¹ Me mwe ibini mu nkwum a Klistu,me mfid we,ku nsi mbwun ame i ntshil imbang mu nzil ye mpev a santu. ² Ne me nkel andi ngieb ye ngol ani nzwis ye win wa mu mbwun a me. ³ Me azol ne nkal ne ba ndwe ku nkel me ani ne ba nkab andi Klistu munda lizol le nkel alo me mu ba kuun ba me,bad ba inaan i me mu mpil ye imud. ⁴ Ba kel bad ba Isayel,ba kel baan ba makuu,lukum,iwakan,makab ma ma nsik,isama Nziem ani bilo bi ba liken. ⁵ Ani ba nkaa ban ba bwid Klistu mu imud; Klistu wun wu kel ya ngi ye bilo bio biso,Nziem a sampulu mvul ani mvul. Ame. ⁶ Si mio min mi swi we ne ma ken Nziem ya ma bel. Munda kel we ne ibini bad ba Isayel bo baso baba kel bad ba Isayel. ⁷ Kel we si ne na ba tshili ba Abalayam bo baso baba kel baan ba nde,si na mu dum le Isac mo zwa nze kaan. ⁸ Iswe ne baan ba imud ba kel baan ba Nziem. Si baan ban baba ken baba kel amon ne ba tshili. ⁹ Munda bun bu kel nda ye likan: "Mu ina iso kio kin,me ayi ya,ani mwaan abu-butuk mu dum le Salah. ¹⁰ Si kel we na mio min,Lebek si bo twe dum ku baal na wun mu mo,Tad a bis Izac. ¹¹ Munda baan ba ke abwu ba ba bwid we,si asel we nto mbwed to yi mbi,mu mpil ne lizol le Nzieme mu mpil ye iswolo;kel we ne itsin bisal, si mu lizol le wun wu kel mu iyemen. ¹² Ba mu liel ikobu ne: "Mwaan wo iso a seles mukii." ¹³ Ikele iko bun bun bu ba swen: "Me bo mu zwel Jacob si me bo mu ywi Izawu." ¹⁴ Kobun bis li mo ne nki? Ikel iwin masong ma Nziem? Lo nsil. ¹⁵ Munda nde bo liel ku kel Moyize: "Me a ywil ngieb ku kel wun wo nkwin me, ani wun wu nkwin me." ¹⁶ Kobun si,min mi tel we ansa wun wu kwin,ansa wun wu kel mu ibad manan,si mu lizol le Nziem nga ngieb. ¹⁷ Munda biswen bi mwe ku kel Falaon: "Ikel mu lizol liso lin lili lwid mutel lili kel mu ighan mu mpil ngol me ba imon ani nkwum a me ba imwa mu ntod yo iso." ¹⁸ Kobun si,nde a ywile ngieb ku kel wun wu zwel nde ani ikas mbwun ku kel wun wu zwel nde. ¹⁹ Nze andi-ndiel ku nsuk ne: "Munda nde aluuno mu isal mbi? Na wun wu kel ne mu lizol li nde Le kes mbwun"? ²⁰ Si kyi,mud nze kel na mu ibaman manda ma Nziem? Bikaa bi ba bwim mu maan ma kyin, nze kwi mu imo ku kel wun wo bi sel bio: " Munda nze a nzili me kobu"? ²¹ Wun wo yile bikaa,akel we andi nswa ku kel maan ma kyin munda ama kidil ikaa ki ba kwi mu iselel mu mpil ye lwidil to ikaa ki ba kwi mu iselel na mu tsu li mo? ²² Kobun nki yo ba mo kid ne Nziem mu Izol mu isuu mpud a nde ani mu isuu ngol a nde,abi shil ngol andi ikas mbwun kio iso,bi kaa bibi mpud ba bi yili munda ifha i bio. ²³ Ku nsuk ne a suu ko kel bad imvwam ke likum li nde ya nghe bikaa be sel mu ngieb,bio bin be yile ku nkul munda likum li nde. ²⁴ Kobun ikel ifa imo ani bis ba yemen nde,kel we ne na mu nked a ba Yuda,si mu nked a bad bo baso. ²⁵ Bun bu ba mwe ku kel Oze: "Me ayemen bad ba me,ban baba win ikal bad ba me,ani wun wo zolo me,wun wo wun kal wo zolo me. ²⁶ Ikal si iko bun ya mbel yin ye ba liel nde: " Bini li kel we bad ba me,"yan baba yemen baan ba Nziem wu kel andi mwe". ²⁷ Izaya bo ti milaal mu manda ma Isayel: "Kid ne ibwil i baan ba Isayel ikala amon mbud ye nsie, itukal andi ban ba ni shial mu iguluk. ²⁸ Munda ntam a fhun we mfum asi-sal bun bu kel nda nde mu nsi ntod mu mpil ye ku kuu. ²⁹ Bun bo mwe Izaya ku nkul: " Kid ne mfum wo ngol yo iso a shis we ba tshili ku ngwel a bis,li tu to bun bu kel bila be Sodom,li tu kal ifa imo amon ne bad ba Gomol". ³⁰ Nki yo si bis li mo? Bad ban baba win saa masong, ba mwen masong,masong mu likwikil. ³¹ Ani Isayel wo see nsik mu masong,ayi zwi we. ³² Munda nki? Munda ba used we mu likwikil,si mu bisal,li ba bed kia mu man le mubal. ³³ Bun bu ba swen: "Li tal me si ku Siyoni man le mubal ani mukuun ye manda ma bi. Wun wo kwikil ku kel nde a bolok we nswe.