¹ Tel li ikel andi mbi mo mu ban baba kel mu Yesu Klistu. ² Munda mu nsik ye lizing le mpev ye Klistu Yesu ma nkiele mu nsik ye masum ani ye lifhu. ³ Kobun,Bu kel ne nsik ikwi we mu isal itsin yuun li nde Le nud,Nziem le ikwisi; le twim mwaan a nde andi nud yi kel imbe andi masum munda nde abi wa itsin masum ma mutwim mu imud. ⁴ Nde akid kobun mu mpil ne ma lwine nsik mu ngol ma kuu ku kel bis,ne bis li ka ko kwe mu imud si mu mpil ye impev. ⁵ Ban baba zighe mu mpil ye imud,ba biwi mu bilo be imud,si ban baba zighe mu mpil ye impev,ba biwi mu bilo be impev. ⁶ Munda lizol le imud, ikel lifhu,si lizol le impev,ikel lizing ani ngemb. ⁷ Munda lizol le imud li kel we ku ibwed ku kel Nziem,munda nde alemfuko we mu nsik ye Nziem,akwi we si mu ikid ko bun. ⁸ Ban baba kel mu imud ba kwi we mu iwa isse ko kelNziem. ⁹ Kobun,bini li zighe we mu imud,si mu mpil ye impev,kid ne ikel ye ibini ne mpev a Nziem ikel andi bini. Si kid ne mud mu mo akel we andi mpev yeKlistu,akel we mud a nde. ¹⁰ Si kid ne Klistu akel mu nked a bini,nto mo nud ifha itsin masum,nto nkim mpev izighe itsin masong. ¹¹ Kid mpev ye wun wo wusulo Yesu ku lifhu izighe mu nked a bini,wun wo futumuk Yesu mu lifhu awu wa lizing mu nud ye bini yin ye fha,mu nzil ye mpev yin ye zighe mu nked a bini. ¹² Kobun ba kuun,bis li kel we ne ba li fidil ku imud munda izing mu mpil ye imud. ¹³ Munda kid ne bini li zing mu mpil ye imud,bini li fhi-fha,si kid ne mu mpev li kel mu idus mantiemen ma imud,bini li kal mu lizing. ¹⁴ Munda ba fhun baba tswelese mu mpev ye Nziem,bo ban baba kel baan ba Nziem. ¹⁵ Munda bini,bini li man zwa mpev ye ibud sal ani ye ibad buum,si bini li zwi mpev ye makuu mu yo yin yi li ta bis milaal: "Abba,Ta!" ¹⁶ Mpev yo ngako aka ita imbang andi mpev ye bis ne likel baan ba Nziem. ¹⁷ Kid ne bis li kel baan,li kel si imvwam: Imvwam ke Nziem nto nkim itshul ke imvwam andi Klistu,kid ne ibini ikel kobun ne bis liniokama andi nde,mu mpil ne li kal mu likum andi nde. ¹⁸ Munda me nkwin ne minia me mukil wu likel wu,mikel imbe andi likum li ba lishil bis ku nkul. ¹⁹ Munda be kes Nziem bi zele mu iwine ikas mbwun iya ke mwaan a Nziem. ²⁰ Munda be kes Nziem bibi wi ku li leen,kel we ne mu lizol le nde ngako,si mu lizol le wun wo mu twim mu ilemfuk,mu isa mbwun. ²¹ Ne, be kes Nziem bio ngako ba biwa ku impik ke ifhud mu ngemb ye likum le baan ba Nziem. ²² Munda bis li yeb ne be kes Nziem bio biso,bi bwi ya nkul a ma bwu ani imon mpas mu minia mi nzwis ye ibud ti non-bu. ²³ Si kel we na mio min,si bis ba ngako ba lizwi mbud ye impev,li kel mu imon mpas mu nked ye bis ba ngako,mu izel imwaan i bis ke makuu,mu iku bi wa ke nud a bis. ²⁴ Munda bis li zwi liguluk mu isa mbwun, kyi isa mbwun ki li mono bis ikel we isa mbwun,munda ba sa mbwun ku kel ilo kin ki ba sun mono? ²⁵ Kyi kid ne bis li sa mbwun mu ilo ki li win mon, bis li izele andi ikas mbwun. ²⁶ Ifa imo mpev aka yi liseles mu yuun li bis,munda bis li yeb we bu ba sama,si nde ngako aka saam munda bis mu bisaam bi li win kuu bis mu imo. ²⁷ Wun wo tala ma mbwun yeb ma ntiemen ma mpev munda nde asama itsin ba santu mu mpil ye lizol le Nziem. ²⁸ Kobun bis li yeb ne,bilo bio biso bi kwe ku ibwed ku kel ban baba zolo Nziem ani ban ba yemen nde bun bu kel lizol li nde. ²⁹ Munda ban ba yeb nde iso,nde si bo ba ken mu ikal imbe ani ifa ke mwaan a nde,mu mpil ne nde akal mwaan wo iso mu nked a ba kuun ba fhun. ³⁰ Ban ba kenes nde ikel si bo ban ba yemen nde. Ban ba yemen nde ikel ban ba swi nde. Ban ba swi nde bo ban si ba wi nde likum. ³¹ Nki yo bis li mo mu matel bilo bi? Kid ne Nziem akel andi bis,na nde wun wo kal mbeen a bis? ³² Nde wun wo win swi mwaan wo nde ngako,si le mu wi itsin bise baso,isi nki nde wun liwa bilo bio biso andi nde. ³³ Na nde wun wo funu ban ba swil Nziem? Ikel Nziem wo ba suu. ³⁴ Na nde,nde wun wu kwi mu isemes? Ikel Yesu Klistu,nde wun wo fhi,wu bud kal mfun ye lwidil,ani wo futumuk mu nked a ban baba fhi, wu kel mu kuu le itad le Nziem wo sama munda bis. ³⁵ Na nde,nde wun wo li kab mu lizol le Nziem? Ikal mangul to mu minia,to mu imek, to mu nzal,to mu nkwus,to mu bigons to mu ma mbiel? ³⁶ Kobun,bun bu ba swen: "Itsin nze bis ba li si matsu mo maso ku lifhu,ba li mono amon ne ma meme ma ba tswala mu iku dus." ³⁷ Mu bilo bi bio biso,bis ba li lwidil ibyi,ku kel wun wo li zwel. ³⁸ Munda me ya nkisi ne ansa lifhu,ansa lizing,ansa ba wanzio,ansa ba mfum ba liyaal,ansa bilo bi limono,ansa bilo bibi ya ku nkul,ansa bi mfum. ³⁹ Nto mu ngi, nto mu nsi,ilo imo we ke kes Nziem,ikwi mu iku likab bis mu Lizol le Nziem,lili ghan ku kel mfum a bis Yesu Klistu.