu luambote nate nkutu wabiekolo mu nsilulu zilutidi wete. ⁷ Kadi vo luwawanu lolo lua ntete ka lukadi nkutu ye dia mbi ko, nga ka dikala diaka m'funu ko mu sala luwawanu lua n'zole. ⁸ Mu diodio, kiokio Nzambi kabakusa mbi ya n'kangu, wavova:" lumuene, lumbu bitakuiza (wavova Nzambi), biobio si yavanga luwawanu lua mpa ye nzo ya Isaeli ye ya Yuda. ⁹ Ka lukala bonso luna yasala ye n'kulu miawu ko mu lumbu kina yabasimba mu koko mu kubavayikisa muna n'toto wa Ngipiti. Kadi, ka batatamana mu luwawanu luame ko, ye kia sala kubayindula nkutu diaka ko" : wavova Nzambi. ¹⁰ "Kadi tala luwawanu se yavanga ye nzo ya Isaeli kunima lumbu bibi", wavova Mfumu. " Si yatula n'siku miame muna mabanza mawu, ye si yabasonekena mio mpe muna n'tima miawu. Si yakala Nzambi awu ye si bakala n'kangu ame. ¹¹ Si ka balonga diaka muntu muntu mfinangani yevo mpangi ani ko, si bavova: " Nzeye Mfumu", kadi bawonso si banzaya, tuka mu wafioti nate mu wambuta vakati kuawu. ¹² Kadi si yakala nkua nkenda mu mambu mawu makondua lunungu ye kikala banza diaka masumu mawu ko." ¹³ Mu vova " luampa" wakitula luwawanu lua ntame se lua nkulu. Ye lolo kamona lua nkulu lulueke vafulu kia vila.