¹ Kansi mpeve yivovanga mu kieleka vo muna lumbu bia nsuka, ban'kaka sibayambula lukuikilu luawu ye kivana kua mpeve zampukumunu ye kua ndongolo za madiabulu, ² mu disu ku nsi a lukaya dia luvunu luna muna nkati kua kansansa kia yawu mosi. ³ Sibakanikina kuelana, ye dia madia ma vanga Nzambi mpasi madilua mu mvutudulu a matondo kua minkuikizi mialuaka mu tezo kia nzayilu ya kieleka. ⁴ Kadi biawonso biavangua kua Nzambi bina bia mbote, ye kavena kimosi mu biobio tudianga mu mvutudulu a matondo kilenda tubua ko, ⁵ kadi biawonso bina bia velelesua kua mambu ma Nzambi ye sambu. ⁶ Vo wuta longa mambu momo kua zimpangi, siwakala n'sadi a mbote wa Mfumu Yesu Klisto, walongua mu mambu ma minu ye mu ndongolo zambote zozo walanda. ⁷ Kansi loza savu ya nza yizolanga bakento banuna, kansi nkutu wukivana mu kivelelesa. ⁸ Kadi nsaka za nitu zina m'funu mu mambu ma fiuma, kiongolo wuveledi wuna m'funu mu mambu mawonso, ye wusimbininanga n'silu wa luzingu lua wuwu ye wa luzingu luakun'tuala. ⁹ N'samu wuwu wuna wa kieleka ye wafuana mu tambulua. ¹⁰ Yi mu diodio tutanuanina ye tutasadila mu ngolo kibeni, kadi tuatula vuvu kieto muna Nzambi a moyo, wuna m'vuluzi a bantu bawonso, sungula ko bana bakuikilanga. ¹¹ Vova mambu mama ye longa mo. ¹² Muntu katingini kitoko yevo kindumba kiaku ko, kansi kala mbandu kua bobo bakuikilanga mu mpova , mu kadilu, muna zola, muna minu ye muna wuveledi. ¹³ Nate kina nkuiza, sala ngolo mu ntangulu, mu lusiamusu ye ndongolo. ¹⁴ Kusakanena n'kayilu wuna mu ngeye ko, ye wowo wavewa mu mbikudulu mu ntudulu a moko ma bakuluntu ko. ¹⁵ Sadila mu mambu momo, tatamana mu mawu, mpasi vo ntombokolo zaku zakala zakieleka va n'tuala a bantu bawonso. ¹⁶ Wukikeba ngeye kibeni ye mu ndongolo aku, zizila mu mambu momo, kadi vo wuta sadila mpila yoyo siwakivuluza ngeye kibeni ye siwavuluza bana bakuwanga.