¹ Kubamini banuna ko, kansi nkutu, wun'siamisa bonso vo wuna Se. Siamisa matoko bonso vo bena bampangi. ² Siamisa bakento bakula bonso zingudi, bana bena zindumba bonso zimpangi zamakento mu wuveledi wawonso. ³ Zitisa mafola ma bakento, mafola makieleka. ⁴ Kansi vo fola diakento dina ye bana yevo ye batekolo, balongoka ntete vana n'kembo kua makanda ma yawukibeni. Bavanga wo kua mase ye ngudi zawu kadi diodio diyangidikanga Nzambi. ⁵ Nkati kua fola dia n'kento yi yani zinganga yani mosi kaka. Yani tulanga vuvu kiani kua Nzambi. Yani tatamananga fuku ye muini ntangu zawonso mu bondelela ye bisambu. ⁶ Kansi nkutu, n'kento zingilanga mu kuma kia nsatu za n'suni wuna wafua kanele vo wuta zinga. ⁷ Ye wubatela mambu momo mpasi vo bakala bakondua nsembolo. ⁸ Vo muntu kasadisanga bantu bayani kibeni ko, ye sungula bobo ba kanda dia yani kibeni ko, yani dimbudi minu ye lutidi mu mbi ye ndondo wakondua lukuikilu. ⁹ Mpasi vo n'kento kabakua bonso fola, kakadi kunsi ya m'vu makumasambanu ko ye dondo wateka kala n'kento wa muntu. ¹⁰ Kafeti kala wazayakana mukuma kia mavanga mani mambote, kiakala vo mavanga mana kasadisila bana , kakala tambudila zinzenza, kasukudila tambi ya minkuikizi, kasadisila bakala mu kiadi yevo wakiyekolela mu konso salu kiambote. ¹¹ Kansi mafola ma ndumba, kuzodingi soneka muna n'kanda ko, kadi kiokio bakiyekolanga mu nsatu za kin'suni zina kintantu ye Klisto, bazolanga kuela. ¹² Mudiodio, bavolanga n'kanu kadi babebesanga zola kuawu kuantete. ¹³ Bayukuanga mpe mu kuenda zieti mu mpamba. Bakuendanga nzo muna nzo ka bakumini ka n'zieti mia mpamba mpamba kaka ko, kansi bakuenda vovingi kuasaka ye basalanga mambi mayingi mu kinsueki. Bavovanga mambu mana kabalendi vovoka ko. ¹⁴ Ikuma Nzolele vo bakento bandumba bakuela, bawuta bana, batuadisa nzo mpasi kabavani kana fintangu kua mbeni katufunda ko vo beto tua vanga mambi. ¹⁵ Kadi nkutu, ban'kaka bavengamene kala mu landa satana. ¹⁶ Vo konso n'kento wa munkuikizi wuna ye mafola ma bakento, kabasadisa mpasi vo Dibundu kadikadi dia zala kua zitu ko ye diasadisa bobo bena nkati kua mafola ma bakento. ¹⁷ Bika bakuluntu bobo batoma tuadisanga babanziluanga bonso bafuanakana mu tambula nzitusu nkumbu zole, sungula bobo basalanga mu m'vovo ye mu ndongolo. ¹⁸ Kadi masonukua matele: " kulendi tula finukua kia nua mu ngombe kiokio keta diatikisa zinginga ko" ye "n'sadi fuene tambula m'futu ani." ¹⁹ Kutambudi nkutu m'fundu wa n'kuluntu a Dibundu ko, vo kutambudi mbangi zole yevo zitatu ko. ²⁰ Benda bankua masumu matu va ntuala a bantu bawonso, mpasi vo ban'kaka bamona wonga. ²¹ Yi kuvene n'sua va ntendankongolo va n'tuala Nzambi ye va n'tuala Klisto Yesu, ye va n'tuala Mbasi zasolua mu toma lunda kikilu n'siku miawonso ye ka mu vanga kani diambu nkutu mu n'talu a zizi ko. ²² Kutudi moko kua muntu ko. Kukoti mu sumu dia muntu a n'kaka ko. Fete kukilunda wavelela. ²³ Kulendi diaka nua maza ko. Kansi nkutu, fete nua fimalavu mukuma kia lukutu luaku ye bimbevo biaku biabidi. ²⁴ Masumu ma bantu ban'kaka makimonikisanga ye makubatekelelanga kuna mfundusu. ²⁵ Kansi masumu ma n'kaka malandanga kunima. Mpila mosi, mavanga ma n'kaka ma mbote ma kimonikisanga kansi kana man'kaka kamalendi suama ko.