¹ Yi wowo, tuyambula bia ngiatikilu ya mambu ma Klisto, ye tuteza kula. Katutudi diaka lufulu lua mviludilu a mavanga mafua ko ye ya vuvu mu Nzambi, ² Ka lufulu mpe lua ndongolo mu momo matadidi mbotokolo ko, ka ntudulu ya moko ko, ka mfulukulu ya bafua ko ye ka mfundusu ya m'vu ka m'vu ko. ³ Si tuavanga mpe mambu momo vo Nzambi zolele wo. ⁴ Kadi kadilendakana ko vo bobo bakala batemoka mu ntama, bayeleka m'butu mia kimpeve, bakala kintuadi ye mpeve a n'longo, ⁵ ye bayeleka mambu mambote ma Nzambi ye tulendo tua nkama m'vu mia ku n'tuala, ⁶ kansi babua; kadilendakana ko mu kubanata ku mviludilu a mavanga. Didi kadi mu kuma kia bawu mosi bakoma diaka muana Nzambi, ban'kitula kima kia sakanena ye kia nsoni za n'kangu. ⁷ Kadi n'toto wutambulanga mvula zinokanga ntangu zayingi mu wau ye wubutanga min'ti mia m'funu kua bobo bakunanga mio, tambulanga nsambu zitukanga kua Nzambi. ⁸ Kansi vo wuta wuta nsende ye n'timia nsende, ka wuna wambote ko ye wulenda singua. Wulenda manisina ku yokua. ⁹ Kana wuna kina vo tuta vova mpila yiyi, bakundi, tukuikidi mu mambu meno ma mbote luvuidi ye matadidi mpulusu. ¹⁰ Kadi Nzambi kena nkutu wakondua lunungu ko ye kavilakana mavanga meno ye nzola lua songele mu nkumbu ani, Kadi luasadisi minkuikizi ye luta tatamana kun'sadila. ¹¹ Ye tuzolele kibeni vo konso muntu mu beno kavangila mpila mosi mu n'sualu nate kuna nsuka, mu kuma kia vuvu kia toma fuana. ¹² Katuzolele ko lua kituka miolo, kansi nkutu, lukala min'tanginini mia bobo bena m'vingidi mia nsilulu mu diambu dia minu ye luvibudulu. ¹³ Kadi kiokio Nzambi kavana nsilulu ani kua Abalayama, wazenga nzambi mu yani mosi, kadi kalendi zenga nzambi mu wan'kaka wun'lutidi ko. ¹⁴ Wavova:" mu ludi se yakusakumuna, ye se yaniekesa n'kuna aku mu ngolo kibeni." ¹⁵ Mu mpila yoyo, Abalayama katabudila kiokio kasilua kunima vingila mu luvibudulu. ¹⁶ Kadi bantu bazenganga nzambi mu muntu wa n'kaka lutidi nene kua bawu. Kuna nsuka konso ntantani zawu, nzengolo a nzambi yi lufulu lua ntambudilu awu. ¹⁷ kiokio Nzambi ka baka lukanu lua toma songa kua mim'vingidi mia nsilulu, mpila ya kuma kiani kilembi sobua, watoma dio niemena n'lembo. ¹⁸ Wasala wowo mpasi vo, mu bima biole bilembi sobanga ( mu biobio kabilendakana ko vo Nzambi kavuna) kua beto tuatina mu kuma kia suekameno, tukala ye nsiamusu ya nene ye tukala ne kekete mu vuvu kia tulua va n'uala eto. ¹⁹ Tuna ye vuvu kiokio bonso tinta ya vuvu ye yakangama mu miela mieto, vuvu kikotanga mu fulu biakati ku nima a n'lele wa muelo. ²⁰ Yesu wakota mu fulu kiokio bonso wantente mu beto, kinavo wakuma Nganga Mbuta nate kuyele m'vu landila ntumunu ya melesisedeki.