¹ Bika bawonso bena kunsi a vangu bonso nanga batalanga mfumu zayawu kibeni bonso bafuana nzitusu yawonso. Bafeti wo salanga mpasi nkumbu a Nzambi ye ndongolo kazi tiakua ko. ² Bika minanga miomio mina ye Mfumu za minkuikizi, kamikondua kubavua luzitu ko, mu savo bena mpangi zawu; Kansi baluta kubasadila, kadi mfumu zozo zisadisuanga mu salu kia bawu bena minkuikizi ye bena bazolakana. Longa ye vovela mambu mama. ³ Vo muntu wutalonga mambu ma mpila n'kaka ye katambudilanga ntumunu zeto zakuikama ko, disongele, mpova za Mfumu eto Yesu Klisto. Vo kabatambudilanga ndongolo za mambu manatanga ku wuveledi ko. ⁴ Muntu ndondo wuna wakivanginika ye kazeye kima ko. Ye diaka, wuna ye kimbevo kia bindakesa ye mpaka mu matadidi mambu. Mambu momo matuasanga nsatu za n'suni, min'zonza, bifingu, nguakananu za mambi ye ⁵ Yitantu yilembi mana vakati kua bantu bena ye mpeve zavualangana. Batekanga ludi nima. Babanzanga vo wuveledi yi nzila mu kuma mvuama. ⁶ Mudiodio, wuveledi ye yangalala yi n'luta wanene. ⁷ Kadi katuanata kima ko mu nza, ye katunata mpe konso kua kima ko. ⁸ Kansi nkutu, tukala tuayangalala mu madia ye m'vuatu. ⁹ Kansi bana bazolanga vuama babuanga mu ntontolo, muna n'tambu. Babuanga mu nsatu zayingi za kizowa ye zambi, mu mawonso mabuisanga bantu ku bebesua ye ku fuasua. ¹⁰ Kadi n'zolua a mbongo yi muanzi wa mpila zawonso za mambi. Ban'kaka bakivana mu wawu bavila kuanda ye minu ye bakilueka yawu kibeni kua kuama kua n'tima. ¹¹ Kansi ngeye, muntu a Nzambi, tina mambu momo. Sosa lunungu, wuveledi, kuikama, zola, lumvibidilu, wulembami. ¹² Nuana nkindu ya mbote ya minu. Simbinina moyo wa m'vu ya m'vu mu wowo wabokololua. Yi mudiambu dia momo wafungunina mu minu va n'tuala a zimbangi zabidi mu matadidi mambote. ¹³ Ngita kutuma va n'tuala a Nzambi, yani vananga moyo kua biawonso, ye va n'tuala a Yesu Klisto, ndondo wavova mu ludi kiawonso va n'tuala Ponso Pilatu: ¹⁴ "Toma simbinina n'siku, kondua kua ngielele, nate mbonokono ya Mfumu eto Yesu Klisto." ¹⁵ Nzambi sika songa mbonokono ani mu ntangu yi fuanakana - Nzambi, wan'sakumuna, lendo kimosi kaka, N'tinu wuyalanga, Mfumu yiyalanga. ¹⁶ Yani kaka wuna ye luzingu lua m'vu ya m'vu ye wuzingilanga mu n'temo wulembi vibudulua. Ka muntu kummonanga yevo lenda kummona ko, kua yani kaka kufuene vewa nzitusu ye lendo kia m'vu ya m'vu. Amene! ¹⁷ Zayisa kua mvuama za nza yiyi balembi kitumpidika, ye lembi tulanga vuvu kiwu muna yimvuama yina yalembi sungama. Kansi nkutu, bafeti tula vuvu mu Nzambi. Yani kutuvanaga yimvuama yakieleka mpasi tuayangalela yo mu kiese. ¹⁸ Wubatuma bavanganga mambote, bakala mvuama za mavanga mambote, bakala ba nkua yenge, nkua mpaninu a m'vevo. ¹⁹ Mudina, sibakikubikila lufulu luambote mudiambu dia kun'tuala, mpasi mu baka luzingu luakieleka. ²⁰ Timoteo, keba kiokio wavewa. Kuzodi mpova zakizowa ko ye bindikanga mpaka zakondua sungama zibokeleluanga bonso nzayilu. ²¹ Bantu ban'kaka bavovanga mambu momo ye yikuma bavambana ye minu. Bika n'levo wakala yeno.