¹ Yi ndondo Melesisedeki, n'tinu wa Salemi, nganga Nzambi ya toma zangama, wakutana ya Abalayama mu mvutuka ani ye wan'sakumuna, kiokio kamana zenga nsingu ya n'tima. ² Abalayama wam'vana buku kia kumi kia biabio kabaka. Nkumbu ani " Melesisedeki" disongele " n'tinu walunungu", ye mpe " n'tinu Selemi", disongele " n'tinu wa luvuvamu." ³ Wakala wakondua Se, wakondua Ngudi, wakondua n'kulu, bonso muana Nzambi. ⁴ Wuwu, luyindula nene wuakala ye muntu ndondo. N'kulu eto Abalayama wam'vana buku kia kumi kia bima bia mbote kiokio kia kala nkindu. ⁵ Ye yiwowo n'kuna wa Levi wowo watambula kinganga kia Nzambi, batambula n'sua landila n'siku mu tambula buku kia kumi kua n'kangu, disongele kua mpangi zawu besi Isaeli, kana wuna kina vo bawu mpe bena n'kuna wa Abalayama. ⁶ Kansi, Melesisedeki, ndondo kakala n'kuna wa Levi ko, watambula buku kia kumi kia Abalayama, ye wan'sakumuna, ndondo wakala ye nsilulu. ⁷ Kavena nkutu ye lukatikisu ko vo muntu wuna kunsi kasakumunua kua muntu wazangama. ⁸ Mu diodio, bantu bafuanga batambulanga buku kia kumi, kansi vana, ndondo wuta tambula buku kia kumi kafeti zayakana vo wuna wamoyo. ⁹ Mu mpova yan'kaka, Levi ndondo wabakanga buku kia kumi, wafuta yo mpe mu nzila ya Abalayami. ¹⁰ Kadi Levi wakala muna kati kua n'kulu ani Abalayami kiokio Melesisedeki kawawana yani. ¹¹ Wuwu vo toma zaya sala kulendakana munzila ya kinganga kia Nzambi, Levi ( Kadi mu ntangu ani n'kangu watambula n'siku), wakala diaka m'funu mu moneka nganga Nzambi ya n'kaka landila ntumunu ya Melesisedeki, ye ka mumbokolo landila lutumu lua Aloni kue? ¹² Kadi kiokio lusobele kinganga, n'siku mpe wufetie soba. ¹³ Kansi ndondo diambu didi dia vovelua wuna musi kanda dia n'kaka, didio kamuntu mosi ko wasala kala salu kuna zikua. ¹⁴ Wuwu, dina dia ludi vo Mfumu eto wuma mukanda dia Yuda, kanda diodio Mose kasala vovela nkutu ko mu nsamu wa zinganga. ¹⁵ Ye momo tuavova mena ma toma kia, vo nganga yan'kaka yitelamene yafuanana ye Melesisedeki. ¹⁶ Nganga Nzangi yoyo kayoyo yakuma Nganga Nzambi landila n'siku wa n'kuna wakimuntu ko, kansi mu lendo kialuzingu lulembi fuasuka. ¹⁷ Masonukua meta kun'tela kimbangi eki: " wuna Nganga nate kua yele m'vu landila ntumunu ya Melesisedeki." ¹⁸ Kadi n'siku wantama watulua vambela kadi wakala walebakana ye wakondua m'funu. ¹⁹ Kadi n'siku ka wakitula kana kima kimosi kialunga ko, kansi nkutu, vena ye nkati kua vuvu kuna se n'tuala kiokio tuta finamena kua Nzambi. ²⁰ Vuvu kiokio kia mbote kakina ko kondua kua zenga nzambi. Kansi nkutu ban'kaka bakuma zinganga kondua kua zenga nzambi. ²¹ Kansi mu n'samu wa ndundu, Yesu; wakuma Nganga Nzambi mu zenga nzambi ya salua kua nduna wan'tela: " Mfumu wazenga nzambi ye kalendi vutuka lunima ko: " wuna Nganga Nzambi nate kua yele m'vu." ²² Mu diodio, Yesu wakuma lufulu lua luwawanu lua yampa. ²³ Mudiodio, lufua lua kakidilanga zinganga mu sala m'vu ka m'vu, yi mudiambu diodio, vena ye Nganga zayingi, muntu muntu mu ntangu ani. ²⁴ Kasi kinavo yesu wuna moyo m'vu ka m'vu, kinganga kiani kakilendi soba ko. ²⁵ Yidiodio, wuna wafuana muvuluza m'vimba m'vimba bobo bafinamene ye Nzambi mu yani kadi wuna moyo lumbu ka lumbu mu kubadila mvutu. ²⁶ Dina diambote kua beto mu kala ye Nganga Mbuta ya mpila yoyo. Wakondua sumu, wakondua tona, wavelela, wavambana ye bankua masumu ye wakuma wanene lutila mazulu. ²⁷ Kansi nkutu ka bonso kua nganga za mbuta, kena diaka ye m'funu, mu vananga konso lumbu n'kayilu a mponda ko, ntete ntete mu diambu dia masumu mayani mosi, ye bosi ma n'kangu. Wavanga wo nkumbu mosi kiokio kakivana yani mosi. ²⁸ Yi diawu, n'siku wutulanga bonso Nganga za mbuta, bantu bena ye ndembakani, kansi m'vovo mia nzengolo a nzambi miatukanga muna n'siku, mitudidi muana, watulua walunga nate kua yele m'vu.